¹ U Yesu akati kubafundiwa wake, ''Akabapo umukabi yumo yuyo akaba numubomba mbombo wake yumo usongo, fikisa fyayughiwa ukuti ubambombo uyu akanganianga ichuma chake. ² Po umukabi yala akamwitisha nukuyugha kukwake, 'Choni chicho ngupulika ishakufwana nuwe? Umbule ubwanaloli bwako mwo ukwendeshekesha, papo utabaghile ukuba sona we wambombo.' ³ ''U wambombo akayugha pamwene , 'Imbombe choni une, papo usongo wangu akwegha imbombo yangu yiyo nabaghile ukuti imbombe une? Ndanamaka ghakulimila, sona ndi soni pakusuma. ⁴ Menye fifyo timbombe, ukuti pala bandishapo pambombo yangu, abandu tibaye bambokele munyumba shabo.' ⁵ Po u wwambombo yula akitisha weshi yuyo akaba ningongole ya mukabi, po akamulalusha ubabwandilo, 'Uli ningongole shilinga kwa songo?' ⁶ "Akati, 'Indobo handiledi isha mafuta gha Olivi.' ''Akati kukwake, 'Egha ichipimo chako, ikala pase lubilo, sona usimbe fifite.' ⁷ ''Po uwambombo akayugha kuyungi, 'Uli ningongo shilinga?' ''Akati, 'Utuseke twangano tukabapo handiledi.' "Akati kukwake, 'Egha ichipimo chako, sona usimbe u eyite.' ⁸ Usongo akamukomelesha ukuti ubambombo umushita bugholofu akabomba umwa mahala. Pakuti abana abalisha abachisu bali namahala mukalongoshekeshe ka bandu babo ukukindaabana abagholofu. ⁹ Nguyugha kukwinyu, panga ubukamu wimwene musila iyabushita ubugholofu bwa chuma ukuti pala chamala bise bakupokelele uwe mukati mukaya twabo. ¹⁰ Yuyo ali nulwitiko mukandu akanandi weyo weyo ali nulwitiko mufindu ifyingi, sona yuyo temugholofu mukandu akadono weyo sona temugholofu mufindu ifyingi. ¹¹ Pala utikilemo mulwitiko pakushita ukubomba ubugholofu bwa chuma, wini yuyo angisa akusubalile yuwe ubwanaloli bwa chuma? ¹² Linga utali musubiliwa pakabombeshekeshe pa katundu wa bandu abingi, po wini angisa akupe amakopala ghako? ¹³ Nayumo awa mbombo yuyo angabombela abo Malafyale babili, pakuti tamubenge yumo pamu tamughane yumo, pamu tiipeleke ku yumo nukumukana uyungi. Utangamubombela u Chala pamupene ni chuma.'' ¹⁴ Apa abafalisayi, babo bakaghana indalama, bakapulika ifindu fyoshi ifi, sona bakanda ukumuhoyela yuyo. ¹⁵ Akati kukwabo, ''Mukwibonesha kumaso gha bandu, lole u Chala amenye indumbula shinyu. Chicho chikweshiwe pakati pabandu chibibi pamaso gha Chala. ¹⁶ Indaghilo nabakunguluka bakaba bakubomba imbombo mupaka pakabalilo ka Yohoni. Ukufuma akabalilo kalakala nukwendela, amashu amisa agha bunyafyale bwa Chala ghakulumbiliwa, sona weshi yula ghakumufimbilisha ukuyumwo. ¹⁷ Lole chipepe ukuti ichisu chakumwanya nichapase fimale ukukinda ukuti akasimbo kamo akandaghilo katilemo. ¹⁸ Weshi yuyo amuleka umukashi wake nukwegha uyungi mwo apanga ubomalaya, sona yuyo linga amwegha yuyo alekiwe numulume wake mwo apanga ubwo malaya. ¹⁹ ''Po apa pakaba umundu yumo umukabi yuyo akafwala imyenda imikesamu sona iya mutengo yapamwanya sona akilaghagha ishiku lyoshi ubukabi bwake. ²⁰ Umundu yumo uwakusuma ingamu yake Lazalo akabikiwanga palupaso lyake, akaba filonda fyene umubili ghoshi, ²¹ sona akanyonywanga fifyo fyawa ukufuma patebuloya mundu umukabi yula. Nabokabwa bakisagha nukumumyanda ifilonda fyake. ²² Kakafika akabalilo kako uwakusuma akafwa po akanyamuliwa nabandumi nukuya ulubafu lwa Abulahamu. Numundu umukabi wepe akisa afwa nukushiliwa, ²³ akayimba nindamyo, akinula amaso ghake nukumutesha u Abulahamu pabutali nu Lazalo ali kulubafu lwake. ²⁴ Po akisa alila nukuti, 'Tata Abulahamu, banga nichisa nune mutume u Lazalo, ukuti andwibike ulobe lwakakono kake mumishi nukutonyesha pakuposha ululimi lwangu, papo indi mundamyo numulilo ughu.' ²⁵ ''Lole u Abulahamu akati, 'Mwana, kumbuka ukuti mubwumi bwako ukapokelagha ifindu ifyisa, po u Lazalo mukabele kake akapokela ifibibi. Lole ulu umwene akusubashiwa kuno, po uwe uli mundamyo. ²⁶ Palubafu lwa fyoshi ifi, ulusoko ulukulu lubikiwe pakati, ukuti babo bakulonda ukuloboka ukufuma kuno ukwisa kukwako batangakwanisha, nayumo yuyo angaloboka pakufuma uko pakwisa kukwitu.' ²⁷ ''Umukabi akati, 'Ngukusuma uwe, Tata Abulahamu, ukuti umutume ku banyumba ya tata wangu-- ²⁸ papo ndinabowamwitu fayivi--ukuti aye abasoke, ukuti pamu shingabombiwa ukuti manye bakise kumbuyo ubu ubwa mayimba.' ²⁹ ''Lole u Abulahamu akati, 'Bali nu Mose nabakunguluka; leke babapulikishe bababa.' ³⁰ ''Umukabi akamula, 'Hagha, Tata Abulahamu, lole linga yumo angabuka kukwabo pakufuma ku bafwe, tibise bapinduke.' ³¹ Lole u Abulahamu akati kukwake, 'Linga batangamupulika u Mose nabakunguluka, bope tabiuse bapulikishe napapo yumo ashuke ukufuma ku bafwe."'