¹ Mwo u Yesu ayugha shishishi, akinula kumwanya amaso ghake sona akati, ''Tata, akabalilo kafika, chindika u Mana wako ukuti u Mwana akughindike uwe--- ² isa mumwo akamupela ubulaghili kufyoshi ifya bwumi ukuti ingabapa ubwumi ubw bwila nabwila ku bosghi babo amupile yuyo. ³ Ubu bwo bwumi bwa bwila nabwila: abakuti bakumenye uwe, mwene u Chala uwanaloli, sona nayuyo bamutumite, u Yesu Kilisitu. ⁴ Une ngukughindika uwe pachisu. Une namala imbombo yiyo uwe wambile ukubomba. ⁵ Apa, Tata, uchindike une pamupene nuwe ubughindikiwa bubo ingaba nabo nuwe bwo ichisu chikali ukupangiwa. ⁶ Ingalifumbula ingamu yako ku bandu babo ukamba une ukufuma mu chisu. Bakaba bako, sona bakalisunga ishu lyako. ⁷ Apa bashimenye ukuti fyoshi fifyo uwe umbile une fifumite kukwako, ⁸ pakuti imbapile babo amashu ghoghi ghagho uwe ukamba une. Baghapokelite sona nubwanaloli bashimenye ukuti une ifumite kukwabo, sona basubalila ukuti wewe undumite une. ⁹ Une ngubiputila babo. Une ndakwiputila ichisu lole babo uwe umbile une, papo bo bako. ¹⁰ Fyoshi fifyo fyangu nuwe fyako, sona ifyako nune fyangu, sona une ngughindikiwa mumwako. ¹¹ Une indali sona muchisu, lole abandu aba bali muchisu, sona une ngwisa kukwako.Mwikemo Tata, basunge mungamu yako yiyo umbile une ukuti babe yumuyuwene, isapo nutwe bubu tuli yumuyuwene. ¹² Bwo ngali indinabo, ingabasunga mungamu yako, yiyo umbile une. Ingabasungilila babo, sona nayumo yuyo akaba wakukomanika, mwene yuyo u mwana uwa kukomanika, pakuti amasimbo ghake ghakukwanilishiwa. ¹³ Apa gwisa kukwako, lole nguyugha shishishiku chisu ukuti ulusekelo lwangu lukwanilishiwe mumwabo. ¹⁴ Nabapa ishu lyako, sona ichisu chababenga papo taba ku chisu, isa papo nune tane wa muchisu. ¹⁵ Une ndakukusuma uwe ukuti ubafumyemo mu chisu, lole ukuti uwe ubasungilile akisa ukufuma kumulughu. ¹⁶ Taba mu chisu, isa papo nune tane wa muchisu. ¹⁷ Upangule palubafu nubwanaloli. Ishu lyako lyabwanaloli. ¹⁸ Isa mumwo uwe ukandumila mu chisu, po nune nabatuma mu chisu. ¹⁹ Panongwa yabo nipaghula nimwene palubafu mu bwanaloli. ²⁰ Ndakwiputila pa shishishi shene, lole naboshi babo bakwisa kusubalila mumwangu ukwendela mwishu lyabo ²¹ pakuti bope boshi bakabe yumuyuwene, isa papo nuwe, Tata, uli mumwangu, sona nune indi mumwako. Bope bubu babe mumwitu ukuti ichisu chisubalile ukuti wandumite une. ²² Ubughindikiwa bubwo ukamba une, une nabapa babo, ukuti babe pamupene, isa papo nutwe mumo tubelile pamupene: ²³ Une mumwabo, sona nuwe mumwangu---ukuti bafike apakukwanilishiwa ubumubwene, ukuti ichisu chise chimanye ukuti uwe ukanduma une, sona ukuti ubaghanite babo isa mumwo unganite une. ²⁴ Tata, une ngulonda babo uwe umbile une ukuba nabo kuko une indi, sona nukutesha ubughindikiwa bwangu, ubughindikiwa bubo ukamba une papo ukangana une bwo ichisu chikali ukupeliwa. ²⁵ Mugholofu Tata, ichisu chitakukumanya uwe, lole une ingumenye uwe; sona aba bashimenye ukuti uwe ukanduma une. ²⁶ Ingapangisha ingamu lyako ukumanyikwa kukwabo, sona une itindipange ukumanyikwa ukuti ulughano lulo uwe wanganite iti lukabe mumwabo, sona nune itingabe mumwabo.''