¹ Kalpasan daytoy a tiempo, adda immay nangibaga kenni Jose, "Masakit ti amam." Idi nangngeg ni Jose dayta, intugotna dagiti dua a putotna, ni Manases ken ni Efraim tapno mapanda kitaen ti amana. ² Idi adda nangibaga kenni Jacob, "Kitaem, immay ti anakmo a ni Jose a mangkita kenka!" Ni Jacob, a maawagan met iti Israel, ket inaramidna ti kabaelanna ken nagtugaw iti pagiddaan, uray no narigat para kenkuana nga aramiden dayta. ³ Kinunana kenni Jose, "Idi addaak idiay Luz iti daga ti Canaan, nagparang kaniak ti Dios a Mannakabalin-amin. Binendisionannak ⁴ ken kinunana kaniak, "Pagbalinenka nga ama ti adu nga annak. Maaddaankanto kadagiti adu a kaputotan, ken agbalindanto nga adu a bunggoy dagiti tattao. Ken itedkonto daytoy a daga kadagiti kaputotam a tagikuaenda iti agnanayon.' ⁵ Ken ita, ibilangko a putotko dagiti dua a putotmo, a naiyanak kenka ditoy Egipto sakbay nga immayak ditoy. Maibilangto a putotko da Efraim ken Manases, ken tawidendanto dagiti sanikuak, kas kadagiti putotko a da Ruben ken Simeon ken dadduma pay. ⁶ No maaddaankanto pay kadagiti putot, saandanto a maibilang a putotko, no di ket kas appokok. Makaawatdanto iti tawid manipud iti paset a matawid dagiti kakabsatda. ⁷ Adu a tawenen ti napalabas, bayat nga agsubsubliak manipud idiay Padan Aram, sililiday a natay ni Raquel nga inam iti daga ti Canaan, kabayatan nga agdaldaliasattayo, iti saan unay nga adayo manipud iti ili ti Efrata. Isu nga intabonko ti bagina iti igid ti dalan nga agpa-Efrata (a naawagan itan iti Bethlehem)." ⁸ Idi nakita ni Jacob dagiti putot ni Jose, sinaludsodna, "Siasino dagitoy nga ubbing?" ⁹ Simmungbat ni Jose iti amana, "Isuda dagiti putotko nga inted ti Dios kaniak ditoy Egipto." Kinuna ni Jacob, "Iyasidegmo ida kaniak tapno mabendisionak ida." ¹⁰ Ngannganin a saan a makakita ni Jacob gapu ta lakay unayen isuna. Saan unayen a makakita isuna. Inyasideg ngarud ni Jose dagiti dua a putotna iti amana, ket inagkan ida ni Jacob ken inarakupna ida. ¹¹ Kinuna ni Jacob kenni Jose, "Saanko a namnamaen a makitaka manen, ngem kitaem daytoy! Impalubos ti Dios a makitaka, ken impalubosna met a makitak dagiti putotmo!" ¹² Innala ni Jose dagiti ubbing manipud iti sakaanan ni Jacob. Ket nagpakleb iti daga. ¹³ Kalpasanna inyasideg ni Jose dagiti dua nga ubbing kenni Jacob; ni Efraim iti makannawanna a makannigid ti ima ni Jacob, ken ni Manases iti makannigidna a makannawan ti ima ni Jacob. ¹⁴ Ngem saan nga inaramid ni Jacob ti kayat ni Jose nga aramidenna. Ngem ketdi, inggaw-atna ti kannawan nga imana ket impatayna iti ulo ni Efraim, uray no isuna ti inaudi nga anak. Pinagkurosna dagiti imana ket impatayna ti kannigid nga imana iti ulo ni Manases, uray no ni Manases ti inauna. ¹⁵ Ket binendisionanna ni Jose ken dagiti putotna, a kunana," Nagbiag ti apongko a ni Abraham ken ti amak a ni Isaac kas tinarigagayan ti Dios, ken inturongnak ti Dios iti daytoy nga aldaw ken inaywanannak a kas iti panangidalan ken panangaywan ti agpaspastor kadagiti karnerona. ¹⁶ Inyadayonak ti anghel nga imbaonna manipud iti peggad iti aniaman a wagas. Kararagko a bendisionan ti Dios dagitoy a lallaki. Kararagko a laglagipendakto dagiti tattao ken dagiti kapuonak, ni Abraham ken ni Isaac, gapu iti aramiden ti Dios kadakuada. Kararagko a maaddaandanto iti adu a kaputotan nga agnaedto iti entero a daga." ¹⁷ Idi nakita ni Jose nga impatay ti amana ti kannawan nga imana iti ulo ni Efraim a saan ket nga iti ulo ni Manases, nagladingit isuna. Isu nga innalana ti ima ti amana manipud iti ulo ni Efraim tapno iyakarna iti ulo ni Manases. ¹⁸ Kinuna ni Jose kenkuana, "Amak, saan a nasayaat dayta! Ti inauna a putotko ti nangipatayam iti kannigid nga imam. Ipataymo ta kannawan nga imam iti ulona." ¹⁹ Ngem nagkedked ti amana, a kunana, "Ammok dayta, anakko; Ammok ti ar-aramidek. Agbalinto met a bunggoy dagiti tattao ti kaputotan ni Manases, ken napategdanto. Ngem napatpategto dagiti kaputotan ti in-inaudi a kabsatna. Agbalinto nga adu a nasion dagiti kaputotanna. ²⁰ Isu nga agpadana ida a binendisionan iti dayta nga aldaw, a kunana, "Usarento dagiti tattao ti Israel dagiti naganyo inton mamendissionda kadagiti tattao. Ibagadanto, "Ikararagmi a tulongannakayo ti Dios a kas iti panangtulongna kada Efraim ken Manases."' Iti kasta a wagas, imbaga ni Jacob a napatpategto ni Efraim ngem ni Manases. ²¹ Kalpasanna, kinuna ni Jacob kenni Jose, "Dandanin ti ipupusayko. Ngem ammok a tulongannaka ti Dios. Addanto iti aldaw nga isublinanto dagiti kaputotam iti daga dagiti kapuonanda. ²² Sikanto ti pangtedak iti nadam-eg a turod iti daga ti Sikem, saan ket a kadagiti kakabsatmo. Nagun-odko dayta a daga manipud kadagiti Amorreo, nakirangetak kadakuada babaen iti kampilan, bai ken panak."