¹ Punyuma pa ifi u Yesu akenda ukuya mu Galileya, pakuti atakalondagha ukubuka mukaya ka Yudeya papo aba Yuda bakalondagha bamughoghe yuyo. ² Apa ulusekelo lwa Bayuda ulwa mututembe lukaba papipi. ³ Abowamwabo wake po bakayugfha kukwake, ''Tilapo pabuyo ubunukubuka ku Yudeya, ukuti abafundiwa bako sona bise bateshe imbombo shisho ukubomba. ⁴ Nayumo yuyo angabomba shimo nkubushitu linga yuyo mwene akulonda ukuti amanyikwe pabwelu. Linga ukubomba ifindu ifi, ibonesha wimwene ku chisu.'' ⁵ Pakuti nabowamwabo wake boipe batakasubila mumwake. ⁶ U Yesu akati kukwabo, ''Akabalilo kangu kakali ukuti kakwane,lole akabalilo kinyu kalipo akabalilo koshi. ⁷ Ichisu chitangababenga umwe, lole chiwengite unepapo ingushimikisha isha chicho cho imbombo shake imbibi. ⁸ ubuke kula kulusekelo; une indakubuka kulusekelo papo akabalilo kangu kakali ukuti kakwanilishiwe.'' ⁹ Bo ayugha shishishi kukwabo, Akikala mu Galileya. ¹⁰ Lole mwo abowamwabo wake babuka ku lusekelo pio akisa abuka wepe, atakabuka pabwelu lole mubushifu. ¹¹ Abayuda bakamutesha tesha yuyo pa lusekelo sona bakati, ''Ali kughu yuyo?'' ¹² Pakabapo ifyakuyughisania pakati pacghuilundilo isha yuyo. Bamu bakati, ''Umundu uyu mwisa.'' Bamu bakati, ''Hagha, akuchisobesha ichilundilo.'' ¹³ Lole nayumo yuyo akayugha pabwelu isha yuyo pachifukwa ichakoghopa aba Yuda. ¹⁴ Mwo ulusekelo lwafika pakatiu, u Yesu akabuka mukati mwitempheli nukwanda ukumanyisha. ¹⁵ Po aba Yuda bakaswigha, bakati, ''Umundu uyu afimenye bule ifindu ifi? Atamanyile lumo lumo.'' ¹⁶ U Yesu akabamula sona akati, ''Ubumanyishi itwa bwangu lole bwa yuyo akanduma une. ¹⁷ Weshi yuyo akulonda ukubomba ubwighane bwake, akuya pakumanya isha chimanyisho ichi, pamu linga chikufumila kwa Chala, pamu inguyugha ifyakufuma kukwangu. ¹⁸ Weshi yuyo akayugha ifya kukwake akupokela ulughindiko lwake, lole kuyuyo akulonda ulughindiko kuyuyo akamunduma yuyo, umundu uyo wanaloli, sona mumwake mutalimo ubwanaloli. ¹⁹ ka u Mose atabapa indaghilo umwe? Po lole nayumo yuyo akashisubila indaghilo. Choni chicho mukulonda ukughogha une?'' ²⁰ Ichilundilo chikamula, ''Uli ni mbepo imbibi. Wini yuyo akalonda ukughogha uwe?'' ²¹ U Yesu akabamula sona nukuyugha kukwabo, ''Ngubomba imbombo yiomuyene sona mweboshi mukaswigha chifukwa cha ichi. ²² U Mose akabapa ukutumuliwa umwe(takokuti ukufuma kwa Mose, lole lukafuma kubanyenye), sona pishiku ilya sabata mukutumula umundu. ²³ Linga umundu akapeliwa ukutumuliwa pishiku ilya sabata ukuti ululaghilo ulwa Mose manye luputuke, choni chicho mukunganila une papo namupela umundu ukuti apole kububine pasabata? ²⁴ Atakalongaghe ukufwana nakabonekele, lole ulongaghe mubugholofu.'' ²⁵ Bamu mubabo ukufuma ku Yelusalemu bakati, ''Taweuyu yuyo bakalondagha ukumughogha? ²⁶ Tesha, akuyugha pabwelu, sona batakuyugha nachimo kukwake. Shitangabombiwa ukuti abalongoshi naloli bamanye ishakuti wi Kilisitu, shingabombiwa? ²⁷ Po lole tushimenye kuko