¹ Po u Pilato akamwegha u Yesu nukumuchapula. ² Abasilikali bakaluka ingata iya myifwa. Bakafwasha kumutu wa Yesu nukumufwasha umuselekesha wa pepo. ³ Bakisa kukwake nukuyugha ukuti, ''Ulughindiko, kwa Malafyale waba Yuda!'' po bakamukoma namapi. ⁴ Po u Pilato akafumila kuse sona nukuyugha nabo ukuti, ''Tesha, ingufuma nawe kuse kwa umwe ukuti mumanye ukuti indakwaghamo ichifukwa nachimo mumwake.'' ⁵ Po u Yesu akafuma kuse, afwalite ingata iya myifwa numuselekesha wa pepo. u Pilato akayugha kukwake ukuti, ''Tesha, uyu weyo mundu uyu!'' ⁶ Mwo abaputi abosongo nabasilikali bamutesha u Yesu, bakakolela nukuyugha ukuti, ''Akomeliwe, akomeliwe!'' u Pilato akayugha kukwabo ukuti, ''Mweghe mwibene nukumukomela pakuti indakwaghamo ichifukwa nachimo mumwake.'' ⁷ Abayuda bakamwamula ukuti, ''Tuli nululaghilo, sona ukukwafania nululaghilo lulalula abaghile ukufwa papo akayughagha ukuti Mwana wa Chala.'' ⁸ Mwo u Pilato apulika amashu agha, akaba nubwogha ingani, ⁹ akingila sona munyumba iya boma nukuyugha kwa Yesu ukuti, ''ukufumila kughu uwe?'' Lole u Yesu atakamwamula. ¹⁰ U Pilato akayugha kukwake ukuti, ''Utakuyugha kwa une? Utakumanya ukuti ndinululaghilo ukukwabula uwe, sona nululaghilo lwa kukukomelela uwe?'' ¹¹ U Yesu akamwamula akati, ''Utali nululaghilo nalumo kwa une ukulusha mwene yuyo akakupa ukufuma kumwanya. Popapo sona, yuyo akamba une ukulusha uwe ali nimbibi ingulu.'' ¹² Pakwamulauku, u Pilato akaghela ukumwabula, lole Abayuda bakakolela, nukuyugha ukuti, ''Linga wamwabula umundu uyu, koti mwo tawemukamu wa Kesali. Weshi yuyo akwipangisha mwene ubwo Malafyale akuyugha akususania nu Kesali.'' ¹³ Mwo u Pilato apulika amashu agha, akamufumya u Yesu kuse nukwikala pase pachikalilo chakulongelapo mubuyo bubwo bukitishiwanga ''Pavimenthi,'' lole munjugha ya Chihebeli bakatingi ''Gabata.'' ¹⁴ Po likaba lishiku ilya kusengania kwa Pasaka, akabalilo akapamusi. U Pilato akayugha nuba Yuda ukuti, ''Tesha, uyu weyo wi Malafyale winyu!'' ¹⁵ Bakakolela ukuti, ''Mutishepo, mutishepo; mukomele!'' U Pilato akayugha kukwabo ukuti, ''Timukomele u Malafyale winyu?'' Abosongo bakamwamula ukuti, ''U Malafyale tutanawe nayumo lole u Kesali.'' ¹⁶ Po u Pilato akapeleka u Yesu kukwabo ukuti bamukomele. ¹⁷ Po bakamwegha u Yesu, nukufuma nawe kuse, nukunyamula ichipinjika chake, ukuya nacho kubuyo bubwo bukitishiwanga ''Buyo bwalifupa lya mutu,'' lilyo pachi Hebeli chikwitishiwa ''Gologota.'' ¹⁸ Bakamukomela u Yesu palapala, sona nabanine bamu babili, yumo kukashomi umunine kukamwisa, u Yesu pakati. ¹⁹ U Pilato akasimba ichimanyikisho nukubika pamwanya pachipinyika. Po pakasimbiwa ukuti: YESU WA KU NAZALETI, UMALAFYALE WA BA YUDA. ²⁰ Abingi aba Yuda bakabelenga ichimanyishikisho papo ubuyo bubwo u Yesu akakomeliwa kukaba kupipi na mukaya. Ichimanyishikisho chikasimbiwa muchi Hebeli, Latini, sona muchi Giliki. ²¹ Po umuputi usongo uwa chi Yuda akayugha kwa Pilato, ''Manye usimbaghe, 'Malafyale waba Yuda,' lole uyu akayughagha ukuti, ''Ne