¹ U Yesu akayugha ku bafundiwa bake, ''Ingelo shikwisa ukubako ishakupangisha ukuti utwe tunange, lole mukoshi kumundu yuyo shikwisa ukufumilako! ² Shamubaghilile yuyo ukuti ibwe libikiwe ukushungulila ishingo yake sona nukutaghiwa munyanja nukulusha ukumupanyisha yumo uwatwana utunandi ukuti tutasmiwe. ³ Mube maso. Pala umukulu wako ananga, umukemele, sona pala apinduka, umughobokele. ⁴ Pala akunangisha ka seveni pishiku, sona ka seveni akwisa kukwako, nukuti, 'napinduka,' ubaghile umughobokele!'' ⁵ Abafundiwa bakati kwa Malafyale, Tongeleshe ulwitiko lwitu.'' ⁶ U Malafyale akati, ''Pala mukabagha nulwitiko isa lwa iseke ya masitadi, ngali mukuyugha kwi kokwe lya mukuyu, 'Nyukuluwasona ubyaliwe munyanja,' po likwisa ukubapuylikila umwe. ⁷ Po wini wa umwe, yuyo ali numubombi uwakulima pamu uwa fitekiwa fya ng'oshi, angati kukwake pala wabwelako ukufuma kumughunda, 'Saqkuno lubilo wikale pase nukulya'? ⁸ Ka atangayugha kukwake ukuti, 'Kanoshele chimo ichakulya ukuti indye, sona ubike ulamba ukushungulila mumyenda yako po ungonge une mupaka ponamalila ukulya nukung'wa. Po panyuma ukwisa pakulya nukung'wa'? ⁹ Atakupalishapo kumumbombi papo akabomba ififndu fifyo akabuliwa ukubomba, ka akabomba? ¹⁰ Napo fili bubu pope, pala babomba fyoshi fifyo wabuliwa ukubomba, tise ati, 'twebabombi bakushita kubaghila. Twabomba fyene fifyo tubuliwe ukuti tubombe.''' ¹¹ Kakisa akabablilo kamu mwo akwenda ukuya ku Yelusalemu, akabuka ukwendela mumbaka pakati pa Samaliya nu Galileya. ¹² Mwo ingila mukaya kamu, mulamula akumana nabalisha teni babo bakaba nimbina ya mambombo. Bakimapo pabutalipo nawe ¹³ sona bakakolela pamwanya amashu ghabo, bakati, ''Yesu, Songo, ube nichisa nutwe.'' ¹⁴ Mwo abatesha, akati kukwabo, ''Buka sona muye mwilaghishe kubaputi.'' Mo bakubuka bakaposhiwa. ¹⁵ Mwo yumo wa balabala atesha ukuti aposhiwa, akang'anamukila kunyuma, nukukolela amashu agha pamwanya aghakumupala u Chala. ¹⁶ Akawa pase pafilundi pa Yesu, nukupalisha. akaba Musamaliya. ¹⁷ Po u Yesu akati, ''Mutakaba teni mwemukaposhiwa? Nga nayini balikoki? ¹⁸ Batakabapo abangingi babo bakanyokela pakubika amapalo kwa Chala, ukutishapo umugheni?'' ¹⁹ Akati kukwake, ''Nyamuka, nukubuka. Ulwitiko Lwako lwakuposha.'' ²⁰ Bwo alalushiwa nabafalisayi ukuti ka ubunyafyale bwa Chala bukuya pakwisa lighi, u Yesu akabamula nukuti, ''Ubunyafyale bwa Chala butakuya pakwisa umwakuboneka namaso. ²¹ Pamu bukwisa ukuyugha ukuti, Tesha, chili kuno!' pamu chili kula!' ukutiwateshe, ubunyafyale bwa Chala buli mukati mwinyu.'' ²² Akati kubafundiwa bake, ''Amashiku ghakwisa po mukwisa ukulonda kwishiku limo ilya mashiku gha Mwana wa Mundu, lole tamukaliteshe. ²³ Po bakwisa ukuti kumwe, 'Tesha, kula! Tesha, kuno! lole manye mufumaghe kuse pamu ukubakindilila, ²⁴ isa mumwo akabali kakubalila ngani ukufuma kulubafu lumo ulwa kumwanya sona ukuya kulubafu ulungi ulwa kumwanya, momwo u Mwana wa Chala asukubila mumashiku ghake. ²⁵ Lole pabwandilo abaghile atamiwe mafyindu ifyingi nukukaniwa nabatubalilo utu. ²⁶ Isa mumwo fikabombeliwa mumashiku agha Nowa, momwo sona fikwisa ukubombekela mumashiku gha Mwana wa Mundu. ²⁷ Bakalya, bakang'wa, bakeghana, sona bakapeghiwa munyegha mupaka pishiku lilyo u Nowa akingila mungalaba--amapwishi ghakisa nukubapyuta boshi. ²⁸ Isa mulamula, mumwo fikabombekela mumashiku gha Loti---bakalyanga nukung'wa, bakaghulagha nukughulisha, bakabyalagha nukusenga. ²⁹ Lole pishiku lilyo u Loti akatilaghamo mu Sodomu, kukaba umulilo nukunanga ukufuma ku mwanya nukubapyuta boshi. ³⁰ Isa mukayilo momwo tifikabele pishku ilya Mwana wa Mundu akwisa ukufibonesha pabwelu. ³¹ Pishiku lilalila leke yuyo ali pamwanya pa nyumba atakike pase ukuti eghe ifyombo fyake ukufumya munyumba, sona yuyo ali kumughunda atakabweleko. ³² Mukumbuke umukashi wa Loti. ³³ Kuweshi yuyo akulonda ukubukaba ubumi bwake akwisa pakubutaya, lole yuyo akubutaya ubwumi bwake akwisa pakubupoka. ³⁴ Ngubabula umwe, mubushiku bula bakuya ukubapo abandu babili pachitala chimuchene. Yumo tiakaeghiwe, lole umunine tiakalekiwe.'' ³⁵ Pakuya ukuba abakolo babili babo tibakashange pamupene. Yumo tiakeghiwe lole umunine tiakalekiwe. ³⁶ Tibakabe babili mumughunda; yumo tiakeghiwe lole yumo tiakashale.'' ³⁷ Bakamulalusha Bakati, ''Koki, Malafyale?'' Akati kukwabo, ''Kuko kuli umubili, koko kukuya pakuba ifinyamana po sona nukubungana pamupene.''