¹ Shikabombiwa ishiku limo ukuti u Yesu akiputagha ku malo ghamu. Mwo amalisha yumo wa bafundiwa wake akayugha kukwake, ''Malafyale, tumanyishe utwe ukwiputa isa mumwo u Yohani akamanyishisha abafundiwa wake.'' ² U Yesu akati kukwabo, ''Linga mukwiputa muyughaghe mutingi, 'Tata, ingamu yako yighindikiwange isa nyikemo. Ubunyafyale bwako bwise. ³ Utupe utwe ichibama icha ishiku nishiku. ⁴ Utuhobokele utwe imbibi shitu, isa mumwo tukuhobokela weshi yula yuyo ali ninongwa shitu. Mutakatwingishe utwe mungelo.''' ⁵ U Yesu akati kukwabo, ''Wini mu umwe angisa awe numumanyani, sona akwisa ukuya kwa yuyo pakati pabushiku, sona nukuyugha kukwake, 'Mumanyani, ngopeleko ifibama fitatu, ⁶ pakuti umumanyani wangu afika lulu ukufuma pamusebo, sona ndalinako kalikoshi akakuti imwikashishe pandashi pake'? ⁷ Po yuyo akaba mukati angamwamula ukuti, 'Utakandamyaghe. Kumulyango kwighalikite kale, sona nabana wangu, babo indinabo pamupene nune baghonite pachitala. Ndangakwanisha ukunyamuka nukuti ingupe ichibama uwe.' ⁸ Nguyugha kunwe, nalinga atanganyamuka nukumupa ichibama chifukwa wimumanyani, pachifukwa cha ukushita ukuba nisoni pakukibilila, akunyamuka nukwisa nukukupa ifibama fyofyingi isamumwo ukulondela. ⁹ Nguyugha sona kumwe, suma, sona chikwisa ukupeghiwa kukwinu; londa, po mukwisa ukufyagha; kong'osha, chikwisa ukubighukila umwe. ¹⁰ Pakuti umundu weshi yuyo akusumagha akupokelagha; sona umundu weshi yuyo akulondagha akwaghagha; sona umundu yuyo akukong'osha kukwisa ukwighuka. ¹¹ Wi tata yuki mumwinu, nalinga umwana wako asuma iswi, angisa amupe injoka mumalo mwa iswi? pamu nalinga umwana wako asuma ichiba, akwisa kumupa ibwe, ¹² pamu nalinga asuma ifumbi, ungamupa ukulisha. ¹³ Popapo, nalinga umwe mwe babibi mumenye pakupa ifyisa ifyabupi kubana binyu, fili bule ubwinginu Tata winyu ukufuma kumwanya ukupa umbep[o mwikemo kwa boshi babo bakufuma kukwake?'' ¹⁴ Po apa u Yesu akafumyanga imbepo imbibi shisho shitakayughagha. Mwo ifimbepo ifibibi fyafuma, umundu yuyo atakayughagha akayugha, sona ichilundilo chikaswigha. ¹⁵ Lole abandu bamo bakayugah, ''Mwa Bezebula, umulaghili wa imbepo imbibi, ali pakufumya imbibi.'' ¹⁶ Abangi bakamughela mumwo angafukisha imbepo imbibi kumwanya. ¹⁷ Lole u Yesu akashimanya inyinong'ono shabo sona akayugha kukwabo, ''U bunyafyale boshi buyabanite bwene bwipanga pabwene pabwene, sona inyumba yiyo yighabite payene yikuwa. ¹⁸ Nalinga u satana iyabanyishe mwene, ubunyafyale bwake bungise bwimilile bulele? Pakuti mukuyugha ukuti ngufumikisha imbepo imbibi mwa Bezebula. ¹⁹ Linga ngufumisha imbrpo imbibi mwa Bezebula, mwa wini abakubakonga winyu bakufumikisha? chifukwa cha ichi, bakwisa ukuba balongi binyu. ²⁰ Lole linga ngufumikisha imbepo imbibi mukakono ka Chala, po ubunyafyale bwa Chala bwafika kukwinyu. ²¹ Nalinga u mundu ubamaka yuyo itendekeshishe akulindilila inyumba yake, ukandu wake ali pabwisa, ²² Lole nalinga umundu uwamaka ngani amupota yuyo, umundu uwa maka yula akufumyapo ifililo fyoshi fifyo akasubalila sona nukukusania ukatundu wa ²³ mundu.Yuyo atali nune kokuti abenganite nune, sona yuyo atakubungana nune akupalanyika. ²⁴ Linga imbepo imbibi shafumamo mumundu, yikuyanga kubuyo kokutali amishi sona yikulondagha ukupumula. Linga yapotwa, yikuti, 'Ngunyokela kunyumba yangu kuko ngafuma.' ²⁵ Pala yanyokela, yikwaghagha munyumba muswepite po yikubika fyoshi mubuyo bwake. ²⁶ Po yikubuka nukwegha imbepo iyingi seveni ishibibi ukulusha nayiyo shikwisa nukwikala mulamula. Po ubwumi bwa mundu bukuba bubibi ngani ukulusha napabwandilo.'' ²⁷ Fikubombiwa ukuti, mwo ayugha ifindu ifi, umukolo yumo akakwesha amashu ghake pamwanya pa chilundilo akati kukwake, ''Lusayiwa ulwanda lulo lukakunyamula uwe sona amabele ghagho ghakakongesha uwe.'' ²⁸ Lole akati, ''Hagha, musayiwa