Malafyale wa ba Yuda.""' ²² U Pilato akamula, ''Fifyo nasimba nasimba.'' ²³ Mwo abasilikali bamukomela u Yesu, bakegfha imyenda yake, bakayighabania pa folo, weshi akegfha ichake ichake; pamupene niselekesha. Bakayinyepula ukwandila pamwanya. ²⁴ Po bakayughisania, ''Sa manye tunyepule, lole mubuyo bwake satupele amayele pa ichi ukuti chibe cha wini.'' Ichi chikabombiwa ukuti amasimbo ghakwanilishiwe ghagho ghakati, ''Bakaghabania imyenda yake pakati pabo sona nukupela amayele agha mwenda yane.'' Ishi shosho abasilikali bakabomba. ²⁵ Apa ukwimilila pambali pa mbinjika ya Yesu pakaba amama wake, nubamwabo wa mama wake, u Maliya umukashi wa Kulopasi, nu Maliya Magadalena. ²⁶ Mwo u Yesu amutesha u mama wake numufundiwa yuyo akamughana ingani imilile papipi, akayugha kwa mama wake ukuti, ''Mukolo, tesha, umwana wako!'' ²⁷ Po akayugha ku mufundiwa, ''Tesha, umama wako!'' Pakufuma pakabalilo kalakala umufundiwa akamwegha nukubuka nawe kunyumba yake. ²⁸ Pakufuma apa, mwo ashimanya ukuti fyoshi fyamala sona ukuti fifyo fikasimbiwa fikuya pakukwanilishiwa, u Yesu akayugha ukuti, "Indininyota.'' ²⁹ Ichikopo chicho chiswile ni vinyo ya kululayikabikiwa palapala, po bakabika isipanji yiyo yiswile nivinyonpa ngomo nukubika pamulomo wake. ³⁰ Mwo u Yesu ang'a ivinyo ilyakulula, akati, ''Kwashila.'' Akasendamika umutu wake pase sona nukufwa. ³¹ Po aba Yuda, pakuti likaba lushiku ilya kusengania, sona po imibili yitakaba yakuti yibe pambinjika pishiku lya sabata (papo isabata likaba lyapamwanya), Bakamusuma u Pilato ukuti bamenyule ifilundi fyabo sona nukubafumyapo. ³² Po abasilikali bakisa nukumenyula ifilundi ifya mundu wabwandilo sona numundu uwabubili babo bakakomeliwa pamupene nu Yesu. ³³ Bwo bisa kwa Yesu, bakaghe afwile kale, po batamenyula ifilundi fyake. ³⁴ Po lole, yumo ubasilikali akamulasa ningwegho palubafu, po papo napapo ibanda namishi fikafuma. ³⁵ Yumuyuwene yuyo akatesha ishi akashimikisha, sona ulushimikisho lwake lwanaloli. Akamanya ukuti fifyo akayugha fyanaloli po ukuti nuwe usuwile. ³⁶ Papo ifindu ifi fikabombiwa ukuti amasimbo ghakwanilishiwe, ''Nalimulyene ku mafupa ghake likwisa ukumenyuka.'' ³⁷ Sona, isimbo ilingi likuti, ''Bakwisa ukumutesha pa yuyo bakamulasa.'' ³⁸ Bwo ifindu ifi fyakinda, u Yosefe uwa ku Alimateya, pakuti akaba mufundiwa wa Yesu (lole kubushifu papo akoghopagha abayuda), akamusuma u Pilato linga angafumyapo umubili wa Yesu. U Pilato akamwitikisha. Po u Yosefe akisa nukufumyapo umubili wake. ³⁹ Nu Nikodemasi wepe akisa, yuyo akaba babwandilo ukwisa kwa Yesu pabushiku. Akisa namafuta aghakongania u mili nu aloyi, aghakukwana amalita handiledi. ⁴⁰ Po akegha umili wa Yesu nukughunyenga numyenda pamupene namafuta aghakuningila, isa mumwo umwiko waba Yuda ghakabela pakushila umubili. ⁴¹ Kubuyo kuko bakamukomelela kukaba umughunda; sona mumughunda mukabe ipumba ipya lilyo batakashililamo. ⁴² Pakuti likaba lishiku ilya kusengania abaYuda sona ipumba likaba papipi, bakamubikamo u Yesu.