¹ Saanen a nagawidan ni Jose ti riknana. Saanna a kayat nga agsangit iti sangoanan dagiti adipenna, isu a kinunana iti napigsa kadakuada, "Rummuarkayo amin!" Idi nakaruardan, awanen dagiti Egipcio sadiay a kadua ni Jose idi ibagana kadagiti kakabsatna ti kinasiasinona. ² Nagsangit iti napigsa nga uray dagiti tattao iti ruar ket nangngegda, ken uray dagiti tattao iti palasio ti ari ket nangngegda. ³ Kinuna ni Jose kadagiti kakabsatna, "Siak ni Jose! Sibibiag pay kadi ti amatayo?" Ngem saan a makasungbat dagiti kakabsatna, gapu ta nabutnganda iti imbagana. ⁴ KaIpasanna, kinuna ni Jose kadagiti kakabsatna, "Umasidegkayo kaniak!" Idi nakaasidegdan kenkuana, kinunana, "Siak ti kabsatyo a ni Jose! Siak daydi inlakoyo kadagiti agtagtagilako a nangipan kaniak ditoy Egipto! ⁵ Ngem ita, saankayo a mariribukan, ken saankayo a makaunget kadagiti bagbagiyo iti panangilakoyo kaniak kas maysa a tagabu. Ti Dios ti nangibaon kaniak ditoy nga immun-una kadakayo tapno mailasatkayo iti pannakatay gapu iti bisin. ⁶ Addan dua a tawen iti panagbisin iti daytoy a pagilian, ken agtultuloy pay iti lima a tawen. Kabayatan iti daytoy a tiempo, awanto ti agarado iti daga, ken awanto ti mula a maapit. ⁷ Imbaonnak ti Dios nga immun-una ditoy ngem kadakayo tapno mailasatkayo iti panagbisin, ken tapno siguradoek a makalasat dagiti kaputotanyo. ⁸ Isu a saan a dakayo ti nangibaon kaniak ditoy; imbaonnak ti Dios ditoy! Pinagbalinnak a kasla ama iti ari. Siak ti makaammo iti amin nga adda iti palasiona ken gobernador ti amin a tattao iti Egipto! ⁹ Ita, agsublikayo a dagus iti amak ket ibagayo kenkuana, 'Daytoy ti imbaga ni Jose a putotmo: "Pinagbalinnak ti Dios a gobernador iti entero a daga ti Egipto. Umayka a dagus kaniak! ¹⁰ Mabalinmo iti agnaed iti rehion ti Gosen. Sika ken dagiti putotmo ken dagiti appokom, dagiti karnerom ken dagiti kalding ken baka, ken amin a kukuam, ket asidegto kaniak. ¹¹ Agsipud ta adda pay lima a tawen a panagbisin, siguradoek nga addanto taraonmo. No saanka nga umay ditoy, sika ken ti pamiliam ken amin dagiti tagabum ket agbisinto."' ¹² No dakayo-- ken ni Benjamin, met—ket matmatandak, makitayo amin nga agpayso a siak, a ni Jose, ti agsasao kadakayo. ¹³ Mapankayo ket ibagayo iti amak no kasano ti kinadayaw nga adda kaniak ditoy Egipto. Ken ibagayo kenkuana ti maipanggep iti amin a nakitayo. Darasenyo nga iyeg ti amak ditoy!" ¹⁴ Kalpasanna inyarakopna ti imana iti tengnged ti inaudi a kabsatna a ni Benjamin ket nagsangit. Ket inarakup met isuna ni Benjamin ken nagsangit. ¹⁵ Kalpasanna, inagkanna dagiti inauna a kakabsatna kadagiti pingpingda, ken nagsangit. Kalpasan dayta, nangrugi a nakitungtong dagiti kakabsatna kenkuana. ¹⁶ Maysa a tao ti napan iti palasio ken impadamagna nga immay dagiti kakabsat ni Jose a lallaki. Naay-ayo ti ari ken amin nga opisialna. ¹⁷ Kinuna ti ari kenni Jose, "Ibagam kadagiti kakabsatmo daytoy: Mangikargakayo kadagiti bukel kadagiti ayupyo ket agsublikayo iti daga ti Canaan. ¹⁸ Kalpasanna iyegyo ti amayo ken dagiti pamiliayo ditoy. Itedkonto kadakayo ti kasayaatan a daga iti Egipto, ken maitedto kadakayo ti kasayaatan a taraon iti daga a kanenyo.' ¹⁹ Ibagam pay kadagiti kakabsatmo: 'Mangalakayo kadagiti kariton manipud ditoy Egipto a pangilugananyo kadagiti annakyo ken kadagiti assawayo, ken alaenyo ida ken ti amayo ket agsublikayo a dagus ditoy. ²⁰ Saanyo a pakadanagan no kasanoyo nga itugot dagiti sanikuayo, gapu ta kukuayonto dagiti kasayaatan a banbanag iti Egipto. Gapu iti dayta, saanyon a kasapulan nga itugot dagiti banbanag nga aggapu idiay Canaan."' ²¹ Inaramid dagiti putot ni Jacob ti imbilin ti ari. Inikkan ida ni Jose kadagiti kariton ken taraon a kanenda iti dalan, kas imbilin ti ari. ²² Inikkanna ti tumunggal maysa kadagiti baro a kawes, ngem inikkanna ni Benjamin iti tallo gasut a piraso iti pirak ken lima a paris ti bado! ²³ Daytoy met ti impatulodna iti amada: Sangapulo a kalakian nga asno, a napaawitan kadagiti kasayaatan a banbanag a naggapu iti Egipto, ken sangapulo a kaba-ian nga asno a napaawitan kadagiti bubukel, tinapay, ken sabali pay a taraon para iti panagdaliasat ti amada nga umay idiay Egipto. ²⁴ Kalpasanna imbaonna dagiti kakabsatna iti dalanda, a kunana kadakuada "Saankayo nga agaapa iti dalan!" ²⁵ Pimmanaw ngarud dagiti agkakabsat idiay Egipto ket nakasangpetda iti amada a ni Jacob idiay daga ti Canaan. ²⁶ Maysa kadakuada iti nangibaga kenkuana, "Sibibiag pay ni Jose! Kinapudnona, gobernador isuna iti entero nga Egipto!" Kasta unay ti siddaaw ni Jacob; saanna a patien a pudno daytoy. ²⁷ Ngem imbagada amin ti kinuna ni Jose kadakuada, ket nakita ni Jacob dagiti kariton nga impatulod ni Jose a pangilugananda kenkuana ken ti pamiliana ken dagiti sanikuana a mapan idiay Egipto. Kamauddiananna, nagsubli ti ganaygay ni Jacob. ²⁸ Kinunana, "Umanayen ti imbagayo a mangallukoy kaniak! Sibibiag pay laeng ni Jose nga anakko, ket mapanko kitaek isuna sakbay a matayak!"