yuyo akupulika amashu gha Chala nukughasungilila.'' ²⁹ Mwo ichulundilo chikwendelela ukukula, u Yesu akanda ukuyugha, ''Ingulile iyi ngulile imbibi. Yikulondagha ichimanyikisho, napapo nachimo ichimanyikishi chicho chikwisa ukupeyiwa ukutishapo ichimanyikisho icha Yona. ³⁰ Pakuti isa momwo u Yona akisa aba chimanyikisho kuba Ninive, po isa bububu u Mwana wa Mundu akwisa ukuba chimanyikisho ku ngulile iyi. ³¹ U Mwene umukolo uwa kunguto yimuyene iya chisu akwisa ukushushiwa pabulongi nabalisha abangulile iyi sona nukuwasusha, pakuti akisa ukufuma kubumalilo bwa chisu ukupulika amahala agha Solomoni, sona tesha, yumo yuyo mukulu ukulusha u Solomoni ali pano. ³² Abalisha aba mu Ninive bakwisa ukwimilila pabulongi pamupene ningulile iyi iya bandu sona akwisa pakubasusha, pakuti bapinduka pakulumbilila ukwa Yona, sona tesha, yumo yuyo mukulu ukukinda u Yona ali pano. ³³ Nayumo, linga akosha inyale, akubika kubuyo bobwo bwimamite pamu mundende mwa basiketi, lole pamwanya pamesa, ukuti yuyo akwingila atesha ubwelu. ³⁴ Amaso ghako nyale iya mubili wako. Linga amaso ghako ghisa, umubili ghoshi ghukwisula nubwelu. Lole linga amaso ghako mabibi, umubili wako ghukwisula nichisi. ³⁵ Polelo, mube maso ukuti ubwelu mumwinyu butakabe chisi. ³⁶ Linga po umubili ghoshi ubako bisula nubwelu, kishita ichisi pakaghaba kalikoshi, po umubili wako ghoshi ghukwisa ukuba isa linga inyali yabala ubwelu bwake papako.'' ³⁷ Mwo amalisha ukuyugha, umufalisayi akamusuma ukuti aye alye nawe pamupene kunyumba yake, po u Yesu akingila nukwikala. ³⁸ Umufalisayi akaswigha ukuti u Yesu atakasukusula tashi pakwanda pakulya. ³⁹ Lole u Malafyale akati kukwake, ''Po ulu, umwe bafalisayi mukusuka abo kapu nimbale kuse, lole mukati mwinyu mwiswile ubupafu sona imbibi. ⁴⁰ Umwe mwebashita mahala! Ka yuyo akapanga kuse atakapanga namukati? ⁴¹ Bape abapina fifyo fili mukati, sona po ifindu fyoshi fikwisa ukuba fwelu ku umwe. ⁴² "Lole mwebamukoshi umwe bafalisayi, Papo mukubika chimuchene pa fighaba teni ifya filungo fyinyu isa mbilipili nu kale sona numuzimwa, lole mukukana ubwanaloli sona nulughano lwa Chala. Chipaghileukubomba ubwanaloli sona ukughana u Chala, kishita kufelula ukubomba ifindu ifingi sona. ⁴³ Mwebamukoshi umwe bafalisayi, mwe mwighanite ukwikala kundashi muma sinagogi nukulamukiwa nulughindiko mubuyo bwa kughulishikishamo. ⁴⁴ Mwe bamukoshi umwe, pakuti muli isa umapumba ghagho ghatakuboneka ghagho abandu bakwendapo kishita ukumanya.'' ⁴⁵ Yumuyuwene mubabo bakashimanya ngani ingaghilo akati kukwake, ''Mumanyishi, fifyo wayugha fikututuka nutwe bubu.'' ⁴⁶ U Yesu akati, ''Mwebamukoshi, bamanyishi bandaghilo! Pakuti mubabika abandu ifyombo fifyo fing'wamite ukunyamula, lole mutakukolako ifyombo nakakono kinyu kamukene bubu. ⁴⁷ Mwebamukoshi, papo mukusenga amapumba agha bakunguluka, sona bakaba bosekulu winyu babo bakabaghogha babo. ⁴⁸ Po mukaba bokamboni sona mukitikisha imbombo isha bosekulu binyu, pakuti bwanaloli bakabaghogha sona mukasenga amapumba ghabo. ⁴⁹ Pakuti nichifukwa sona ichi, u Chala uwa mahala akati, 'Ngwisa ukutuma kukwabo aba kunguluka sona abafundiwa, sona bakwisa ukubafwima nukubaghogha bamo mubabo.' ⁵⁰ Ingulile iyi, po, bakwisa ukufundiwa palibanda lyoshi ilya bakunguluka lilyo likakupuliwa pakwanda pabwandilo bwa chisu, ⁵¹ ukwanda palibanda ilya Abelo mupaka palibanda ilya Zakaliya, babo bakaghoghiwa pakati pa chakufukisha sona nubuyo ubughemo. Inga, inguti kumwe, ingulile iyi yikwisa ukufundiwa. ⁵² Mokoshi kumwe mwe mushimenye ngani indaghilo, papo mweghitemwo amaki aghakushaghania; mutakwingilamo pamwebene, sona mukukanisha kubabo bakwigila.'' ⁵³ Mwo u Yesu afumapo pala, abasimbi sona abafalisayi bakasusha sona nukutatikana nawe mufindu ifyingi, ⁵⁴ ukughesha ukumutegha mumashu ghake.