¹ Po chika pishiku ilya sabata ukuti u Yesu akaya mumughunda wa ngano, abafundiwa bake bakayaba imitu ya ngano, nukukulukuta nutukono twabo, sona nukulya ingano. ² Lole abafalisaayi bamu bakati, " choni cho mukubomba fimo fyo fitakulondiwa pishiku lya sabata"? ³ Ukubamula babo, u Yesu akati, "ka mutabelingite fyo u Davide akabomba bwo isala ya mukola, yuyo nabandu bobakaba nawe? ⁴ Akaya munyumba iya Chala mkwegha ichibama cho chikabapo sona nukulya chimo, sona akabapa nabandu bamu bo bakaba nawe pa mpene nukulya, pobule chikitishiwa umuputi mwene pakuly. ⁵ "Po akati kukwabo, "umwana wamundu weyo wimalafyale wa sabata". ⁶ Chikaboneka ishiku ilingi ilya sabata ukuti akingila musinagogi sona nukumanyisha abandu, mukabamo umundu yumo yo akakono kake kalemalite. ⁷ Po abafalisayi namandaghilo bakaketesha ngani linga angamuposha yumo pishiku lya sabata, pa ukuti bamwaghe nichifukwa icha kupela inongwa. ⁸ Lole akabamanya fyo bakinong'ona sona nukuyugha ukuti kumundu yo akalemala akakono kake, "nyamuka sona imilila pakati pa weshi" po umundu uyo akanyamuka mukwimilila ⁹ U Yesu akati kubabo, "imbabushikishe ka chakulondiwa ukubomba ichisa pa sabata pamu ukubomba ichibibi, ukupokela ubwimi pamu ukukomania? ¹⁰ Bwo abatesha boshi nukuygha kumundu yula, "gholosha akakono kako,"akabomba bulabula sona akakono kake kakaghalukila mubuyo bwake. ¹¹ Lole abene bakisula nubukalale nukuyugha kwa yumo nayumo pafyo bangabumbela u Yesu. ¹² Chikaboneka mumashikku agho ukuti u Yesu akaya kwighamba pakwiputa. Akabukilila pakwiputa ubushiku bwoshi kwa Chala. ¹³ Lole bwo po pamusi, akabitisha abafundiwa bake, sona akabasala twelove, bo akabitisha ukuti bapositoli. ¹⁴ Ingamu shapositoli shikaba sho isi Simoni (yo uyu akamwitisha Peteli) nuwamwabo wake u Andileya, Yakobo, Yohani, Filipi, batolomayi, ¹⁵ Matayi, atomasi, Yakobo umwana wa Alufeyo, Simoni uyu we akitishiwa Zeloti, ¹⁶ Yudasi umwana wa Yakobo, nu Yudasi sikaliyoti uyu weyo akisa aba mulughu. ¹⁷ Po u Yesu akilomoka ukufuma kwi ghamba pamupene nabo nukwimilila pabuyo ubutenganu nichilundilo icha bafundiwa bake sona ninamba ingulu iya bandu aba kufumila ku Yudeya naku Yerusalemu sona nukufumila mumbali munyanja na mukaya ka Sidoni. ¹⁸ Bakisa ukupulikisha kukwake sona nukuposhiwa kumbungo shabo. Abandu bokatamiwa nimphepo inyali bope bakapola. ¹⁹ Weshi muchilundilo chabandu akalonda ukumupalamasha papo amaka ghakafuma mumwake nukubaposha, sona akabaposha boshi. ²⁰ Po akabatesha abafundiwa bake nukuti, " basayiwa umwe mwebapina, papo ichinyu bunyafyale bwa Chala. ²¹ Basayiwa umwe mwemuli nisala, papo nukwisa ukwikuta. Basayiwa umwe mwemukulila apa, papo mukwsa ukuseka. ²² Basiyiwa umwe linga abandu bababengite, sona bakubapatulanukubatuka sona nukubakana ingamu yinu ngati mbibi, chifikwa cha mwana wa mundu. ²³ Po musekele ishiku ilyo sona nukunyela chifukwa cha kuhoboka, chifukwa nukwisa ukupokela ichabupi ichikulu kumwanya, papo nabanyenya babo fyobakababombela abakunguluka musila yimuyene. ²⁴ Loli mukoshi kumwe mwebakabi, papo mwapokela kale ifyisa fyinu. ²⁵ Mukoshi kumwe mwe mwishile apa, papo musukuba nisala. Mukoshi kumwe mukuseka apa, papo mukwisa pakuswima nukulila panyuma. ²⁶ Mukoshi kumwe abandu bakuyugha ubwisa bwinyu, pakuti abanyenya babo bakababombela fififyo abakunguluka abamyashi. ²⁷ ''Lole