¹ Po pangelo pishiku lya bwandilo ilya sabata, mwo kukala kuli ichisi, u Maliya Magadalena akabuka kwibumba akatesha ibwe lishombukitepo pipumba. ² Po akakinda akaya kwa Simoni Peteli numufundiwa umunine yuyo u Yesu akamughana akabusha ukuti, ''Beghitemo u Malafyale ukufuma mwi pumba, tutakumanya kuko wamubikite.'' ³ Po u Peteli nabafundiwa abanine bakanyamuka, sona bakabukagha kwipumba. ⁴ Boshi bakakindagha pamupene, umufundiwa yumo akakinda lubilo ukumupota u Peteli, sona weyo akandila ukufika kwipumba. ⁵ Po akinamila pase, akatesha utumyenda utwelu palapala, lole atakingila mukati. ⁶ Po u Simoni Peteli akafika nukwingila mwipumba. Akagfha imyenda iyakunyikisila yighonite palapala ⁷ numwenda ghugho ghukaba kumutu wake. Ghutakaba pamupene nimwenda iyakunyikisila lole ghukapetiukiwa pambafu pawene. ⁸ Po umufundiwa uyungi, yuyo akatala ukufika pipumba, wepe akingila, akatesha nukusubila. ⁹ Pakuti mupaka akabalilo kalakala bakaba bakali pakumanya amasimbo aghakuti akwenela ukushuka kubufwe. ¹⁰ Po abafundiwa bakanyokela sona kukaya. ¹¹ Lole u Maliya akimilila kuse kwipumba akalilagha. Mwo akulila, akinamila pase mwipumba. ¹² Akatesha abangelo babili mufyelu bikile, yumo kumutu, yumo kufilundi po umubili wa Yesu ghukaghonekiwa. ¹³ Bakamula bakati, ''We mukolo, koni ukulila?'' Akababusha akati, ''Chifukwa beghite u Malafyale wangu, sona indakumanya kuko bamubikite.'' ¹⁴ Mwo ayugha ifi, akang'anamuka nukumutesha u Yesu imilile palapala, lole atamanya ukuti wi Yesu. ¹⁵ U Yesu akati kukwake, ''We mukolo, kulilaki? kumulonda wini?'' Akinong'ona ukuti akaba mulimi, po akati, ''Songo nandi wewe umweghite, mbushe kuko umubikite, tiye imweghe." ¹⁶ U Yesu akamula akati, ''Maliya.'' Akang'anamuka, akamubusha muchi Alamayika, akati, ''Laboni''(cho chikung'anamula ''Mumanyishi''). ¹⁷ U Yesu akamubusha akati, ''Koma ukungwafya, pakuti ingali ndabukite kwa Tata, lole bukagha ku bowamwitu nukubabusha ukuti tingabuke kumwanya kwa Tata nu Tata winyu, sona u Chala wangu nu Chala winyu.'' ¹⁸ U Maliya Magadalena akabuka nukubabusha abafundiwa akati, ''Namutesha u Malafyale,'' po akababusha fyoshi fifyo u Malafyale akamubusha. ¹⁹ Ilya namasuba pishiku lilalila, ishiku ilya bwandilo ilya sabata, ifyighi fikighaliliwa abafundiwa bakoghopagha abayuda, u Yesu akisa akimilila pakati pawo akababusha akati, ''Ulutengano luwe numwe.'' ²⁰ Mwo ayugha ifi, akababonesha inyobe shake nimbafu shake. Abafundiwa bakahoboka mwo bamutesha u Malafyale. ²¹ Po u Yesu akababula sona akati, ''Ulutengano luwe numwe. Isa mumwo u Tata akandumila, po nune ingubatuma.'' ²² Mwo u Yesu ayugha ifi, akabeshelela akababusha akati, ''Pokela u mbepo mbikemo. ²³ Weshi yuyo mukumuhobokela imbibi, tishikahobokeliwe; weshi yuyo mutamuhobokela shitakuya pakuhowokeliwa. ²⁴ U Tomasi, ubamu wala twelovu, yuyo akitishiwanga Didimasi, atakaba nawo po u Yesu akisa. ²⁵ Abafundiwa abangi bakamubusha pandashi pake bakati, ''Twamutesha u Malafyale.'' Ababusha akati, ''Penepapo natesha inyobe shake namo bakamukomelela nimisumali, nukubika utwobe mumabala gha misumali, inda subalile.'' ²⁶ Mwo pakinda amashiku eyiti abafundiwa bakaba mukati sona, u Tomasi akaba nabo. U Yesu akisa mwo ifyighi fyighaliwe, akimilila pakati pabo akati, ''Ulutengano luwe numwe.'' ²⁷ Po akamubula u Tomasi akati, ''Sanakalyobekako tesha utukono twangu. Gholosha akakono kako nukubika mumbafu shangu. Manye ube wakishita lusubilo, lole subila.'' ²⁸ U Tomasi akamwamula akati, ''Malafyale wangu Chala wangu.'' ²⁹ U Yesu akamubusha akati, ''Chifukwa wambona une, wasubila. basayiwa bobala babo batateshishe, sona bakusubila.'' ³⁰ Po u Yesu akabomba ifindu ifyingi ifinine pakati pabafundiwa, fifyo fitalembiwe mubuku ili, ³¹ lole ifi fisimbiwe ukuti musubile ukuti u Yesu wi Kilisitu, u Mwana wa Chala, sona nukuti pakusubila, mungaba nu bwumi mungamu yake.