29

¹ Nagpatuloy si Jacob sa paglalakbay sa daan, at narating niya ang lupain na nasa silangang lupain ng Canaan. ² Doon nakita niya ang isang balon sa bukid, at tatlong mga kawan ng tupa ang nakahiga malapit sa balon. Ito ang balon na kung saan kalimitan ang mga pastol ay kumukuha ng tubig para sa kanilang tupa. Mayroong malaking bato na nakatakip sa ibabaw ng balon. ³ Nang natipon doon ang lahat ng mga kawan, magtutulungan ng sama sama ang mga pastol para pagulungin ang bato palayo mula sa ibabaw ng balon at kukuha ng tubig para sa mga tupa. Pagkatapos nilang gawin iyon, ilalagay nila ulit ang bato sa ibabaw ng balon. ⁴ Noong araw na iyon, tinanong ni Jacob ang mga pastol ng mga tupa na nakaupo roon, "Saan kayo nanggaling?" Sumagot sila, "Nanggaling kami sa lungsod ng Haran." ⁵ Tinanong niya sila, "Kilala niyo ba si Laban na apo ni Nahor?" Sumagot sila, "Oo, kilala namin siya." ⁶ Tinanong sila ni Jacob, "Maayos ba ang kalagayan ni Laban?" Sumagot sila, "Oo, maayos ang kanyang kalagayan. Tingnan mo! Paparating ang kanyang anak na si Raquel kasama ang mga tupa!" ⁷ Sinabi ni Jacob, "Pero ang araw ay mataas pa. Hindi pa oras para sa mga tupa na tipunin para sa oras ng gabi. Bakit hindi ninyo bigyan ng tubig ang mga tupa at pagkatapos ibalik sila para manginain sa pastulan?" ⁸ Sumagot sila, "Hindi, hindi namin maaaring gawin iyan hanggang matipon ang lahat ng mga kawan dito at ang bato ay maalis mula sa ibabaw ng balon. Pagkatapos niyan, bibigyan namin ng tubig ang tupa." ⁹ Habang nakikipag-usap pa siya sa kanila, si Raquel ay dumating kasama ng mga tupa ng kanyang ama. Siya ang nangangalaga sa mga tupa ng kanyang ama. ¹⁰ Nang makita ni Jacob si Raquel, ang anak na babae ni Laban, na kapatid ng kanyang ina, at ang mga tupa ni Laban, lumapit siya at nag-iisang inalis ang bato na nakatakip sa ibabaw ng balon, at kumuha siya ng tubig para sa mga tupa ng kanyang tiyuhin. ¹¹ Pagkatapos hinalikan ni Jacob si Raquel sa pisngi, at napaiyak ng malakas dahil sa sobrang saya. ¹² Sinabi ni Jacob kay Raquel na siya ang isa sa mga kamag-anak ng kanyang ama, ang anak ng kanyang tiyahin na si Rebeca. Kaya tumakbo siya at sinabi niya ito sa kanyang ama.

¹³ Pagkarinig ni Laban na si Jacob, ang anak ng kanyang kapatid na babae, ay naroon, tumakbo siya para salubungin siya. Niyakap niya at hinalikan siya sa pisngi. Pagkatapos dinala niya sa kanyang tahanan, at pagkatapos sinabi ni Jacob kay Laban ang lahat ng nangyari sa kanya. ¹⁴ Pagkatapos sinabi ni Laban sa kanya, "Ikaw talaga ay bahagi ng aking pamilya!" Matapos manatili ni Jacob doon at nagtrabaho ng isang buwan para kay Laban, ¹⁵ sinabi ni Laban sa kanya, "Hindi ka dapat magtrabaho sa akin para sa wala dahil lamang sa ikaw ay aking kamag-anak! Sabihin mo sa akin kung magkano ang gusto mong ibabayad ko sa iyo." ¹⁶ Ngayon may dalawang anak na babae si Laban. Ang nakatatanda ay si Lea, at ang nakababata ay si Raquel. ¹⁷ Si Lea ay may mapupungay na mga mata, pero si Raquel ay may kaakit- akit na pangangatawan at maganda. ¹⁸ Napamahal si Jacob kay Raquel, kaya sinabi niya, "Magtatrabaho ako sa iyo ng pitong taon. Iyon ang aking magiging kabayaran sa pagpayag mo na pakasalan ko ang iyong nakababatang anak, na si Raquel." ¹⁹ Sumagot si Laban, "Mas mabuti para sa akin na ibigay siya sa iyo para pakasalan siya kaysa makapag-asawa siya ng ibang lalaki! Kailangang manatili ka rito kasama namin." ²⁰ Kaya nagtrabaho si Jacob kay Laban ng pitong taon para makuha si Raquel, pero para sa kanya ito ay parang ilang araw lamang, dahil siya ay minahal niya nang labis.

