^1-2 Nangpili ni Jose iti lima kadagiti kakabsatna a lallaki a kumuyog kenkuana a makisarita iti ari. Inyam-ammona ida iti ari, ket kalpasanna, kinunana, "Immay ti amak ken dagiti kakabsatko manipud iti daga ti Canaan. Intugotda dagiti amin a karneroda, dagiti kalding, dagiti baka, ken amin a sanikuada, ket agnanaedda ita iti rehion ti Gosen." ³ Sinaludsod ti ari dagiti agkakabsat a lallaki a kunana, "Ania ti trabahoyo?" Simmungbatda iti ari, "Agpaspastorkami, kas kadagiti kapuonanmi." ⁴ Kinunada pay kenkuana, "Immaykami tapno agnaed pay laeng iti daytoy a daga, gapu ta nakaro unay ti panagbisin idiay Canaan, ket awan ti pagpastoran kadagiti ayupmi sadiay. Isu nga a pangngaasim koma ta ipalubosmo nga agnaedkami iti rehion ti Gosen." ⁵ Kinuna ti ari kenni Jose, "Immay gayam kenka ti amam ken dagiti kakabsatmo. ⁶ Mabalinda ti agnaed iti sadinoman a kayatmo iti daga ti Egipto. Itedmo iti amam ken kadagiti kakabsatmo ti kasasayaatan a paset ti daga. Mabalinda iti agnaed idiay Gosen. Ket no ammom nga adda kadakuada ti addaan ti naisangsangayan a kabaelan nga agtrabaho kadagiti taraken, ipaaywanmo met kadakuada dagiti ayup a kukuak." ⁷ Kalpasanna, impan ni Jose ni Jacob nga amana iti palasio ken inyam-ammona iti ari. Dinawat ni Jacob a bendisionan ti Dios ti ari. ⁸ Ket sinalusod ti ari kenni Jacob, "Manu ti tawenmon?" ⁹ Simmungbat ni Jacob, "Sangagasut ket tallopulo a tawen nga agdaldalliasatak. Saanak a nagbiag iti napaut a kas iti kapaut ti biag dagiti kapuonak, ngem napnoan iti rigat ti biagko." ¹⁰ Ket dinawat manen ni Jacob a bendisionan ti Dios ti ari ket kalpasanna, pinanawanna daytoy. ¹¹ Kasta ti inaramid ni Jose tapno makapagnaed ti amana ken dagiti kakabsatna idiay Egipto. Kas imbilin ti ari, inikkanna ida iti masakupan iti kasasayaatan a paset ti daga, nga isu ti Gosen, a maawaganen ita iti Rameses. ¹² Nangipaay met ni Jose iti taraon para kadagiti amin a pamilia ti amana. Ti kaadu ti intedna kadakuada ket segun iti kaadu ti annak nga adda iti tunggal maysa kadakuada. ¹³ Awan ti taraon nga agtubo iti entero a pagilian gapu ta nakaro unay ti panagbisin. Kimmapuy dagiti tattao iti Egipto ken Canaan gapu ta awan ti umdas a taraonda. ¹⁴ Inawat amin ni Jose dagiti kuarta a pinagbayad dagiti tattao iti Egipto ken Canaan iti bukel nga inlakona kadakuada, ket impanna iti palasio ti ari. ¹⁵ Idi naibusen dagiti tattao ti Egipto ken Canaan dagiti amin a kuartada nga inggatangda iti bukel, kanayonda latta nga umay kenni Jose a kunada, "Pangngaasim ta ikkanakami iti taraon! No saannakami nga ikkan iti bukel, mataykami! Binusbusmi ti amin a kuartami a panggatang iti taraon, ken awanen ti nabati a kuartami!" ¹⁶ Simmungbat ni Jose, "Agsipud ta naibus aminen a kuartayo, iyegyo dagiti tarakenyo kaniak. No aramidenyo dayta, lakkoankayonto iti taraon kas kasukat dagiti tarakenyo." ¹⁷ Isu nga impanda dagiti tarakenda kenni Jose. Inikkanna ida iti taraon kas kasukat dagiti kabalioda, dagiti karneroda ken dagiti kaldingda, dagiti bakada ken dagiti asnoda. ¹⁸ Idi nalpasen