¹ U Yesu akaya kwighamba ilya Oliva. ² Pangelo kubuche akisa sona mutempheli, sona abandu boshi bakisa; akisa ikala pase sona nukubamanyisha babo. ³ Abasimbi na bafalisayi bakisa numukolo yuyo akaloba. Bakamwikasha pakati. ⁴ Bakati kukwake, ''Mumanyishi, umukolo uyu akoliwa kubo malaya. ⁵ Po palulaghilo, u Mose akalaghila utwe ukulasa namabwe abandu isa abo; uwe kutiki nawe?'' ⁶ Bakayugha ishi ukuti bamuteghe akapingo ukuti bamwaghe nachochimo icha kumusushikikisha ukufwana nawe, lole u Yesu akafughamila pase sona akasimba pase nakafingwi. ⁷ Bwo babukilila ukumubushikisha umwene amabusho, akimilila sona nukubabusha, ''Yuyo pakati pinyu linga atanimbibi, leka abe babwandilo pakumulasa yuyo.'' ⁸ Akisa apetamila sona pase, sona nukusimba pase nakafingwi. ⁹ Bwo bapulika, bakanda ukufuma yumoyum, ukwandila abosongo. Pabumalilo u Yesu akashala mwene, numukolo yuyo akikala pakati. ¹⁰ U Yesu akimilila sona nukuti kukwake, ''Mukolo, bali koki abakushusha bako? Alipo yuyo akulonga uwe?'' ¹¹ Akati, ''Nayumo yumo, Malafyale.'' U bYesu akati, ''Nune ndakukususha uwe. bukagha sona utakabombe imbibi.''] ¹² U Yesu akayugha sona kukwabo, akati, ''Une ne bwelu bwa chisu; yuyo akungonga une atakwisa ukwenda muchisi lole akwisa ukuba nubwelu bwa bwumi.'' ¹³ Abafalisayi bakati kukwake, ''Ukwishimikisha pa wimwene; ulushimikisho lwako talwanaloli.'' ¹⁴ U Yesu akamula nukuti kukwabo, ''Napo bule ingushimikisha panimwene, ulushimikisho lwanga lwanaloli. Une imenye kuko ngafumila nako nguya. Lole umwe mutamenye kuko ingafumila nako nguya. ¹⁵ Mukulonga ukufwana numubili; une ndakulonga nayumo. ¹⁶ Pope linga nalonga, ubulongi bwangu bwanaloli papo indali nimwene, lole indi nu Tata yuyo akanduma une. ¹⁷ Inga, sona mululaghilo lwinyu shisimbiwe ukuti ulushimikisho lwa bandu babili lwa naloli. ¹⁸ Une ngwishimikisha pa fya une nimwene, sona u Tata yuyo akanduma une ukushimikisha isha une.'' ¹⁹ Bakati kukwake, ''Ka u Tata wako ali kughu?'' U Yesu akamula, ''Mutamenye une nu Tata wangu, pala mwamenye une, ngali mumumenye u Tata wangu wepe.'' ²⁰ Akayugha amashu agha mubusunga ichuma bwo akumanyisha mu tempheli, sona nayumo yuyo akamupinya papo akabalilo kake kakaba kakali ukufika. ²¹ Po akati sona kukwabo, ''Ingufumapo; mukwisa ukundonda une sona mukwisa ukufwa mumbibi shinyu. Kuko inguya, mutangisako.'' ²² Abayuda bakati, ''Akwisa pakwighogha? Chocho chobene akuti, 'Kuko inguya mutangisako'?'' ²³ U Yesu akati kukwabo, ''Mufumile pase; une ifumile pamwanya. Mwe bamuchisu ichi; une tane wamuchisu ichi. ²⁴ Po apa, isa kukwinyu ukuti mukwisa ukufwila mumbibi shinyu. Pene papo mwasubila ukuti NENE, mukwisa ukufwila mumbibi shinyu.'' ²⁵ Po apa bakati kuyuyo, ''We wini uwe?'' UYesu akati kukwabo, ''Chicho injughite ku umwe ukufuma kubwandilo. ²⁶ Ifindu ifyingi ifyakuyugha sona pakulonga isha umwe. Po bule, yuyo akanduma une wanaloli; sona nifindu fifyo ingapulika ukufuma kukwake, ifind ifi ingayugha ku chisu.'' ²⁷ Batakashaghania ukuti akayugha kukwabo isha Tata. ²⁸ U Yesu akati, ''Po linga mwamunyamusha u Mwana Mundu, po mukwisa ukumanya ukuti NENE, sona indakubomba nachimo panimwene. Isa mumwo u Tata amanyishile une, inguyugha ifindu ifi. ²⁹ Yuyo akanduma une ali nune, sona atandekite nimwene, papio ingubomba bwila chicho chikumuhobosha yuyo.'' ³⁰ Bwo u Yesu akuyugha ifindu ifi, abingi bakasubila mu yuyo. ³¹ U Yesu akati ku bayuda babo bakasubila muyuyo, ''Linga