¹ Mukabalilo kalaka, mwo abandu amasabuzande babunganite pamupene umwakuti bakakanyana nabene, akanda ukuyugha tashi nabafundiwa wake, ''Muchebe nichilungo icha bafalisayi, chicho chabushimbuli. ² Lole nachimo chicho chimamite chicho chitakwisa ukufumbuliwa, sona nachimo chicho chili kubushifu chicho chitakwisa ukumanyikwa. ³ Po choshi chicho ukayugha kuchisi chikwisa ukupulikiwa pabwelu, sona fyosho fifyo mukateketelanagha kufungu fikwisa pakufumushiwa pamwanya panyumba. ⁴ Ingubabusha umwe, bamanyani wangu, mutakaboghopaghe abandu babo bakughogha umibili, sona panyuma pake batangabomba nachimo ichinine. ⁵ Lole timbabule yuyo mubaghile ukumoghopa. Mumwoghope yuyo, linga aghogha, ali nululaghilo ulwa kumutaghila mu gahena. Inga, ngubabula mwe, mumwoghope yuyo. ⁶ Ngimba utotiti tutangaghulishiwa nutusalabasha utunandi tubili? Polole nakamu kako kalufyiwepo pamaso agha Chala. ⁷ Shope nisisi isha kumitu yinyu shiwelengiwe. Mutakoghope. Mwebapamwanya ukukinda utwotiti utwingi. ⁸ Inguyugha ku umwe, aliweshi yuyo anitikaune pamaso agha bandu, u Mwana wa Mundu wepe akwisa ukumwitika pamaso agha bangelo wa Chala, ⁹ lole yuyo angana une pamaso agha bandu akwisa ukukaniwa pamaso agha bangelo wa Chala. ¹⁰ Weshi yuyo akuyugha amashu agha kususania nu Mwana wa Chala, akwisa ukuhobokeliwa, lole ku yuyo akususania nu mbepo mwikemo, atakwisa ukuhobokeliwa. ¹¹ Linga babasitaka mumasinagogi, abalaghili, sona nabosongo, mutakapashe ghaha fifyo mukuya pakuyugha ifyakuti mwipoke, pamu naya pakuyughaki, ¹² pakuti u mbepo mwikemo akuya pakubamanyisha umwe pakabalilo kalakala ifyakuti muyughe.'' ¹³ Po yumo muchilundilo akayugha kukwake, ''Manyishi, mubule u bamwitu ukuti aghabileko ifyuma fifyo bakatulekela.'' ¹⁴ U Yesu akati kukwake, ''Mumanyani, wini akamba imbombo une iyakulongela pamu ukuba ne wapakati papinyu?'' ¹⁵ Akati kukwabo, ''Mube maso mutakipange ukuba bapafu nifyakulonda fyinyu, papo ifyuma ifya mundu fitangabupoka ubwumi bwake.'' ¹⁶ Po u Yesu akababula ichili, akati, ''Umughunda nuwa mukabi ghugho akinulagha ifyingi, ¹⁷ sona akayugha pamwene, akati, 'Ngimba timbangeki, papo indanamala aghakusengulilako ifyakulya?' ¹⁸ Akati, 'Ndimbombe ifi. Timbongolanie indamba shoshi nukusenga iyikulu, sona mulamula tingasungemwo imbeyu nukatundu. ¹⁹ Ingwisa ukuti ku bwumi bwangu, ''Bwumi, wasengula ukatundu umwingi uwa fyinja ifyingi. Upepukebu, ulye, ung'we, uhoboke.''' ²⁰ Lole u Chala akati kukwake, 'Wemulunganu uwe, ubushiku ubu ubwumi bwako bukwisa ukufyuliwa, sona ifindu fyoshi fifyo basengania, wini akwisa ukuba nafyo?' ²¹ Mwomwo fibelile kuyuyo akwibunganikila ifyuma po tabakabi pamaso agha Chala. ²² U Yesu akati kubafundiwa wake, ''Polole ingubabusha umwe, mutakapashe nubwumi bwinyu, tukwisa ukulyaki; pamu numubili winyu, tukwisa ukufwalaki. ²³ Pakuti ubwumi bwapamwanya ukukinda ichakulya, sona umubili wapamwanya ukukinda ifyakufyala. ²⁴ Inong'ona abochigobe, batakupesa pamu ukwinula. Fitanamalo aghakusungila pamu indamba, lole u Chala akufelyesha. Lole mwebaghindikiwa wapamwanya ukukinda ifiyuni! ²⁵ Wini mwa umwe angongelesha ishiku ilya bwumi bwake? ²⁶ Linga mukupotwa ukubomba akanda akapepe isa aka, choni chicho mukupasha nifindu ifingi? ²⁷ Inong'ona amaluwa---mumwo ghakulila. ghatakubomba imbombo pamu ukwipangila imyenda. Po lole inguyugha ku umwe, nu Solomoni bubu mubughindikiwa bwake atakafwalapo isa maluwa agha. ²⁸ Linga u Chala akufwalika ubwisu, bubwo buliko ilelo, sona ningelo bukutayiwa mumoto, po umwe angabafwika bulele, umwe mwe muli nulwitiko ulunand! ²⁹ Mutakaketaghe fifyo timulye sona chicho timung'we sona mutakapashe. ³⁰ Pakuti ichisu choshi chikulonda ifindu ifi, sona u Tata winyu ashimenye ukuti mukulonda ifindu ifi. ³¹ Lole londa ubumwene bwake, sona ifindu ifi fikwisa ukumalila