¹ Inayaban ni Jacob dagiti amin a putotna a lallaki ket kinunana kadakuada, ² "Aguummongkayo iti asidegko tapno maibagak kadakayo no anianto ti mapasamak iti masakbayan. Annakko, umaykayo ket dumngekkayo kaniak. Siak ni Jacob nga amayo. ³ Ruben, sika ti kaunaan a putotko. Naiyanakka idi kabanbannuagak ken nasiglatak. Idi nataenganakon, sika ti immuna a putotko. Natangtangsitka ken napigpigsaka ngem kadagiti amin a putotko. ⁴ Ngem saanka a natalna a kas iti dalluyon iti baybay. Isu nga ita, saan a sika ti agbalin a kangrunaan nga anakko, gapu ta simmagpatka iti pagiddaak ket nakikaiddaka iti babai nga inasawak. Gapu iti dayta, naibabainnak unay nga amam. ⁵ Simeon ken Levi, dakayo nga agkabsat ket nagtignaykayo a kasla managdakdakes. Inusaryo dagiti kampilanyo ket nagtignaykayo a siraranggas. ⁶ Saanko kayat iti makikaddua kadakayo no agpanggepkayo kadagiti dakes. Saanak a maibagay a makitipon kadakayo kadagiti panagtitiponyo, gapu ta pinapatayyo dagiti tattao idi nakaungetkayo iti kasta unay, ken pilpilayenyo dagiti baka tapno laeng pagang-angawanyo. ⁷ Kuna ti Dios, 'Ilunodkonto ida ta managung-ungetda unay, ta agtigtignayda a siuulpit no kasta a makaungetda. Iwaraskonto dagiti kaputotanda iti entero a daga ti Israel.' ⁸ Juda, dayawendakanto dagiti inauna ken inaudi a kakabsatmo. Agrukobdanto iti sangoanam, gapu ta parmekemto a naan-anay dagiti kabusormo. ⁹ Ni Juda ket kasla ubing a leon a nabsug a nagsubli iti pagaponanna kalpasan ti pannanganna iti ayup a napapatayna. Isuna ket kasla leon nga agidda ken agunnat kalpasan iti pannanganna; awan ti makaitured a mangsinga iti daytoy. ¹⁰ Addanto a kanayon iti agturay nga agtaud iti kaputotan ni Juda. Ket agiggemto iti setro ti tunggal maysa a mangipakita nga isu ket addaan iti turay a kas ari. Aramidenna dayta agingga nga agraem dagiti nasion kenkuana ken ipakitada nga agtulnogda kenkuana. ¹¹ Ti kaubasan dagiti kaputotanna ket agbunganto iti nawadwad unay nga ubas. Ket kas pagbanaganna, saandanto nga agkedked a mangigalut iti urbon nga asnoda iti kaubasan tapno makapanganda kadagiti bulong iti kaubasan. Adunto unay ti arak, gapu iti dayta, labaandanto dagiti kawesda iti arak; labaanda dagiti kagayda iti arak a kas kalabbaga iti dara. ¹² Dagiti matada ket agbalinto a nalabbaga gapu iti nalabes a panagin-inom iti arak, ngem agbalinto a nakapurpuraw dagiti ngipenda gapu iti panagin-inomda iti adu a gatas a naggapu kadagiti baka. ¹³ Zebulon, dagiti kaputotam ket agnaedto iti igid ti baybay a natalged a pagsangladan dagiti barko. Dumanonto iti amianan ti dagada inggana iti siudad ti Sidon. ¹⁴ Issacar, dagiti kaputotam ket kaslanto napigsa nga asno nga agid-idda iti daga iti nagbaetan dagiti awitda, nabannogda unay ket saanda a makatakder! ¹⁵ Makitadanto a ti paginanaanda ket nasayaat ken makaay-ayo unay kadakuada. Ngem agrukobdanto a mangbaklay iti nadagsen nga awitda ken mapilitda nga agtrabaho a maipaay kadagiti dadduma. ¹⁶ Dan, uray pay bassitto ti tribum, iturayanto dagiti mangingidaulom dagiti tattaoda a kas iti panangituray dagiti mangidadaulo kadagiti dadduma a tribu iti Israel kadagiti tattaoda. ¹⁷ Dagiti kaputotam ket kaslanto kadagiti uleg iti igid ti dalan, maiyarigdanto kadagiti nagita nga uleg a nakakunikon iti igid ti pagnaan. Tukkawandanto dagiti mukod dagiti kabalio a