uyu akafumila. Lole linga u Kilisitu akwisa, nayumo akutya pakumanya kuko akufumila.'' ²⁸ Po u Yesu akakolela ngani mukati mutempeli, ukumanyisha sona nukuti, ''Umwe mweshiu mumenye une sona kuko ifumile. Indisite panimwene, lole yuyo andumite une babwanaloli, sona mutamumenye yuyo. ²⁹ Imumenye yuyo papo ingafuma kuyuyo sona weyo akanduma une.'' ³⁰ Bakalondesha ukuti bamupinye yuyo, lole nayumo akabika akakono pa yuyo papo akabalilo kake kakaba kakali ukufika. ³¹ Lole abingi muchilundilo bakasubila mumwake, sona bakati, ''Linga u Kilisitu isa, ka akwisa ukubomba imanyikisho ifyingi ukukinda pa uyu fifyo akubomba?'' ³² Abafalisayi bakapulika ichilundilo chikuteketa ifindu ifyakukwafyania nu Yesu, po abaputi abosongo nabafalisayi bakatuma abalongoshi ukuti baye bamukole. ³³ Po u Yesu akati, ''Ingali indi numwe pakabalilo akapimba, po sona ngubuka ku yuyo akanduma une. ³⁴ Mukwisa ukundonda une lole mutakwisa ukunyagha; kuko nguya, mutakwisa ukwisako.'' ³⁵ Po aba Yuda bakayughisania pabene, ''Umundu uyu akwisa ukuya kughu kuko tatukamwaghe? Ka akwisa ukuya kubabo banyambanite mukati muba Giliki nukubamanyisha aba Giliki? ³⁶ Ka lishu liki lilyo akuti, 'Mukwisa ukundonda une lole mutakwisa ukunyagha; kuko nguya, mutakwisa ukwisako'?'' ³⁷ Po pishiku ilya bumalilo, ishuiku ilikulu ilya lusekelo, u Yesu akima sona akakolela ngani, akati, ''Linga yumo ali ninyota, muleke ise kukwangu ukuti ang'we. ³⁸ Kuyuyo akusubila mumwangu, isa mumwo amasimbo ghakuyughila, isoko sha mishi ghabwumi shikwisa pakufuma mulufukwe,'' ³⁹ Lole akayugha isha kufwana numbepo, kubabo bakusubila mumwake bakwisa pakupokela; umbepo akali ukupeghiwa papo u Yesu akali ukukweshiwa. ⁴⁰ Bamu muchilundilo, babo bakapulika amashu ghaghagha, bakati, ''Uyu naloli mukunguluka.'' ⁴¹ Bamu bakati, ''Uyu wi Kilisitu.'' Lole bamu bakati, ''Ka u Kilisitu angafumila mu Galileya? ⁴² Amasimbo ghatayughite ukuti u Kilisitu ukuya ukufuma muluko ulwa Deveti sona mu Betelehemu, mukaya kako u Deveti akaba?'' ⁴³ Pakisa paba ukughabingana mukati muchilundilo chifukwa cha yuyo. ⁴⁴ Bamu mubabo bakatingi bamukole, lole nayumo yuyo akabika akakono pa yuyo. ⁴⁵ Po abalongoshi bakanyokela sona ku baputi abosongo naku bafalisayi, babo bakayugha kukwabo, ''Choni chicho mutisa nawe kuno?'' ⁴⁶ Abalongoshi bakamula, ''Nayumo yuyo ayughitepo isa shishishi.'' ⁴⁷ Po abafalisayi bakabamula, ''Numwe sona mwashimbuliwa? ⁴⁸ Pali yumo ubawalongoshi yuyo asubalile mwa yuyo, pamu yumo uwa bafalisayi? ⁴⁹ Lole ichilundilo ichi chicho chitamenye indaghilo, chighuniwe.'' ⁵⁰ U Nikodemu (uwabamu aba falisayi, yuyo akisa kukwake pabwandilo) akati kukwabo, ⁵¹ ''Ka indghilo shitu shikulonga umundu bwo bakali batapulikite ukufuma kukwake nukishita kumanya chicho akubomba?'' ⁵² Bakamula nukuti kukwake, ''Ka nuweshe wewa ku Galileya? Londesha nukutesha ukuti nayumo umukungulukia yuyo akwisa ukufumila mu Galileya.'' ⁵³ Po weshi akabuka kunyumba yake.