mwikala mumashu ghangu, po mwebafundiwa bangu abanaloli; ³² sona mukwisa ukumanya ubwanaloli, sona ubwanaloli bukwisa ukubabula umwe.'' ³³ Bakamwamula yuyo, ''Twe baluko lwa Abulahamu sona tatwe babomba mbombo bayumo; po ungayugha bule, Mukwisa ukuba babuke'?'' ³⁴ U Yesu akabamula, ''Naloli, naloli, inguti kukwinyu, weshi yuyo akubomba imbibi mubombi wa mbibi. ³⁵ Ubambombo atakwikala munyumba bwila bwila; u mwana weyo wakwikala bwila nabwila. ³⁶ Po apa, linga u Mwana ababula umwe, naloli mukwisa ukwabuliwa. ³⁷ Ishimenye ukuti mwewa muluko lwa Abulahamu; mukulonda ukungogha une papo amashu ghangu ghata nubuyo. ³⁸ Inguyugha chicho nachitesha nu Tata wangu, sona numwe mukubomba chicho mwapulika ukufuma kwa tata winyu.'' ³⁹ Bakamwamula sona nukuti kukwake, ''U tata witu wi Abulahamu.'' U Yesu akati kukwabo, ''Linga mukabanga mwe bana wa Abulahamu, ngali mukubomba imbombo isha Abulahamu. ⁴⁰ Lole, apa mukulonda ukungogha une, umundu yuyo akababusha umwe ubwanaloli fifyo napulika ukufuma kwa Chala. U Abulahamu atakabomba ifi. ⁴¹ Mukubomba imbombo isha tata winyu.'' Bakati kukwake, ''Tutakapapiwa mubwomalaya; tuli nu Tata yumuyuwene: u Chala.'' ⁴² U Yesu akati kukwabo, ''Linga u Chala akaba wi Tata winyu ngali ngali munganite une, papo ifumile kwa Chala sona une indi panu; pamu indisite nimwene, lole akanduma une. ⁴³ Choni chicho mutakupulikisha amashu ghangu? Chocho chowene mutangapulika amashu ghangu. ⁴⁴ Mwe ba kwa tata winyu, umubibi, sona mukulonda ukubomba ubwighane bwa tata winyu. Akaba mughoghi ukufuma ko kubwandilo sona atakwimilila mubwanaloli papo mute ubwanaloli mumwake. Linga ayugha ubumyashi, akuyugha ukufumila kuyuyo papo mumyashi sona wi tata wa bamyashi. ⁴⁵ Lole, papo inguyugha ubwanaloli, mutakusubila une. ⁴⁶ Wini yuyo mwa umwe anganyagha ni mbibi? Linga nguyugha ubwanaloli, choni chicho mutakusubila une? ⁴⁷ Yuyo yo wa Chala akupulika amashu gha Chala; mutakupulika umwe papo tamwe wa Chala.'' ⁴⁸ Abayuda bakamwamula sona nukuti kukwake, ''Tutakuyugha ubwanaloli ukuti uwe we Musamaliya sona uli nimbepo imbibi?'' ⁴⁹ U Yesu akamula, ''Inda ni mbepo imbibi, lole ingumughindika u Tata wangu, sona mutakughindika une. ⁵⁰ Indakulonda amapalo ghangu; alipo yumuyuwene yuyo akulonda sona nukulonga. ⁵¹ Naloli, naloli, ingubabusha umwe, linga weshi yuyo akusunga amashu ghangu, atakwisa ukubutesha ubufwe.'' ⁵² Abayuda bakati kukwake, ''Apa twamanya ukuti uli nimbepo imbibi. U Abulahamu sona nabakunguluka bakafwa; lole uwe ukuti, 'Linga weshi yuyo akusunga amashu ghangu, atakwisa ukubutesha ubufwe.' ⁵³ Utawemukulu ukukinda u tata witu u Abulahamu yuyo akafwa, we mukulu? Abakunguluka bope bakafwa. Uwe ukwipela ukuba we wini pawimwene?'' ⁵⁴ U Yesu akamula, ''Linga ingwipala nimwene, amapalo ghangu ghakushita nachimo; wi Tata yuyo akumbala une--pa yuyo mukuyugha ukuti wi Chala winyu. ⁵⁵ Mutamumenye yuyo, lole une imumenye yuyo. Linga ningati, 'Une indamumenye yuyo,' Bwo indimbe isa mwemwe, ubumyashi. Po bule, une imumenye sona ingusunga amashu ghake. ⁵⁶ U tata winyu u Abulahamu akasekela pakutesha ishiku lyangu; Akatesha sona akahoboka.'' ⁵⁷ Abayuda bakati kukwake, ''Utafikite ifyinja fifite uwe, sona uwe ukuti wamutesha u Abulahamu?'' ⁵⁸ U Yesu akati kukwabo, ''Naloli, naloli, ingubabula umwe, bwo u Abulahamu ataliko, UNE ngabako.'' ⁵⁹ Pobakaseba amabwe nukumulasa yuyo, lole u Yesu pamwene akimama sona nukufumamwo mutempheli.