¹ Mubwabuke bwo u Kilisitu atusatwile. Manye muyughaghe, po lole, manye mukabikiwe sona pase pa bulaghili bwa chigholigholi cha butumwa. ² Tesha, une, Paulo, nguyugha kukwinyu ukuti pala mwitikisha mwebenecho ukuti mutumuliwe, u Kilisitu ta akakabe nachimochimo mumwinyu musila yili yoshi. ³ Ngubika sona ubwokamboni kumundu wishi yo akwipa ukuti atumuliwe abaghile ukukonga indaghilo shoshi. ⁴ Mutishiweko kwa kilisitu, umwe mwe mukuya pakulongiwa mundaghilo; umwe tamukachibone lumo ichisa. ⁵ Pakwendela mwa mbepo, mulusubilo, tuli ninyota pakulindilila nulusuwilo lwa bagholofu. ⁶ Mwa kilisitu Yesu ukutumuliwa nukushita kutumuliwa kuta namaka, lole lwene ulusubilo lukubomba ukwendela mulughano. ⁷ Mukakindagha akisa, wini yuyo akabakanisha ukuti mukongaghe ubwanaloli? ⁸ Ukunyengelela kutakufuma kuyuyo akukwitisha! ^{9 10} Ichilungo ichinandi chikupela ichikonde choshi ukutukumuka. ¹⁰ Ndinulusubilo mwa malafyale ukuti manye winong'onaghe ifingi. Boshi bo bakubanyasha umwe mwe timukabukaghe pakutamiwa nubulongi, ta akakete mumwo ubelile. ¹¹ Bo wamwitu, pala ngubukilila ukulummilila isha kutumuliwa, choni cho ngali ngufwimiwa? Panongwa yiyi ukulumbilila kwa chipingika ngali kutaliko. ¹² Kubabo bobakubatangwanisha, nalondagha ukuti bifule bene! ¹³ Pakuti mwitishiwe kubwabuke, bobamwitu. Lole mutakabombele ubwake ukuba lusako kumubili; pakukinda kukinda ukubombela umunine numunine mulughano. ¹⁴ Pakuti ululaghilo lwoshi lukwanilishiwe mulishu limulyene: "Mughane abapalamani ngati mumo mwighanile mwewene." ¹⁵ Lole pala mukulumana nukulyana mwibene, muketeleshe ukuti mutakunangana mwibene. ¹⁶ Lole nguti mwene mwambepo sona mutamukanyamule ifinyenywa fyakumubili. ¹⁷ Pakuti ifinyonywa fyakumubili fili chilughu nu mbepo, sona ifinyonywa fya mbepo fili chilughu nu mubili. Pakuti ifi fikughusana ichinine nichinine, po mutangabomba ifindu fyo mukulonda. ¹⁸ Lole pala kulongoshiwa nu mbepo, mutakapashe pa ndaghilo. ¹⁹ Po lole imbombo shamuwili shoishi : ubomalaya, ukwifitisha, ukughana ifibibi, ²⁰ ukwiputa ififwani, amayele, ubukali, ukulwana, akabini, ukufulukila kwa lyoyo, ubwite, ukushita ukwipimisania, ukupaghula, ²¹ ukulondela umunyako ifibibi, ubwoching'wela, nulusekelo lyabo ching'wela, nifingi fyofiyanite nifi. Ngubasoka umwe, mumwo ngabasokela pabwandilo, pakuti boshi babo bakabomba shishishi tabakingile ku chitangala chakumwanya cha Chala. ²² Lole iseke sha imbepo yo lughano, lusekkelo,ulutengano,ukufwasa, ubwololo, ubwisa, ulwitiko, ²³ ukutenga moyo nu kwikola; pakupaghulapo ifi lutalipo sona ululaghilo. ²⁴ Bo bakaba kwa Kilisitu Yesu bobakukomeliwa umubili wabo pamupene nifinyonywa. ²⁵ Pala tukwikala mwa mbepo, isagha twendaghe mwo mwambepo. ²⁶ Isagha manye twikweshaghe, ukuyughana uwubibi umunine kumunine, ukunyonywanyonywa ifya banyitu.