dayta a tawen, immayda kenkuana iti simmaruno a tawen ket kinunada, "Saanmi a mailemmeng kenka daytoy: Awanen iti kuartami, ken ita kukuamon amin a bakami. Ti laengen bagimi ken dagami ti maitedmi kenka. Awanen a pulos ti sabali a nabati kadakami. ¹⁹ No saannakami nga ikkan ti taraon, mataykami! No saannakami nga ikkan kadagiti bukel, awanto ti serserbi dagiti talonmi. Gatangennakami ken ti dagami kas kasukat ti taraon. Ket agbalinkaminto nga adipen ti ari, ket kukuananto ti daga. Ikkannakami kadagiti bukel tapno mabalinmi iti agmula ken agpaadu ti taraon, tapno iti kasta saankaminto a matay, ken tapno iti kasta saanto nga agbalin a kasla let-ang ti dagami." ²⁰ Ginatang ngarud ni Jose dagiti amin a talon iti Egipto para iti ari. Inlako ti tunggal tattao iti Egipto ti dagada kenkuana gapu ta nakaro unay ti panagbisin ken awan ti sabali a wagasda a gumatang iti taraon. Isu a nagbalin a talon ti ari dagiti amin a talon. ²¹ Kas nagbanaganna, pinagbalin ni Jose nga adipen amin dagiti tattao manipud ti maysa a ketegan ti pagilian agingga iti sabali pay a ketegan. ²² Ngem saanna a ginatang ti daga dagiti papadi, gapu ta kanayonda a makaawat iti taraonda manipud iti ari. Dayta ti makagapu a saanda nga inlako ti dagada kenkuana. ²³ Kinuna ni Jose kadagiti tattao, "Dumngegkayo kaniak! Ita, ginatangkayon ken ti dagayo para iti ari. Isu nga adtoy dagiti bukel a maipaay kadakayo tapno iti kasta mabalinyo nga imula iti daga. ²⁴ Ngem inton apitenyo ti mulayo, masapul nga itedyo ti apagkalima ti apit iti ari. Mabalinyo nga idulin ti natda nga apit tapno agbalin a bukel a maimula kadagiti talon ken taraon para kadakayo, kadagiti annakyo ken iti sangakabalayanyo." ²⁵ Simmungbatda, "Inispalmo dagiti biagmi! Kayatmi a maay-ayoka kadakami. Ken agbalinkami nga adipen ti ari." ²⁶ Isu a nangaramid ni Jose iti linteg maipanggep iti amin a daga iti Egipto, ilanlanadna a kukua ti ari ti apagkalima dagiti maapit a mula. Agtultuloy latta dayta a linteg. Ti laeng daga a kukua dagiti papadi ti saan a nagbalin a daga ti ari. ²⁷ Nangrugi a nagnaed ni Jacob ken ti pamiliana idiay Egipto, iti rehion ti Gosen. Nakaalada iti sanikua sadiay. Adu nga annak iti naipasngay kadakuada sadiay. Kas nagbanaganna, immadu unay ti bilangda. ²⁸ Nagnaed ni Jacob iti sangapulo ket pito a tawen idiay Egipto. Nagbiag isuna iti sangagasut uppat a pulo ket pito a tawen. ²⁹ Idi umadanin ti ipapatayna, pinaayabanna ni Jose a putotna ket kinunana kenkuana, "No naay-ayoka kaniak, ikabilmo ti imam iti baet dagiti luppok ket ikari a napudnokanto kaniak kas amam ken aramidem ti italekko kenka ita nga aramidem: Inton matayak, saannak nga itabon ditoy Egipto. ³⁰ Ngem ketdi, inton matayak ken maitiponak kadagiti kapuonak nga immunan a natay, ipanawmo ti bagik ditoy Egipto, ket itabonmo idiay Canaan a nakaitabonanda." Simmungbat ni Jose, "Aramidekto ti imbagam." ³¹ Kinuna ni Jacob, "Agsapataka kaniak nga aramidemto!" Isu a nagsapata ni Jose nga aramidenna daytoy. Ket nagdumog ni Jacob iti pagiddaanna ket nagrukbab iti Dios.