kukwinyu. ³² Mutakoghope, tung'oshi utudono, papo u Tata winyu aghobokite ukubapa umwe ubunyafyale. ³³ Ghulisha fyoshi fifyo muli nafyo sona nukubapa abapina. Mube nifikwama ifya ndalama fifyo fitakunyapuka--nukwilundikila ubukabi kumwanya bubo tabukamale lumo, kuko abiba batakupalamil;a kupipi, sona imbesu shitanganangania. ³⁴ Pakuti kuko kuli ubukabi bwako, koko tikukabe sona indumbula yako. ³⁵ ''Mupinye ulamba mumyenda yinyu, sona mukoshe inyale shinyu ukuti shibale, ³⁶ sona mube isa bandu babo bakulonda usongo wabo yuyo ali ku lusekelo ulwa nyegha, ukuti linga isa nukukong'osha, papo napapo amwighulile ichighi. ³⁷ Wasayiwa bala ababomba mbombo babo usongo akwisa ukubagha maso linga akwisa. Naloli ingubabula umwe, akwisa ukupisila ilaya lyake ilitali mwa lamba sona nukwikala pase pa mesa, sona akuya ukwisa nukubanoshela. ³⁸ Linga u songo isa pakati pabushiku, pamu kubuche, sona achagha chinoshiwe, basayiwa ababomba mbombo awa. ³⁹ Lole mumanye ishi, ukuti linga u songo uwa nyumba akamanyagha akabalilo kako umwiba akisila, ngali atakalekelela ukuti inyumbayake yipongoliwe. ⁴⁰ Mube bakwisengania numwe, papo mutakumanya akabalilo kako u Mwana wa Mundu akwisila.'' ⁴¹ U Peteli akati, ''Malafyale, ukuyugha ifyili ifikukwitu twebene, pamu sona kuweshi?'' ⁴² U Malafyale akati, ''Po wini yuyo walwitiko sona umubomba mbombo uwamahala yuyo umalafyale wake akwisa ukumubika kubabomba mbombo abanine ukubapa ichakulya pakabalilo akakwenelela? ⁴³ Musayiwa weyula umubomba mbombo yuyo u malafyale wake ukumwagha akubomba linga akwisa. ⁴⁴ Naloli ingubabula umwe ukuti akwisa ukumubika ukuba wi songo pakatundu wake weshi. ⁴⁵ Lole linga umubomba mbombo ati mundumbula yake , 'U malafyale wangu akaba ukughaluka,' sona nukwanda ukukama abambombo abalisha sona abakolo sona ukulya nukung'wa nukukolwa, ⁴⁶ u malafyale uwa mubomba mbombo yula ukuya ukwisa ishiku lilyo atasubalilagha sona akabalilo kako atamanyagha sona akwisa ukumuputulania mutumenyamenya sona nukumubika kubuyo yuyo ubwa babo batakusubila. ⁴⁷ Umubomba mbombo yula, pakuti amanya fifyo u malafyale wake akulonda sona kishita kusengania pamu ukubomba ukufwana namumwo ukulondela, akwisa pakukomiwa ngani. ⁴⁸ Lole yuyo akabomba kishita kumanya sona abombite chicho chibaghile ukuti akomiwe, akwisa ukukomiwa panandishe. Lole weshi yuyo apeyiwe ifyingi, ifyingi fikwisa ukulondiwa kukwake, sona yuyo apeyiweifyindi ngani, akwisa ukubusiwa ukubika ifyingi ngani ukupota. ⁴⁹ ''Nisa ukuponia umoto pachisu, sona mo nginong'onela ukuti ghukapembiwa kale. ⁵⁰ Lole indi nulosho ulwakuti noshiwe, sona momwo tinyashiwe mupaka po fyamalila! ⁵¹ Mokwinong'ona ukuti ngisa ukupika ulutendano pa chisu? Hagha, ingubabula umwe, lole ukughabingana. ⁵² Pakuti ukwandila ulu abandu fiyivi munyumba bakwisa ukughabingana batatu ku babili sona babili kubatatu. ⁵³ Pakwisa ukughabingana, u tata ku bana abalisha sona abana abalisha kwa tata, u mayi ku bana abakolo sona abana abakolo kwa ng'ina, u mayifyala ku mulasagha sona umulasagha kwa ng'nafyala.'' ⁵⁴ U Yesu akayughagha sona ku chilundilo, ''Linga mukutesha amabingu ghakukwela ukufuma kubwingililo ubwa lisuba, papo napapo mukuti, 'Ifula yikwisa,' sona fikubombiwa. ⁵⁵ Linga imbepo iya kundende yikukuka, mukuti, 'Tikupye,' sona fikubombiwa. ⁵⁶ Bashimbuli, mushimenye mumwo mungasanushisha akabonekele aka chisu icha pase sona kumwanya, lole shili bule ukuti mutamenye ukusanusha akabalilo kako tuli? ⁵⁷ Choni chicho mutakulonga chicho chisa pamwebene? ⁵⁸ Pakuti linga mwabuka numulughu kubulongi, musila mukulwisha ukuyughisania mulutengano nayuyo ukuti manye yiye yifike kumulongi, sona ukuti umulongi manye akutume ku bapolisi, sona u polisi manye akuponyie mu jele. ⁵⁹ Inguyugha kumwe, mutakwisa ukufuma pene papo mwalipila indalama iyabumalilo iya nongwa yako.''