¹ Panyuma pake shikaboneka nakalinga bwo u Yesu anda pakwenda nukushungulila utwaya utukulu utwakupamba pambana sona nutwaya utunandi, ukulumbilila nukufumusha amashu amisa agha bunyafyale bwa Chala. Abandu twelovu bali nawe, ² pamupene nabakolo babo akabaposha kumbepo imbibi nimbungo: U Maliya yuyo akwtishiwa Magadalena, muyuyo mukafumamo imbepo imbibi seveni; ³ U Johana, umukashi wa Chusa, umubomba mbombo usongo wa Helodi; u Suzana; nabanine abingi, bo, ukufuma mufyuma fyabo, bakamubombelagha nafyo. ⁴ Lole bwo ichilundilo ichikulu chikubungana, sona abandu bakisa kukwake ukufuma utwaya nutwaya, akababula ichili: ⁵ ''U mulimi akaya pakupesa imbeyu yake. Bwo akupesa, yimo yikawila mulufafu misila, po bakayikanya nifindi, sona nifiyuni ifyamumwanya fikasebagha. ⁶ Yimo yikawila pibwe, sona lole mwo yamela, yikumila, papo iching'weshi chitakabapo. ⁷ Yimo yikabila mumyifwa, po imyifwa yikakulila pamupene nimbeyu sona yikaghogha. ⁸ Lole yimo yikawila mwilong'wi ilyisa sona yikamenukupapa iseke mupaka handiledi ukukindapo.'' Bwo u Yesu ayugha ifindu ifi, akitisha, ''Weshi yuyo ali ni fyifwo ifyakupulikila, leka apulike.'' ⁹ Abafundiwa bakamibushikisha shisho ichili ichi chikang'anamulilagha. ¹⁰ Akati, ''Ubumanyi ubwa shabushifu isha bunyafyale bwa Chala bupeghiwe kukwinyu umwe, lole abingi nguyughila mufyili, po ukuti 'bakuteshe lole batakutesha, sona bakupulika lole ukuti manye bashaghanie.' ¹¹ Po ichi chocho ching'anamula cha chili: Imbeyu lishu lya Chala. ¹² Yiyo yikawila musila bobala boshi babo bapulika, lole u Satana akwisa nukwegha ishu mundumbula shabo ukuti manye basubile nukupokiwa. ¹³ Iya pibwe bobala boshi babo, linga bapulika, bakulipokela nulusekelo. Lole imishu nayimo; bakusubila pakabalilo akapimba, po lole mutubalilo twa ngelobakuwa. ¹⁴ Imbeyu yiyo yikawila mumyifwa bandu babo bakupulika ishu, lole po bakubukilila ukwenda kwabo, ghakufufutika nifyachisu sona nubukabi sona nifyakunosha ifyabwumi, po iseke shabo shitakughoma. ¹⁵ Lole imbeyu yiyo yikawila mwilyongwi ilyisa, aba bobo bakupulika ishu nubwanaloli sona nindumbula inyisa, kolela nukushighilila sona nukupapa iseke nukukibilila.'' ¹⁶ ''Nayumo yuyo akukosha inyale nukuyifunikila nichifunikishopamu akuyibika pase pachitala. lole, akuyibika pachikolelo icha chale ukuti weshi yuyo akwingila ateshange ubwelu. ¹⁷ Papo patalipo nachimo chicho chififiwe ukushita ukumanyikwa, pamu ichakubushifu choshi ukushita ukumanyikwa sona nukwisa pabwelu. ¹⁸ Po pulikisha akisa, papo naweshi yuyo ali nafyo, ifyingi fikwisa ukupeghiwa kukwake, lole yuyo atanacho nachimo, nacho akwing'ona ukuti ali nacho chikwisa ukupeghiwaukufuma kukwake.'' ¹⁹ Po u mayi wake nabowamwabo wakisakukwake, lole batakapalamila kukwake papipi papo kukaba ichilundilo. ²⁰ Akabushiwa, ''Umayi wako nabowamwinyu bako bimilile kuse, bakulonda bakukete uwe.'' ²¹ Lole u Yesu akamula nukubabula ukuti, ''Umayi wangu nabowamwitu bobala babo bakupulika ishu lya Chala nukulibomba.'' ²² Po ishiku limo akingila mwiboti nabafundiwa wake, po akati kukwabo, ''Satubukaghe kwisila ilya lubafu lya nyanja.''Bakanda pakwambuka. ²³ Lole bwo bakwenda u Yesu akapitila utulo. Imbepo yikisa iyakoghofya ingulu panyanja, iboti likisula namishi, po bakaba pa ndamyo. ²⁴ Po abafundiwa ba Yesu bakisa kukwake nukumunyamusha, nukuti, ''Bwana! Bwana! Tuli pakufwa!'' Akanyamuka nukukalipila imbepo pamupene namayigha gha mishi, sona ghakaleka, pakaba umutende. ²⁵ Po akati kubabo, ''Ulwitiko lwinyu luli koki?'' Lole bakoghopa nukuswigha, po bakabushikisania uyu numunine, ''Ka uyu wiwini, ukuti akukemela imbepo namishi, sona fikumupulikila?'' ²⁶ Bakenda ukuya muchigha cha Gelasinesi, chicho chiketanite ninyanja ukufumaku Galileya. ²⁷ Mwo u Yesu aya pasila pachisu, akisa akomana numundu yumo mukaya mula yuyo akaba imbepo imbibi. Pakabalilo