²¹ Matapos ang pitong taon, sinabi ni Jacob kay Laban, "Hayaan mong pakasalan ko si Raquel ngayon, dahil ang panahon na ating sinang-ayunan para sa akin na magtrabaho sa iyo ay natapos na, at gusto kong pakasalan siya." ²² Kaya tinipon ni Laban ang lahat ng mga tao na naninirahan sa lugar na iyon at nagdaos ng kapistahan. ²³ Pero sa gabing iyon, sa halip na dalhin si Raquel kay Jacob, dinala ni Laban ang kanyang nakatatandang anak, na si Lea, sa kanya. Pero dahil madilim na, hindi niya nakita na si Lea iyon at hindi si Raquel, at sumiping siya sa kanya. ²⁴ (Binigay na ni Laban ang kanyang aliping babae na si Zilpa sa kanyang anak niyang si Lea para maging katulong niya.) ²⁵ Kinaumagahan, nagulat si Jacob nang makita niya na si Lea ang kasama niya! Kaya pumunta siya kay Laban at galit na galit na nagsabi, "Kasuklam-suklam ang ginawa mo sa akin! Nagtrabaho ako sa iyo para makuha si Raquel, hindi ba? Kaya bakit mo ako dinaya?" ²⁶ Sumagot si Laban, "Sa lupaing ito, hindi namin kaugalian na ibigay ang nakababatang anak na babae na makasal bago namin ipakasal ang aming panganay na babae sa isang tao. ²⁷ Kapag matapos natin ang linggo ng pagdiriwang na ito, hahayaan naming pakasalan mo rin ang nakababata. Pero bilang kapalit, kailangan mong magbayad para kay Raquel sa pamamagitan ng pagtatrabaho para sa akin ng karagdang pitong taon." ²⁸ Kaya iyon ang ginawa ni Jacob. Pagkatapos ng isang linggong pagdiriwang, binigay ni Laban sa kanya ang kanyang anak na babae, na si Raquel, para maging asawa niya. ²⁹ Binigay ni Laban ang kanyang babaeng alipin na si Bilha kay Raquel para maging lingkod niya. ³⁰ Pinakasalan din ni Jacob si Raquel, at mas minahal niya si Raquel kaysa kay Lea. Nagtrabaho siya kay Laban ng karagdang pitong taon.

³¹ Nang makita ni Yahweh na hindi gaanong minahal ni Jacob si Lea, binigyan niya ng kakayahang mabuntis. Pero si Raquel ay hindi maaaring magbuntis. ³² Si Lea ay nagsilang ng batang lalaki, na pinangalanan niyang Ruben. Sinabi niya, "Nakita ni Yahweh na nagdadalamhati ako, at dahil doon binigyan niya ako ng anak na lalaki. Ngayon tiyak na mamahalin ako ng aking asawa dahil nanganak ako ng lalaki para sa kanya." ³³ Kinalaunan nabuntis siyang muli at nanganak ng lalaki. Sinabi niya, "Dahil narinig ni Yahweh na hindi ako minahal ng aking asawa, binigay rin niya sa akin ang anak na ito." Kaya pinangalanan niya siyang Simon, na nangangahulugang "may isang nakarinig." ³⁴ Kinalaunan nabuntis siyang muli, at nanganak ng isa pang anak. Sinabi niya, "Sa wakas, ang asawa ko ay magiging malapit na sa akin ngayon." Kaya pinangalanan niya siyang Levi, na nangangahulugang "naging malapit." ³⁵ Kinalaunan nabuntis na naman siyang muli at nanganak ng isa pang batang lalaki. Sinabi niya, "Sa pagkakataong ito pupurihin ko si Yahweh," kaya tinawag niya ang kanyang pangalan na Juda. Pagkatapos noon, hindi na siya nagsilang pang muli.