¹ Pakabalilo kalakala, bamu bandu akabalilo kalakala bakamushikisha ifya kufwana naba Galileya bo u Pilato ongania ibanda nifikemesho fyake. ² U Yesu akamula nukuyugha kukwabo, ''Mukwinong'ona ukuti aba Galileya bakaba batulanongwa ingani ukukinda aba Galileya abangi chifukwa chakuyimba musila iyi? ³ Hagha, ngubabula. Lole pala mutakupinduka, mweboshi mukwisa kukomanika musila yiyiyo. ⁴ Pamu bioshi eyitini abandu abamu Siloyamu mumwo ichibumba chikabawila sona chikabaghogha, ka koti mukwinong'ona ukuti bakaba babibi ukukinda abandu abingi aba mu Yelusalemu? ⁵ Hagha, nguyugha. Lole linga mutakupinduka, mweboshiu mwa umwe mukuya ukunangika.'' ⁶ U Yesu akayugha ichili ichi, ''Umundu yumo akaba nikokwe ilya mafilu lilyo lilyo likabyaliwa mumughunda wa mafilu po akisa ukuti ateshe iseke mumo lole akashaghamo nashimo. ⁷ Umundu akayugha kumulimi, ''Tesha, pa fyinja fitatu nisa sona naghela ukulondesha iseke kuchikokwe ichi icha mafilu lole ndakuchagha nachimochimo. Choni chicho chikunanga ilongwi?' ⁸ "Umulimi akamula nukuti, 'Chileke chene ichinja ichi tingumbe ichibwina ukulisungulisha nukubika umuvundo. ⁹ Pala chapapa iseke ichinja chicho chikwisa, chisa; lole pala chapotwa, ukachitumule!"' ¹⁰ Po u Yesu akamanyishanga mu Sinagogi pa sabata. ¹¹ Tesha, umukolo yumo akaba kulakula yuyo pa fyinja eyitini akaba nimbepo iya kufoka. Akaba wakunyongana sona akapotwanga ukuti angagholoka akisa. ¹² Mwo u Yesu amutesha, kamwitisha nukuti, ''Mokolo, wabuliwa ukufoka kwako.'' ¹³ Akabika utukono papake, nakalinga kakaghol;oka sona akamukwesha u Chala. ¹⁴ Lole umulaghili uwa sinagogi akakalala papo u Yesu akaposha pishiku ilya sabata. Po umulaghili akamwamula sona akati kuchilundilo, ''Pali amashiklu sikisi ghagho chakwitikishiwa ukubomba imbombo. Mwise nukuposhiwa, shikukanishiwa pishiku ilya sabata.'' ¹⁵ U Malafyale akamwamula akati, ''Bashimbuli! Nayumo mwa umwe akwabula ing'ombe pamu imbunda nukuyitangilila pakung'wa pishiku ilya sabata? ¹⁶ Po isa bono bono umwana umukolo uwa Abulahamu, yuyo u Satana akamupinya pafyinja ifyingi eyitini, ukupinyiwa kwake kutakasatuliwa pishiku ilya sabata?'' ¹⁷ Mwo ayugha ifindu ifi, boshi babo bakamusushanga bakakoshiwa isoni, lole ichilundilo choshi chikasekela pa fyoshi ifya lughindiko fifyo akabombagha. ¹⁸ Po u Yesu akati, ''Ubunyafyale bwa kumwanya buli isa choni, sona ningabufyanisha nichoni? ¹⁹ Buli isa kaseke aka mupilu kako umundu akegha nukukaponia mumughunda wake, lole kakakula nukuba likokwe ilikulu, sona nifiyuni ifya mumwanya fikasenga ififumbo fyabo mutusamba twabo.'' ²⁰ Akati sona, ''Nichoni chicho ningafyanikisha ubunyafyale bwa Chala? ²¹ Buli isa chilungo chicho umukolo akegha nukongania nifipimo fitatu ifya bufu mupaka chende moshi mubufu.'' ²² Po u Yesu akenda mutwaya toshi, akamanyishanga sona nubulendo ubwakuya ku Yelusalemu. ²³ Yumo akati kukwake, ''Malafyale, ka bandu banandishe abakupokiwa?'' Po akati kukwake, ²⁴ ''Mulwishange ukwingila pakamulyango akafinyu, papo ingubabula umwe, abingi tibakaghele ukwingila, lole tise bapotwe pakwingila. ²⁵ Nandi umwenecho wa nyumba anyamuka nukwighalila umulyango, po timukimilile kuse nukukong'osha ichighi ukuti, ''Malafyale, Malafyale, twighulileko.' ''Tiakabamule nukubabula ukuti, 'Ndakubamanya awe pamu mufumile kughu.' ²⁶ "Po mukwisa ukuti, 'Tukalyanga nukung'wa pandashi pako sona ukamanyishanga mutwaya twitu.' ²⁷ ''Lole akwisa ukwamula, 'inguti kukwinyu, ndakumanya kuko mufumile. Tilako kukwangu, mwebabomba mbibi!' ²⁸ Tikukabe ukulila nukusha amino po timukamuteshe u Abulahamu, Isake, Yakobo, poka nabakunguluka boshi mubunyafyale bwa Chala, lole umwe timukatayiwe kuse. ²⁹ Tibakise ukufuma kubufumilo bwa lisuba, kubwindililo bwa lisuba, kumitu, sona kundende, sona tibakikale pamesa mubu nyafyale bwa Chala. ³⁰ Mumanye ichi, boshi babo tabakulondiwa ngani tibakabe babwandilo, sona babo bakulondiwa ngani tibakabe babumalilo.'' ³¹ Pakabalilo kalakala, abafalisayi bamu bakisa sona bakamubusha bakati, ''Bukagha sona nyamukapo panu papo u Helodi akulonda ukughoghe.'' ³² U Yesu akati, ''Buka kamubushe ukambwe yula, 'Tesha, ngufumya imbepo imbibi sona nguposha umusughu naningelo, sona pishiku ilya butatu tise ingwanilishe fifyo nalondagha.' ³³ Musila yiliyoshi, chakulondiwa ukuti imbukilishe umusughu, ningelo, nukulinda ningelo pakuti tachakwitikishiwa ukuti umukunguluka afwile kuse ku Yelusalemu. ³⁴ Yelusalemu, Yelusalemu we ukughogha abakunguluka sona ukulasa amabwe babo bakutumila kukwako. Ngimba kalinga kako ngulonda ukubungania abana bako isa mumwo inguku yikubungania utwana twake mumapapindo ghake, lole mutakulondagha ifi. ³⁵ Tesha, inyumba yako yashala payene. inguti kumwe, tawise undeshe pene papo wisa wati, 'Musayiwa uyu yuyo akwisa mungamu ya Malafyale.'''