akatali atafwalitepo imyenda, namunyumba atakikalaghamo lole mumapumba. ²⁸ Bwo amuketa u Yesu, akalila nukuwa pase pamaso ghake po akati namashu agha pamwanya, ''Ka ukulonda ubombe ichoni nune, Yesu, Mwana wa Chala wa Pamwanya? Ingukusuma, manye undamye une.'' ²⁹ Papo u Yesu alamwile imbepo imbibi ukufumamwo mumundu uyu. Papo utubalilo utwingi shamutamyanga, sona po bule bakamutamyanga nabo cheni nukukindapo pakulongoshiwa nu ,mbepo ukuya mululangalanga. ³⁰ Po u Yesu akamubushikisha, ''Ingamu yako wewini?'' Akati, ''Ne chilundil,'' papo imbepo inyingi shingile mumwake. ³¹ Shikabukulila ukumusuma u Yesu ukuti manye ashitume ku abisi. ³² Apa pakaba ichilundilo icha nguluwe chicho chikalyanga kulubafu kwihamba. Imbepo iombibi shikamusuma ukuti ashitaghile munguluwe, po akashikisha. ³³ Po imbepo imbibi shila shikafumamo mumndu yula nukuya munguluwe, shikabiuka ukuya kukilomosha kakunyanja tukudwiwa. ³⁴ Bwo abakulyesha inguluwe baketa fyifyo fikabombiwa,bakakindapo nukuya mukaya mula namulubafu muchisu pafifyo fikabombiwa. ³⁵ Po abandu bakabuka pakutesha pa fifyo fikabombiwa, po bakisa kwa Yesu nukumwagha umundu yuyo imbepo shikafumamwo. Akikala mutulundi twa Yesu, afwalite sona ali akisashe munyinong'ono; Ubwogha bukabakola. ³⁶ boshi babo bakatesha ifi bakababula mumwo umundu yuyo akaba nimbepo imbibi akapolela. ³⁷ Po abandu boshi aba chighaba cha Gelasinesi bakamubushikisha u Yesu ukuti afumepo papabo, pakuti bakaba nubwogha ubukulu. Po akingila mu boti nukwanda ubulendo ukunyokela. ³⁸ Umundu yuyo imbepo shikafumamwo akamusuma yuyo ukuti abukaghe nawe pamupene, lole u Yesu akamubwesha, akati, ³⁹ ''Nyokela kukaya kwinyu kababule fifyo u Chala akubombela uwe.'' Umundu yuyla akanyamuka nubulendo bwake, ukufumusha mukaya koshi fifyo u Yesu akamubombela yuyo. ⁴⁰ Apa bwo u Yesu anyokela, ichilundilo chikamupokela, papo bakamulindililagha yuyo. ⁴¹ Tesha, umundu yuyo ingamu yake wi Jayilosi, yuyo akaba wa yumo wabalongoshi mu sinagogi, akisa nukuwa pasi patulundi twa Yesu, sona akamusuma yuyo ukuya kunyumba yake ⁴² papo umwana wake yumuyuwene umulindu, umulindu uwafwinja twelovu, akaba papipi nukufwa. Bwo u Yesu ali musila yake, ichilundilo cha bandu chikafinyana pamupene nukumushungulila yuyo. ⁴³ Pakaba umukolo yumo yuyo akafumagha ibanda ifwinja twelovu sona akagha indalama shoshi shake, lole nayumo yuyo akakwanisha ukumuposha. ⁴⁴ Akisa kunyuma kwa Yesu nukupalamasha umuselekesha wake, papo napapo imbanda likaleka pakufuma. ⁴⁵ U ayesu akati, ''Wini yuyo ambalamasha une?'' Bwo boshi bakana u Peteli akati, ''Bwana ichilundilo cha bandu chikushungulile uwe nukufinyana pakwisa kukwako.'' ⁴⁶ Lole u Yesu akati, ''Yumo ambalamasha une, papo namanya ukuti amaka ghafumamwo mumwangu.'' ⁴⁷ Bwo umukolo yula amanya ukuti atangimama, akisa atetema nukumuwila yuyo. Pamaso gha bandu boshi akashimikisha ichifukwa chicho akamupalamashila yuyo namumwo akapolela papo napapo. ⁴⁸ Po akati kuyuyo, ''Mulindu, ulwitiko lwako lwakuposha. Buka mulutengano.'' ⁴⁹ Bwo akali ali pakuyugha, yumo akisa ukufuma kunyumba ya mulongoshi uwa sinagogi, akati, ''Umwana wako umulindu afwile. Utakamutamyaghe umumashi sona.'' ⁵⁰ Lole mwo u Yesu apulika ifi, akamwamula u Jayilosi, ''utakoghope; subilashe, sona akwisa ukupola.'' ⁵¹ Bwo isa kunyumba atakamwitikisha nayumo ukwingila nawe, ukupatulako u Peteli nu Yohani nu Yakobo, po nu tata wa mwana nu mayi wake. ⁵² Apa boshi bakingila nukufwifwitilila, lole akati, ''Mutakalilaghe; atafwile lole apitile.'' ⁵³ Lole bakamuseka yuyo, abene bakamanya ukuti afwile. ⁵⁴ Lole akamukola nakakono kake sona nukumwitisha, akati, ''Mwana, nyamuka!'' ⁵⁵ Umbepo wake akanyokela, sona akanyamuka papo napapo. Akabalaghila ukuti bamupe ichakulya chimo. ⁵⁶ Abapapi bake bakashigha, sona akabalaghila ukuti manye bamubushe nayumo pachicho chaboneka.