nguyugha kumwe mwe mukupulika, ghana umulughu wako nukumubombela ifyisa boshi babo bakubengite uwe. ²⁸ Basaye boshi babo bakukutuka uwenukubiputila boshi babo bakukunyasha uwe. ²⁹ Kuyuyo akukukoma uwe kulusaya lumulyene, mupe sona ulungi. Pala yumo egha ikoti lyako utakamukanile numwenda wako ghope. ³⁰ Mupe weshi yuyo akukusuma uwe. Pala yumo egfha chimo ichako, utakamubushe ukuti akunyosheshe. ³¹ Isa mumwo ukulondela ukuti abandu bakubombela, nuwe ubabombelaghe chilachila. ³² Linga ubaghanite abandu babo bakughanite, po mukupindulaki? Papo nabatulanonga bope bakughana babo babaghanite. ³³ Linga mukubabombela abandu ifyisa babo bakubabombela ifyisa umwe, mukupindulaki? Papo nabatulanonga bope bakubomba fimufyene. ³⁴ Linga mukubakopela abandu babo mukusubila ukulipiwa, mukupindulaki umwe? Nabatulanonga bakukopela abatulanonga, ukuti wise babweshe mumwo fyawelile. ³⁵ Lole mubaghane abalughu binu nukubabombela ifyisa. Mubakopele, ukushita ukusubalila ukubweshiwa, ukwisa ukuba nifyabupe ifikulu, sona mukwisa ukuba bana ba Mukulu Wapamwanya, papo yuyo mwene mololo ubakushita ukupalisha nabandu ababibi. ³⁶ Ube wachisa isa mumwo u Ghuso wako wachisa. ³⁷ Utakabalonge, po nuwe utakwisa ukulongiwa. Utakayughaghe ububibi, po nuwe utakwisa pakuyughiwa ububibi. Baghobokele abangi, po nuwe ukwisa ukughobokeliwa. ³⁸ Peleka, po nuwe ukwisa ukupeghiwa. Mukwisa ukupeghiwa ichipimo--ichakubindilishiwa pase, ichakuyingana sona nukwisula--chikwisa ukukupuliwa mumwako. Papo ichipimo chicho babombela, chikwisa ukupimiliwa kukwako.'' ³⁹ Po akababula ichili. ''Ka umufwa maso angamulongosha umufwa maso umunine? Pala angabomba, po boshi bakuwila muchibwina, ka batangawila? ⁴⁰ Umufundiwa atakukinda umumanyishi wake, lole linga weshi amanyila ngani akwisa ukuba isa mumanyishi wake. ⁴¹ Choni chicho ukuketa akamindu kako kali mulyiso ilya munyako, lole utakuketa ichako ichimindu chicho chili mulyiso lyako? ⁴² Ungayugha wule kumwamwinyu , 'Wamwitu isa indishepo amindu kako kali mulyiso lyako, 'po uwe pawimwene utakuketa ichikokwe chicho chili mulyiso lyako? We mumyashi uwe! wande utishe ichikokwe chicho chili mulyiso lyako, po ukwisa ukutesha akisa nukufumya akamindu kako kali mulyiso lyamunyako. ⁴³ Papo nalimo ikokwe ikyisa lilyo likupapa iseke imbibi, pamu ikokwe ibibi lipape iseke inyisa. Ikokwe lyoshi likumanyikwa niseke shake. ⁴⁴ Papo abandu batakuyaba iseke sha mukuyu mumyifwa, pamu ukuyaba iseke sha mafilu mumyifya. ⁴⁵ Umundu umwisa uwandumbula iya chuma ichisa akupapa ifyisa, sona umundu umubibi uwandumbula ya chuma ichibibi akupapa ichibibi. Ukufuma mundumbula ya findu ifyingi umulomo wake ghukuyugha. ⁴⁶ ''Choni chicho mukunitisha une, 'Malafyale, Malafyale,' lole mutakumbulikila ifindu fifyo nguyugha? ⁴⁷ Weshi umundu yuyo akwisa kukwangu nukupulika amashu ghangu nukupulikila, iti imbabushe mumwo abelile. ⁴⁸ Ali isa umundu yuyo akusenga inyumba, yo akumba ukuya pase mwilongwi nukusenga palufulugha pibwe ikafu. Mwo amapwishi ghafika, ghakakoma inyumba lole pope yitakaneng'ena, papo yikasengiwa akisa. ⁴⁹ Lole umundu weshi yuyo akupulika amashu ghangu sona atakughapulikila, ali isa umundu yuyo akasengainyumba pamwanya pilongwi ukushita ulufulugha. Bwo amishi ghaba ghingi gha koma inyumba, yikawa nakalinga, sona ukuwa kwa nyumba kukashilila papapo.''