¹ Pimmanaw ngarud ni Jacob, intugotna amin a pamiliana ken dagiti sanikuana. Idi nakadanunda idiay Beersheba, nagidaton isuna kadagiti daton iti Dios, a pagdaydayawan ni amana a ni Isaac. ² Iti dayta a rabii, inawagan ti Dios ni Jacob iti maysa a sirmata, a kunana, "Jacob! Jacob!" Simmungbat ni Jacob a kunana, "Adtoyak!" ³ Kinuna ti Dios, "Siak ti Dios, a dinaydayaw ti amam. Saanka a mabuteng a mapan idiay Egipto, gapu ta ikkankanto iti adu a kaputotan, ket agbalindanto a dakkel a nasion sadiay. ⁴ Kuyugenka a mapan idiay Egipto, ket iti saan a mabayag isublikto manen dagiti kaputotam iti daga ti Canaan. Ket addanto ni Jose kenka inton matayka." ⁵ Pimmanaw ngarud ni Jacob idiay Beersheba, ket inkuyog isuna dagiti putotna, dagiti assawada, ken dagiti annakda, dagiti kariton nga impatulod ti ari a pagdaliasatda. ⁶ Iti kastoy a wagas, napan ni Jacob ken amin a pamiliana idiay Egipto. Intugotda dagiti tarakenda ken amin a sabali pay a sanikua a napaaduda idiay Canaan. ⁷ Napan ni Jacob ken dagiti amin nga annakna a lallaki, annakna a babbai, ken appokona a lallaki, ken appokona a babbai idiay Egipto—ti entero a pamiliana. ⁸ Daytoy ti listaan dagiti nagnagan ti kamkameng ti pamilia ni Jacob a simmurot kenkuana idiay Egipto: ni Ruben nga inauna a putot ni Jacob; ⁹ dagiti putot a lallaki ni Ruben a ni Hanoc, ni Pallu, ni Hezron ken ni Carmi; ¹⁰ ni Simeon ken dagiti putotna a lallaki a ni Jemuel, ni Jamin, ni Ohad, ni Jakin, ni Zohar ken ni Saul nga anak ti maysa a babai a naggapu iti bunggoy dagiti Canaanita, ¹¹ ni Levi ken dagiti putotna a lallaki a ni Gerson, Kohat, ken ni Merari. ¹² ni Juda ken dagiti putotna a lallaki a ni Selah, ni Perez ken ni Zera (dagiti dadduma a putotna a ni Er ken ni Onan, ket natay idi idiay daga ti Canaan); dagiti dua a putot a lallaki ni Perez a ni Hezron ken ni Hamul; ¹³ ni Issacar ken dagiti putotna a lallaki a ni Tola, ni Pua, ni Yob ken ni Simron; ¹⁴ ni Zabulon ken dagiti putotna a lallaki a ni Sered, ni Elon ken ni Jaleel. ¹⁵ Dagita dagiti annak a lallaki da Jacob ken Lea, a naiyanak idiay Padan-aram, ken ni Dina nga anakda a babai. Tallo pulo ket tallo amin dagiti lallaki ken babbai nga annak ken appoko da Lea ken Jacob. ¹⁶ Ni Gad ken dagiti putotna a lallaki a ni Zifion, ni Aggi, ni Suni, ni Ezbon, ni Eri, ni Arodi ken ni Areli; ¹⁷ ni Aser ken dagiti putotna a lallaki a ni Imma, ni Isva, ni Isvi, ken ni Beria ken ni Sera a kabsatda a babai; dagiti putot a lallaki ni Beria a da Heber ken ni Malkiel; ¹⁸ (Dagitoy dagiti annak ken appoko ni Jacob ken ni Zilpa a tagabu a babai nga inted ni Laban kenni Lea a putotna. Sangapulo ket innem da amin.) ¹⁹ Ni Jose ken ni Benjamin, nga annak a lallaki ni Raquel nga asawa ni Jacob; ²⁰ (Ni Efraim ken ni Manases dagiti dua a putot ni Jose. Saanda a nairaman kadagiti napan idiay Egipto ta naiyanakda idiay Egipto. Annak ida ni Asenat, a putot ni On, a padi iti templo iti siudad ti On.) ²¹ Ni Benjamin ken dagiti putotna a lallaki a da Bela, Beker, Asbel, Gera, Naaman, Ehi, Ros, Muppim, Huppim ken ni Ard; ²² (Dagitoy dagiti annak a lallaki ken appoko da Raquel ken Jacob. Sangapulo ket uppat da amin.) ²³ Ni Dan ken ti putotna a lalaki a ni Husim; ²⁴ ni Naftali ken dagiti putotna a lallaki a ni Jazeel, ni Guni, ni Jeser ken ni Sillem. ²⁵ (Dagitoy dagiti putot a lallaki ken appoko a lallaki da Jacob ken Bilha a tagabu a babai nga inted ni Laban iti putotna a ni Raquel. Pito da amin.) ²⁶ Innem a pulo ket innem amin dagiti kaputotan ni Jacob a simmurot kenkuana idiay Egipto. Saan a karaman iti dayta a bilang dagiti assawa dagiti putotna a lallaki. ²⁷ Pito pulo amin dagiti kameng iti pamilia ni Jacob idi addadan idiay Egipto. Karaman iti daytoy a bilang da Jacob, Jose ken dagiti dua a putot a lallaki ni Jose a naiyanak idiay Egipto. ²⁸ Pinauna ni Jacob ni Juda tapno makikatungtong kenni Jose ken tapno damagenna no kasano ti mapan idiay Gosen. Kalpasanna, nagsubli ni Juda iti ayan dagiti nabati a pamiliana ket nagturongda iti rehion ti Gosen. Idi nakasangpetda sadiay, ²⁹ insagana ni Jose ti karwahena ket napan idiay Gosen tapno sabatenna ti amana. Idi nakasangpet ni Jose, inarakupna ti tengnged ti amana ket nagsangit iti nabayag. ³⁰ Kinuna ni Jacob kenni Jose, "Nakitakan, ket ita, ammok a sibibiag ka pay! Isu a nakasaganaakon a matay." ³¹ Ket kinuna ni Jose kadagiti kakabsatna a lallaki ken kadagiti dadduma a pamilia ti amana, "Mapanak iti ari ket ibagak kenkuana, 'Amin dagiti kakabsatko a lallaki ken ti amak ken dagiti dadduma pay a kameng ti pamiliana, nga agnanaed iti daga ti Canaan ket immay amin kaniak. ³² Agpaspastor amin dagiti lallaki. Agay-aywanda kadagiti tarakenda, ket intugotda dagiti karnero, kalding, baka ken dadduma pay a kukuada.' ³³ No paayaban ken damagennakayo ti ari, 'Ania iti trabahoyo?' ³⁴ Sumungbatkayo a kunayo, 'Manipud kinaubingmi, agtartaraken kamin kadagiti arban, a kas met laeng kadagiti kapuonanmi.' No ibagayo dayta kenkuana, palubosannakayo nga agnaed idiay rehion ti Gosen." Imbaga ni Jose kadakuada nga ibagada dayta gapu ta nababa ti panagkita dagiti tattao ti Egipto kadagiti agpaspastor.