¹ Nguyugha nguti ubumbyana, pakuti pakabalilo kalikoshi mwana, atapambanine nu mutumwa, napo mwenecho wa mughunda umukulu. ² Lole ali pase pabusungi nabo bakuketelesha mupaka ishiku lilyo uwise apinyite. ³ Po sona, mwo t6uli wana, tukaba batumwa ba ndaghilo sha pachisu. ⁴ Lole mwo akabalilo akenecho kafika, u Chala akatuma umwana wake, yo akapapiwa kumukolo,akapiwa pasi palulaghilo. ⁵ Akapanga ifi ukuti abaponeshe bo bakaba pase pa ndaghilo, ukuti tupokele ubusungi ngati bana. ⁶ Sona chifukwa chakuti mwe bana, u Chala akatuma mundumbula shitu umbepo wa mwana wake, yuyo akwitisha ukuti, ''Abba, kokuti Tata.'' ⁷ Po tawe mutumwa, lole mwana, sona linga we mwana, po sona we wambyana ukwendela mwa chala . ⁸ Lole pakabalilo kala, po atakamumanya uchala, ukupangiwa ukuba mutumwa kubawo ukwendela mumaka gha kukapapiwa nagho, ta to chala musila yiliyoshi. ⁹ Lole pakuti pakabalilo aka wamumanya u Chala, pamu tungati wamanyikwa nu Chala, buleghe sona wanda pakughalukila kumbepo imbiwi iya muchisu iya mwalwe mwalwe sona yitanamaka? Ukulonda ube mutumwa sona? ¹⁰ Mukukongesha amashiku numweshi umupya sona nutubalilo sona nifyiwa! ¹¹ Kubapashikisha ukuti musila yimo imbombo yungu pamupene numwe yingaba ya pabu. ¹² Ngubasuma, bowamwitu, mube ngati nene, papo nune naba ngati mwemwe. Mutanangile nachimo. ¹³ Lole maukumanya ukuti chingaba chifukwa cha pamubili chicho ngafumusha amashu amisa kukwinyu tashi. ¹⁴ Napapo umubili wangu ghukaba ngelo kukwinyu, mutakanyanyale pamu ukungana une. Mubuyo bwake mukunyambilila ngati ne wandumi wa Chala, ngati po ngaba ne Yesu kilisitu umwenecho. ¹⁵ Po amalusayo ghinu ghalikughu ulu? Papo ngushimikisha kukwinyu ukuti, linga chali chakwitikishiwa ngali mwafolobola amaso ghinu nukumbagho une. ¹⁶ Po apa, ngimba naba ne mulughu winyu papo nababula ubwanaloli? ¹⁷ Bakulonda ngani ukuti babakabe, lole batanichikwa chicho chigholokite. Bakulonda ukuti manye mwighukaghe lole mutangwanikaghe nabo. ¹⁸ Akabalilo koshi chikuba chisa ukuti mutungwanikaghe pa fundo inyisa, sona manye pabange penepo indipopamupene numwe. ¹⁹ Twana twangu, sona indi muwe mufyakubaba ngati yuyo akupapa chifukwa mupaka papo ukilisituaba mukati mumwinyu. ²⁰ Nanyoywanga ukuti indi pamupene numwe lwoshulu sona nandule akayughile, chifukwa nguyubana ni sha umwe. ²¹ Mbushe, mwemukunyoywa ukuba pase pandaghilo, mutakupulikisha ku ndaghilo? ²² Papo shisimbiwe ukuti u Abulahamu akaba nabana abalumyana babili, yumo akaba wa mukolo umutumwa po uyungi mumukolo umwabuke. ²³ Yumo akapapiwa mumukolo umutyumwa ku mubili, lole uyungi akapapiwa mumukolo umwabuke ukwendela mwilaghilo. ²⁴ Ifindu ifi fingasanushiwa ukuba chigheleshelo, papo abakolo aba bakwimilila amalaghilano mabili. Yumo yuyo akufuma pighamba lya Sinayi sona akupapa abana babo bakuba batumwa. Uyu wi hajayi. ²⁵ Po apa u Hajayi akwimilila ighamba lya Sinayi mu Alebiya; Po akwimilila u Yelusalemu wa kabalilo aka, papo ali nubutumwa na bana bake. ²⁶ Lole u Yelusalema yuyo ali kumwanya mwabuke, sona wimayi. ²⁷ Papo shisimbiwe, ''sekela , wemughumba we utakupapa; ukute nukukole nu lusekelo, uwe we utakutamiwa nubuwafu bwa kupapa; chifukwa abana bamukolo yuyo akupela ichisa bingi leka ukulusha abamukolo yuyo ali numulisha.'' ²⁸ Lole umwe, bobamwitu, ngati wi isaki, mwe bana ba lilaghano. ²⁹ Akabalilo kalakala weshi yuyo akapapiwa ukuyana na kumjubili akafwimagha yuyo akapapiwa ukufwana na kwa mbepo. Mwo shibelile nulu ³⁰ Lole ngimba amasimbo ghakuti choni? ''Mutishe abukaghe umulindu umutumwa pamupene numwana wake. Pakuti umwana wa mulindu umutumwa atakwisa ukughawana ifya pa chilingo pamupene numwana uwa mukolo umwabuke.'' ³¹ Popapo bowamwitu, tatwewana ba mulindu umutumwa, lole umukolo umwabuke.