lumabas, a pakaigapuan iti pannakatinnag dagiti nakasakay gapu iti panangingato dagiti kabalio iti akinsango a sakada." ¹⁸ Ket, nagkararag ni Jacob, "Yaweh, Uur-urayek iti panangispalmo kaniak manipud kadagiti kabusorko." ¹⁹ Kalpasanna, intuloy ni Jacob iti panangibaga kadagiti annakna iti mapasamakto iti masakbayan. Kinunana, "Gad, ti tribum ket rautento iti bunggoy ti agtatakaw, ngem kamaten ken darupento ida ti tribum. ²⁰ Aser, dagiti kaputotam ket manganto iti naimas a taraon; agpatauddanto iti taraon a naimas unay a maipaay a kanen dagiti ari. ²¹ Naftali, dagiti kaputotam ket kaslanto ugsa a nawaya nga agtaray, ugsa nga addaan kadagiti napipintas nga annak. ²² Jose, maaddaankanto iti adu a kaputotan. Dagiti annakda ket kaslanto iti kaadu ti bunga ti ubas iti asideg ti ubbog, a kummalay-at dagiti sangana iti pader. ²³ Darupento ida a sirurungsot dagiti kabusorda, ken ibiatdanto dagiti bai ken panada ken kamatenda ida. ²⁴ Ngem agtalinaedto a nalagda dagiti panada ken agtalinaed a napigsa dagiti imada, gapu iti panakabalin ti mannakabalin a Diosko, gapu kenni Yaweh, a mangidaldalan ken mangisabsabet iti kasapulak, a kas iti panangidaldalan ken panangisabet ti agpaspastor iti kasapulan dagiti karnerona. Kiddawento dagiti tattao ti Israel kenni Yaweh a salaknibanna ida a kas kadagiti tattao nga agkamang iti tapaw iti nangato a bato. ²⁵ Ti Dios, a daydayawek ket tulungannanto dagiti kaputotanyo. Bendisionanto ida ti Dios a Mannakabalin babaen iti panangitedna iti tudo nga aggapu iti tangatang ken babaen iti panangitedna iti danum nga aggapu iti uneg ti daga. Ikkannanto ida iti adu nga annak ken taraonannanto ida. ²⁶ Dagiti bendision a kayatko nga itedto ti Dios kenka ket dadakkel. Dakdakkelda ngem kadagiti bendision nga agapgapu kadagiti agnanayon a banbantay, ken kadagiti agapgapu kadagiti mataginayon a turturod. Jose, kararagko a maited kenka dagitoy a bendision, gapu ta sika ti mangidaulo kadagiti kakabsatmo. ²⁷ Benjamin, dagiti kaputotam ket kaslanto kadagiti nakaam-amak a lobo. Iti agsapa, patayendanto dagiti kabusorda a kas iti lobo a mangsakmal iti tukmaanna, ket iti rabii, pagbibingayan dagiti mannakigubat dagiti nasamsamda manipud kadagiti kabusorda." ²⁸ Dagidiay a sangapulo ket dua a putot a lallaki ni Jacob ket dagiti kapuonan dagiti sangapulo ket dua a tribu ti Israel. Dayta ti kinuna ti amada kadakuada a kas bendisionna kadakuada, imbagana iti tunggal maysa ti tunggal sasao nga umno para iti daytoy. ²⁹ Kalpasanna, kinuna ni Jacob kadagiti putotna, "Matayakto iti mabiit ken maitiponak kadagiti kapuonak a natayen. Itabonyo ti bagik iti nakaitabonan dagiti dadduma a kapuonak, iti rukib nga adda idiay talon a nagatang manipud kenni Efron, a Heteo. ³⁰ Ti talon ti Macpela ket adda iti daya ti Mamre, idiay daga ti Canaan. Ginatang ni Abraham kenni Efron daytoy a mausar a pagitabonan. ³¹ Sadiay ti nangitabonanda kenkuana ken iti asawana a ni Sarah. Sadiay ti nangitabonanda iti amak a ni Isaac ken iti inak a ni Rebecca. Ken sadiay ti nangitabonak iti asawak a ni Lea. ³² Nagatang dayta a talon ken rukib manipud kadagiti tattao a Heteo; isu nga idiay iti kayatko a pangitabonanyo kaniak. ³³ Idi nalpasen ni Jacob a nangnangted kadagidiay a bilbilin kadagiti annakna, nagidda manen isuna. Kalpasanna napugsaten ti angesna ket natay.