¹ Panyuma pa ifi kukaba ulusekelo ulwa wa Yuda, sona u Yesu akakwela ku Yelusamu. ² Po mu Yelusalemu palupaso lwa bonang'oshi kukaba ichishiwa, chicho mu Chialamayiki chikwitishiwa Betesida, sona chikaba nutusalde fayive. ³ Ubwingi bwa bandu babo bakaba babine, babo batakateshanga, abalemale, pamu abamambombo bakaghonagha kulakula. ⁴ Pakuti ubandumi wa Malafyale akabuka pase nukukologhania amishi pakabalilo kamu sona yuyo akanya amishi akapolagha ku mbina yoshi yiyo akabinagha. ⁵ Umundu yumo akaba kulakula yuyo akabinagha kufyinja sate eyiti. ⁶ Mwo u Yesu amutesha aghonite kulakula, sona mwo ashaghania ukuti akaba kulakula akabalilo akatali, akayugha kukwake ukuti, ''Kulonda ukuti ube akisa?'' ⁷ Umubine yuyla akamwamula ukuti, ''Songo, ndakaba nawe nayumo uwakuti angambika muchishiwa mumwo bakukologhania amishi. Mwo nisa, umunine ingagha atwibitemwo une ngali.'' ⁸ U Yesu akati kukwake, ''Nyamuka egha ichinyasi chako, nukwenda.'' ⁹ Papo napapo umundu yula akapola, sona akegha ichinyasi chake nukwanda kukwenda. Ishiku lila likaba lya sabata. ¹⁰ Po aba Yuda bakayugha kukwake kuyuyo akaposhiwa, ''Lishiku lya sabata sona litabaghile ukunyamula ichinyasi chako.'' ¹¹ Akamula ukuti, ''Yuyo akambangisha ukuba akisa weyo akambusha une ukuti, 'Nyamula ichinyasi chako nukwenda.''' ¹² Bakamubushikisha bakati, ''Wini yuyo umundu yuyo akakubusha uwe ukuti, 'Nyamula sona wendaghe'?'' ¹³ Po lole, yuyo akaposhiwa atakamanyagha ukuti kali wini papo u Yesu akabuka umwa chimyemye, pakuti kukaba ichilundilo kubuyo bula. ¹⁴ Mwopendapo, u Yesu akamwagha mutempheli nukuyugha kukwake ukuti, ''Tesha, apa uli akisa! Manye unangaghe sona, ukuti fimo ifibibi fitakakuchitikilaghe uwe.'' ¹⁵ Umundu yula akabuka nukuya pakuyugha kuba Yuda ukuti wi Yesu yuyo apangishishe ukuba akisa. ¹⁶ Po pachifukwa cha findu ifi aba Yuda bakamunyasha u Yesu, papo akabomba ifindu ifi pishiku ilya sabata. ¹⁷ U Yesu akabamula ukuti, ''U Tata wangu akubomba nulu bubu, sona nune, ingubomba.'' ¹⁸ Pachifukwa cha ishi, aba Yuda bakinong'ona ukuti bamughoghe papo atakakomania ishiku ilya sabata lyene, lole sona akitisha u Chala ukuti wi Tata wake, akapangisha ukufyana umwene nu Chala. ¹⁹ U Yesu akabamula ukuti, ''Naloli, naloli, u Mwana atangabomba nachimo pamwene, Pene papo atesha u Tata wake fifyo akubombagha, pakuti fyoshi fifyo u Tata akubomba, u Mwana akubomba musila yila yila. ²⁰ Pakuti u Tata aghanite u Mwana sona akamusondela fyoshi fifyo akubombagha mwene, sona tise akamusondele ifindu ifikulu ingani ukulusha ifi ukuti timukabe bakuswigha ingani. ²¹ Pakuti u Tata akushusha abafwe sona akupa ubwumi, po sona u Mwana akupa ubwumi kuweshi yuyo angighana. ²² Pakuti u Tata atakolonga nayumo, lole akupa ubulongi bwoshi ku Mwana ²³ ukuti weshi akamughindike isa mumwo bakughindikila