¹ Po akayugha ichilikubabo mumwo bangiputila bwila sona nukushita ukuwishiwa amaka, ² akati, ''Mukaya kamu mukaba umulongi yuyo atakamughopagha u Chala sona atakaghindika abandu. ³ Po kukaba kumukolo mukayaako, sona akisa kabilikabili kuyuyo, ukuti, 'Nyafwe ukuti imbwaghe ubwanaloli kumulughu wangu.' ⁴ Pakabalilo atakalonda ukumafwa, polole mwo pakindapo panyuma akiyughisha mwene, 'Pobule ndakoghopa u Chala pamu ukumughindika umundu, ⁵ lole pakuti umukolo umufwile uyu akundamia, ingwisa ukumwafwa ukuti abwaghe ubwanaloli, pakuti manye angakamishe pakenelela ikuwisa kukwangu.''' ⁶ Po umulafyle akati, ''pulikishaku mulongi uyu ubumashi bubo akuyugha. ⁷ Ka apa u Chala wepe atakwisa ukukwisa nubwanaloli kubasaliwa bake babo bakulila ubushiku napamusi? ka akwidsa pakukabisha papabo? ⁸ Inguyugha kukwinyu ukuti bakwisa ukupokela ubwanaloli kubabo nakalinga. Napo shiwe bubo, pala u Mwana wa Mundu afika, akwisa naloli ukulwagha ulwiko pa chisu?'' ⁹ Po akayugha sona ichili ku bamu babo bakisubalila pabene ukuti bakaba baghofu sona bakanyashagha abandu, ¹⁰ ''Abalisha babili bakaya mutempheli pakwiputa---yumo akaba mufalisayi sona yumo akaba kusongesha umusongo. ¹¹ U Falisayi akimilila nukwiputa ififndu ifya pa mwene, 'Chala, ngukupalisha papo ndayanite nabandu bamo---ifighabenga, babo tabagholofu, abahule---pamu isa uwakusongesha isongo. ¹² Ingufunga kabili usabata weshi. Ingupeleka ka tene choshi pafyo ingufyagha.' ¹³ Lole umusongesha songo, akimilila pabutali, akapotwa ukuti anyamushe amaso ghake kumwanya, lole akikoma pachiba, ukuti, 'Chala, mbelele ichisa une, nemutula nongwa.' ¹⁴ Nguti kukwinyu, umundu uyu akanyokela kunyumba yake mugholofu ukukinda umunine, papo weshi yuyo akwikwesha akwishiwa, lole weshi yiyo akwiyisha akukweshiwa.'' ¹⁵ Abandu bope bakisa kukwake abandi abanandi ukuti abapalamashe babo, lole bwo abafundiwa watesha ifi, bakabakalipila babo. ¹⁶ Lole u Yesu akabitisha kukwake, ukuti, ''Bitishe abanandi bise kukwangu une, sona mutakabakanishe. Pakuti ubunyafyale ubwa Chala bwabo bali isa aba. ¹⁷ Naloli ngubabula umwe, weshi yuyo atakupokela ubunyafyale bwa Chala isa mwana umunandi atakwisa ukuwingila.'' ¹⁸ Umulaghili yumo akamubushikisha, akati, ''Mumanyishi umwisa, imbombe shachoni ukuti ibwaghe ubwumi bwa bwila nabwila?'' ¹⁹ U Yesu akati kukwake, ''Choni chicho mukunitisha une ukuti ne mwisa? nayumo yuyo mwisa, ukupatula u Chala mwene. ²⁰ Mushimenye indghilo---mutakapangaghe ubomalaya, mutakaghoghaghe, mutakibaghe, mutakabikilaghe ubumboni ubwabumyashi, ghindika u tata nu mayi wako.'' ²¹ Umulaghili akati, ''Ifindu fyoshi ifi ifipulikile ukufuma koku bunandi bwangu.'' ²² Bwo u Yesu apulika ifi, akati kukwake, ''Chilipo ichindu chimuchene chicho utanacho. Ubaghile ughulishe fyoshi fifyo ulinafyo sona ubaghabile abapina, sona ukwisa ukuba nichuma kumwanya--po isagha, ungonge une.'' ²³ Lole bwo umulaghili apulika ifindu ifi, akisa asulumania leka, papo akaba mukabi leka. ²⁴ Po u Yesu, bwo amutesha yuyo ukuti asulumania akati, ''Chikafu sana ukuti boshi babo bakabi baye bingile ubunyafya bwa Chala! ²⁵ Popa chipepe ukuti imbunda yiye yingile mukabwashi ka sindano, ukukinda ukuti umundu umukabi aye ingile ubunyafyale bwa Chala.'' ²⁶ Bala babo bakapulika bakati, ''Po wini yuyo angapokiwa?'' ²⁷ U Yesu akamula, ''Ifindu fifyo fipala numundu fipepe nu Chala.'' ²⁸ U Peteli akati, ''Chisa, twaleka choshi chicho chitu sona twakonga uwe.'' ²⁹ Po u Yesu akati kukwabo, ''Naloli, ngubabula umwe ukuti nayumo yuyo aleka inyumba, pamu umukashi, pamu abowamwabo, pamu abowise, pamu abana, pachifukwa cha bunyafyale bwa Chala, ³⁰ yuyo atakwisa ukupokela ifyingi ukukindapo muchisu ichi, sona nichisu chicho chikwisa, ichabwumi ababwila nabwila.'' ³¹ Bwo ababunganika twelovu kukwake, akati kukiwabo, ''Tesha, tukubuka kula ku Yelusalemu, sona ifindu fyoshi fifyo filembiwe nabakunguluka ukufwana nu Mwana wa Mundu fikuya pakukwanilishiwa. ³² Papo akwisa ukupeghiwa kuba kuse, bakwisa ukumobesha, nukukoshiwa isoni, sona nukumufwila amati. ³³ Pala bamufyapula, bakwisa ukumughogha, po pishiku ilya butatu akwisa ukunyamuka sona.'' ³⁴ Batakashaghania nachimo pafindu ifi, sona ishu ili likafifiwa kukwabo, sona batakafyaghaniaifindu fifyo fikayughiwa. ³⁵ Chikisa chaboneka ukuti, mwo u Yesu apalamila mu Yeliko, umufyamaso yumo akikala pambali pamusebo nukusuma, ³⁶ Sona mwo akupulika ichilundilo chikwenda kupipi, akabushikisha chicho chikubombiwa. ³⁷ Bakamubusha ukuti u Yesu waku Nazaleti akwenda papipi. ³⁸ Umufwa maso akakolela, ukuti, ''Yesu, Mwana wa Deveti, mbelele ichisa une.'' ³⁹ Bo bakatangila bakamukalipila umufwa maso, ukuti abeshe myee. Lole akitisha ngani, ''Mwana wa Deveti, mbelele ichisa une.'' ⁴⁰ U Yesu akimilila nukumulamula ukutiumundu uyo ise kukwake. Bwo umufwa maso apalamila papipi, u Yesu akamubushikisha, ⁴¹ ''Ukulonda une ingubombeleki uwe?'' Akati, ''Malafyale, ngulonda imbokele ukutesha.'' ⁴² U Yesu akati kukwake, ''Pokela ukutesha kwako. Ulwitiko lwako lwakuposha uwe.'' ⁴³ Papo napapo akapokela ukutesha sona nukumukonga yuyo, nukumukwesha u Chala. Abandu boshi, babo bakatesha ifi, bakamupa amapalo u Chala.