¹ Bwo u Yesu amalisha ukuyugha fyoshi pakupulika kwa bandu, akingila mu Kapenamu. ² Po apa usongo wa basilikali akaba wikapolo yuyo akaghindfikiwa leka, po akabina papipi nukufwa. ³ Lole mwo umusilikali mwo apulika isha Yesu, akatuma abosongo bachiyuda, ukumusuma ukuti ise nukuposha uwambombo wake. ⁴ Bwo bisa kwa Yesu, bakamusuma ngani, ukuti, ''Ubaghile ukuti umubombele uyu ifi, ⁵ papo achighanite ichisu chitu, sona weyo akatusengela isinagogi.'' ⁶ Po u Yesu akabukilila ubulendo bwake pamupene nabo. Lole bwo apalamila ukufika panyumaba, umusilikali usongo akatuma abakamu bakeukuyugha nawe, ''Malafyale, utakitamye, papo indabaghile ukuti uwe wise munyumba yangu. ⁷ Pachikwa ichi indakiyegha une nimwene ukubaghila ukwisa kukwako, lole yugha ishu sona ubambombo wangu akuya pakupola. ⁸ Papo nune ne mundu yuyo ali pase ku bulaghili, nabasilikali babo bali base papangu. Ingayugha ku uyu, 'buka,' po akabuka, sona kuyungi, ''Sakuno,' sona akwisa, sona ku bambombo wangu, ''bomba ichi' sona akabomba.'' ⁹ Bwo u Yesu apulika ishi, akamuswigha, sona nukung'anamukila kuchilundilo chicho chikamukongagha akati, ''Ngubabusha umwe, Namope mu Izilayeli ndalyaghitepo lumo ulwitiko isa ulu.'' ¹⁰ Bwo boshi babo bakabatuma banyokela ku nyumba, bakamwagha ubambombo mwisashe. ¹¹ Ukufuma apo panandishe, u Yesu akaya mukaya ka Nayini, nabafundiwa wake pamupene nichilundilo ichukulu chope chikabuka nawe. ¹² Bwo bafika papipi numulyango uwamukaya, keta, umundu yuyo akafwa bakamunyamula ukufuma nawe pase, umwana yumuyuwene umulisha mwamayi wake(yuyo akaba mufwilwe), ichilundilo ichikulu chikawa nawe ukufuma mukaya. ¹³ Bwo umalafyale amuketa, ichitima chikamukola payuyo nukuyugha ukuti, ''utakalilaghe.'' ¹⁴ Po akanyamuka nukupalamasha ifikono fifyo bakanyamulila umundu umufwe, po babo bakanyamula bakimilila. Akati, ''We mulumyana nguyugha kukwako uwe, nyamuka.'' ¹⁵ Umundu umufwe akanyamuka nukwanda ukuyugha, po u Yesu ukamukolela u mayi wake. ¹⁶ Po ubwogha bukabakola boshi, sona bakabukilila ukumukwesha u Chala, ukuti, ''Umukunguluka umukulu anyamuka pakati pitu'' sona ''U Chala abaketa abandu wake.'' ¹⁷ Akapango aka Yesu kakasata akaya koshi aka Yudeya pamupene nifighaba ifya kushungulila. ¹⁸ Abafundiwa ba Yohani bakayugha fyoshi ifi. ¹⁹ Po u Yohani akitisha abafundiwa wake babili nukubatuma kwa Malafyale ukuti, ''Ka wewe we bakuti ukuya pakwisa, pamu tuketaghe uyungi?'' ²⁰ Bwo bafika papipi nu Yesu, abandu bala bakati, ''U Yohani atutuma kukwako ukuti, 'Ka wewe we bakuti ukuya ukwisa, pamu tukete uyungi?''' ²¹ Mukabalilo ako akaposha abandu abingi kububine nakundamyo sona nakumphepo imbibi, sona nabafwa maso abandu abingi akabapa ukutesha. ²² U Yesu akabamula nukuti kukwabo, ''Pala mukubuka ubulendo bwinyu, mumubushe u Yohani fifyo mwaketa nukupilika. Abafwamaso bakutesha, abalemale bakwenda, abambungo ya bukoma bakwelupiwa, abamapuli bakupulika, abandu babo bafwile bakushuka kubwumi, sona abapina bakupulika amashu amisa. ²³ Umundu yuyo atakulekapo ukusubila mumwangu chifukwa cha mbombo shangu musayiwa.'' ²⁴ Bwo indumi sha Yohani shabuka, u Yesu akanda ukuyugha isha Yohani, ''Ka mukaya pakuteshaki mululangalanga? Ulutete lulo lukuneng'ena ni mbepo? ²⁵ Lole mukaya pakuteshaki? umundu yuyo akafwala imyenda imitonde? Tesha babo bakufwala imyenda iya mutengo sona nababo bakwikala