u Tata. Yuyo atakughindika u Mwana atakughindika u Tata yuyo amutumite. ²⁴ Naloli, naloli, yuyo akupulikisha amashu ghangu sona nukumusubila yuyo andumite une ali nubwumi bwa bwila nabwila sona takakaniwe, lole apululila ukufuma kubufwe ukuya kubwumi. ²⁵ Naloli, naloli, ingubabula umwe akabalilo kakwisa, sona lwolululu, po abafwe bakuya pakupulika amashu agha Mwana wa Chala, sona boshi babo bakupulika bakuya pakuba nubwumi. ²⁶ Pakuti isa mumwo u Tata ali nubwumi pamwene, po sona akupa u Mwana ukuti sona u Mwana abe nubwumi pamwene, ²⁷ sona u Tata akupa u Mwana ululaghilo lwakuti alongaghe papo Mwana wa Mundu. ²⁸ Mutakaswighaghe nishi, pakuti kuli akabalilo kokakwisa kako weshi yuyo ali mumapumba akuya pakupulika amashu ghake ²⁹ sona bakuya pakufumamwo: boshi babo babombite ifyisa pakushuka kubwumi, sona boshi babo babombite ifibibi pakushuka kwa kulongiwa. ³⁰ Indangabomba nachimo kunimwene. Isa mumwo ngupulikila, ngulonga, sona ukulonga kwangu kugholofu papo ndakolonda ubwighane bwangu nimwene lole ubwighane bwa yuyo andumite une. ³¹ Linga ningashimikisha nimwene, shimenye ukuti ulushimikisho lwangu talukabe lwakulondiwa. ³² Kuli yumo yuyo ashimikisha ifya une, sona ingumanya ukuti ulushimikisho lulwo akumbanga une lukubanga lwanaloli. ³³ Umwe mukatuma kwa Yohani, sona akashimikisha ubwanaloli. ³⁴ Lole ulushimikisho lulwo ingambilila twalwakufuma kumundu hagha. Inguyugha ifindu ifi ukuti umwe mungaye muposhiwe. ³⁵ U Yohani akaba nyale yiyo yikakagha nukubala, sona mukitishanga ukusekela kubwelu bwake panandi. ³⁶ Lole ulushimikishu lulwo indinalo lukulupo ukulusha u Yohani, pakuti imbombo yiyo u Tata ambile ukuti ingwanilishe, yoyo mbombo ngubomba, kushimikisha kwangu ukuti u Tata akanduma une. ³⁷ U Tata yuyo akanduma une pamwene akashimikisha ifya une. Amashu ghake mutangaghapulika pamu ukutesha akabonekele kake pakabalilo kalikoshi. ³⁸ Mutanamashu ghake aghakushala mwa umwe, pakuti mutakusubila mu uyu yuyo akamutuma. ³⁹ Mukasaka amashu papo mukwinong'ona ukuti mumwabo muli ubwumi bwabwila nabwila, sona mumashu ghamughene agha ghakushimikisha isha une, ⁴⁰ sona mutighanite ukwisa kwa une ukuti mungaba nubwumi. ⁴¹ Indakwambilila ulughindiko kubandu, ⁴² lole ingumanya ukuti muta ulughano lwa Chala mwa umwe. ⁴³ Une ingisa mungamu ya Tata wangu, lole mutakunyambilila hagha. Linga yumo angisa mungamu yake, mungamwambilila. ⁴⁴ Mungasubila buleghe, yuyo akwitika ulughindiko ukufuma kumunine lole atakulonda ulughindiko lulwo lufumite kwa Chala mwene? ⁴⁵ Mutakinong'onaghe ukuti une nemwene nguya pakubashusha pandashi pa Tata. Yuyo akuya pakubashusha umwene wi Mose, yuyo mukamusubilagha. ⁴⁶ Linga mukasubila u Mose, timukasubile une, papo akasimba ifya une. ⁴⁷ Linga mutakasubila fifyo akasimba, po mungasubila buleghe amashu ghangu?''