ubwumi ubwakufwasa bali munyumba isha bo Malafyale. ²⁶ Lole mukaya pakuteshaki? Umukunguluka? Inga, nguyugha ku umwe, sona kuyuyo akilite umukunguluka. ²⁷ Ishi sha yuyo shisimbiwe, 'Tesha, ngutuma ubandumi pandashi pako, yuyo akwisa ukunosha isila yako.' ²⁸ Nguyugha kumwe, pakati paboshi babo bapapiwe nabakolo nayumo yuyo amukilite u Yohani. Polole yoyo munandi mubunyafyale bwa kumwanyabwa Chala weyo mukulu ukukinda yuyo.'' ²⁹ (Bwo abandu woshi bapulika ifi, pamupene nabasongesha songo, bakayugha bakati u Chala mugholofu, papo bakoshiwa mulosho lwa Yohani. ³⁰ Lole abafalisayi nabamanya ndaghilo bakashikana shisho u Chala akabinong'onela papabo, papo batakoshiwa mulosho lwa Yohani.) ³¹ ''Kuchoni, po, ningafwanikisha abandu aba ngulile iyi? Bali isa choni? ³² Bali isa bana abanandi babo bakwangala mubuyo ubwa kughulishikishamo, bubo bakwikala nukwitisania sona nukuti, 'Tukubalishikisha imbiliti, sona mutakamogha. Tukimba ulwimbo lwa mbungo, sona mutakalila.' ³³ Pakuti u Yohani akabosha ulosho ulwisa ukushita ukulya ubuledi nukung'wa ubwala, sona mukuti, 'Ali nimbepo imbibi.' ³⁴ U Mwana wa Mundu akisa ukulya nukung'wa, sona mukuti, 'Keta, mundu umupafu sona akukolwa, umukamu wa songesha songo nabatulanongwa!' ³⁵ Lole amahala magholofu kubana wake boshi.'' ³⁶ Apa yumo uwa bafalisayi akamwitisha u Yesu ukuti aye alye nawe. Bwo u Yesu ingila munyumba iya mufalisayi, akikala nukulya nawe pamesa. ³⁷ Keta, kukaba umukolo yum umutula nongwa mukaya. Mwo ashaghania ukuti ali pakulya munyumba ya mufalisayi, akisa isupa ilya mafuta aghakunungila. ³⁸ Bwo imilile pambali papipi nifilundi sona fyake, akulila, akanda pakutimya ifilundi fyake namashoshi ghake, sona nukumupuputa niching'wili chakumutu wake sona nukumufyofyomba utulundi twake sona nukumupakasha amafuta. ³⁹ Bwo umufalasayi yuyo akamwitisha u Yesu aketa ifi, akinong'ona pamwene ukuti, ''Pala umundu uyu akabanga mukunguluka, po ngali amanya ukuti wiwini sona mukolo yuki yuyo akumupalamasha, ukuti uyu mutula nongwa.'' ⁴⁰ U Yesu akamula nukuyugha ukuti kukwake, ''Simoni, ndinichayugha kukwako.'' Akati, ''yugha, Mumunyishi!'' ⁴¹ U yesu akati, ''Pakabapo uwakukopesha indilama yumo akaba nabanongwa yake babili. Yumo akakopa fayivi handiledi, yumo fifite. ⁴² Bwo bapotwa pakulipila, akabahobokela boshi babili. Polole, wini yuyo paboshi angamugana ngani?'' ⁴³ U Simoni akamula nukuti, ''Une nguti yuyo akamuhobokela inyingi ngani.'' U Yesu akati kukwake, ''Walonga akisa.'' ⁴⁴ U Yesu akang'anamukila kumukolo yula nukuti kwa simoni, ''Ukumuketa umukolo uyu. Ningile munyumba yako. Utakamba amishi une aghakusukusula mutulundi twangu. Lole andimya utulundi twangu namashoshi ghake sona nukumbukuta niching'wili chake. ⁴⁵ Utakafyofyomba, lole ukufuma akabalilo kako ningilile muno atalekitepo ukufyofyomba ifilundi fyangu. ⁴⁶ Utakambakasha amafuta kumutu wangu, lole ambakasha utulundi twangu namafuta aghakunungila. ⁴⁷ Polole nguti kukwako, imbibi shake, shisho shikaba nyingi, shahobokeliwa papo ali nulughano ulukulu. Lole yuyo ahobokeliwa panandi akuba nulughano ulunandi.'' ⁴⁸ Po akati kuyuyo, ''Imbibi shako shahobokeliwa.'' ⁴⁹ Boshi babo bakalya pamupene bakanda pakuyugha pakati pabo pabene ukuti, ''Wini yuyo uyu ukuti akuhobokela nimbibi?'' ⁵⁰ Po u Yesu akati kumukolo yula, ''Ulwitiko lwako lwakuposha uwe. Bukagha numutende.''