¹ Idi nakasaganan dagiti kakabsatna nga agawid, imbaga ni Jose iti lalaki a mangimatmaton kadagiti banbanag iti balayna, "Punoem dagiti sako dagidiay a lallaki iti adu a trigo a kabaelan a bagkaten dagiti asnoda. Ken ikabilmo iti ngarab ti sako ti tunggal lalaki ti pirak nga imbayadna iti trigo. ² Kalpasanna, ikabilmo ti pirak a kopak iti ngarab ti sako ti inaudi a kabsatda, kanayonna ti pirak nga imbayadna iti trigo." Inaramid ngarud ti adipen ti imbaga ni Jose nga aramidenna. ³ Kabigatanna, idi aglawagen, napalubosan a pumanaw dagiti agkakabsat nga agawid a kaduada dagiti asnoda. ⁴ Idi saanda pay a nakaadayo manipud iti siudad, kinuna ni Jose iti adipen a mangimatmaton kadagiti banbanag iti balayna, "Kamatem a dagus dagidiay a lallaki. Inton makamatam ida, ibagam kadakuada, ‘Nasayaat ti inaramidmi kadakayo! Apay a dakes ti insubadyo kadakami? ⁵ Tinakawyo ti kopa a pagin-inoman ti apok! Daytoy ti kopa nga us-usarenna tapno maduktalanna dagiti banbanag a saan nga ammo ti siasinoman! Dakes unay ti inaramidyo!'" ⁶ Idi nakamatan ida ti adipen, imbagana kadakuada ti imbaga kenkuana ni Jose. ⁷ Ngem maysa kadakuada ti simmungbat kenkuana, "Apo, apay a kasta ti ibagbagam? Adipennakami, ken pulos a saankami nga agaramid iti aniaman a banag a kasta! ⁸ Insublimi pay kadakayo manipud Canaan ti pirak a nasarakanmi iti rabaw dagiti sakomi! Isu nga imposible nga agtakawkami iti pirak wenno balitok iti balay ti apom! ⁹ No maduktalam a maysa kadakami ti ayan dayta a kopa, mabalinmo a papatayen isuna, ken dakami a nabati ket pagbalinem a tagabum." ¹⁰ Simmungbat ti lalaki, "Aramidek ti imbagam. Ngem saan a mapapatay ti siasinoman nga ayan ti kopa. Ngem ketdi, agbalin isuna a tagabuk, ken mabalin nga agawid ti dadduma kadakayo." ¹¹ Dagus nga imbaba ti tunggal lallaki dagiti sakoda manipud iti asno ket linukatanda daytoy. ¹² Ket rinuggian ti adipen a biruken ti kopa iti tunggal sako. Inrugina iti sako ti kalakayan ken nagleppas iti sako ti kaubingan. Nabirukanna ti kopa iti sako ni Benjamin ket impakitana daytoy kadakuada. ¹³ Rinay-ab dagiti agkakabsat dagiti kawesda gapu ta kasta unay ti pannakaupayda. Inkargada manen dagiti sako kadagiti asno ket nagsublida iti siudad. ¹⁴ Idi simrek ni Juda ken dagiti inauna ken inaudi a kakabsatna iti balay ni Jose, adda pay laeng sadiay ni Jose. Imbaga ti adipen kenni Jose ti napasamak. Ket nagpakleb iti daga dagiti agkakabsat iti sangoanan ni Jose. ¹⁵ Kinunana kadakuada, "Apay nga inaramidyo daytoy? Saanyo kadi nga ammo a ti tao a kas kaniak ket maduktalanna dagiti banbanag nga awan ti siasinoman a makaammo?" ¹⁶ Simmungbat ni Juda, "Apo, ania ti maibagami? Kasanomi a mapaneknekan nga awan ti basolmi? Dinusanakamin ti Dios kadagiti basbasol a naaramidmi, adu a tawenen ti napalabas. Isu nga ita agbalinkami a tagabum—dakami ken ti makinsako iti nakasarakanda ti kopa." ¹⁷ Ngem simmungbat ni Jose, "Saan, pulos a saanko a maaramid ti aniaman a banag a kas iti dayta. Ti laeng tao a nakasarakanda iti kopa ti agbalin a tagabuk. Ti dadduma kadakayo ket mabalinyon ti agsubli a sitatalna iti amayo." ¹⁸ Immasideg ni Juda kenni Jose ket kinunana, "Apo, pangngaasim ta palubosannak nga agsao iti maysa a banag kenka. Agpadakayo iti ari, isu a mabalinyo nga ibilin a mapapatayak; ngem saanka a makaunget kaniak iti pannakitungtongko kenka. ¹⁹ Sinaludsodmo kadakami, 'Sibibiag pay kadi ti amayo, ken adda pay kadi sabali a kabsatyo?' ²⁰ Insungbatmi, 'Sibibiag pay ti amami, ngem lakayen. Adda putotna a lalaki nga agtutubo a naiyanak idi lakayen ti amami. Dayta nga anak ket adda in-inauna a kabsatna a lalaki a natayen. Isu a ti inaudi nga anak a lalaki ket isu laengen ti nabati nga anak ti inana, ken ipatpateg unay isuna ti amana. ²¹ Ket kinunam pay kadakami, iti sumaruno nga iyuumayyo ditoy, iyegyo ti inaudi a kabsatyo kaniak, tapno iti kasta makitak isuna.' ²² Kinunami kenka, 'Saan, saanmi a maaramid dayta, gapu ta saan a mabalin a panawan ti ubing ti amana. No panawanna ti amana, matay ti amana gapu iti ladingit.' ²³ Ngem imbagam kadakami, 'No saanyo a kadua a sumalog ti inaudi a kabsatyo, saankonto nga ipalubos a makitadak manen!' ²⁴ Idi nagsublikami iti amami, imbagami kenkuana ti imbagam. ²⁵ Naglabas dagiti bulan, imbaga ti amami, 'Agsublikayo idiay Egipto ket gumatangkayo iti ad-adu pay a trigo!' ²⁶ Ngem kinunami, 'Saankami a makasubli a dakdakami laeng. Mapankami laeng no kaduami ti inaudi a kabsatmi. Saankami a mabalin a sumango iti lalaki nga aglaklako iti trigo no saanmi a kadua ti inaudi a kabsatmi.' ²⁷ Insungbat ti amami, 'Ammoyo nga innikkannak ti asawak a ni Raquel iti dua nga annak a lallaki. ²⁸ Napukaw ti maysa kadakuada, ket kinunak, "Awan duadua a rinangrangkay isunan ti maysa a narungsot nga ayup." Ken saankon a nakita pay isuna manipud idi. ²⁹ No alaenyo pay daytoy maysa kaniak, ket adda mangdangran kenkuana, dakayo ti pakaigapuan a siak nga agubanen a lakay, ket matay gapu iti ladingit.' ³⁰ Isu a pangngaasim kadi ta dumngegka. Agtalinaed laeng a sibibiag ti amak no agtalinaed a sibibiag ti inaudi a putotna. ³¹ No makitana a saanmi a kadua ti ubing inton agsublikami kenkuana, matay isuna. Dakami ti pakaigapuan a matay ti agubanen nga amami gapu iti ladingitna. ³² Impasiguradok a makasubli ti ubing a sitatalged. Imbagak kenkuana, 'Mabalinmo a kiddawen a masapul nga aramidek ti ikarkarik. No saanko a maisubli isuna kenka, mabalinmo nga ibaga iti agnanayon a siak ti mapabasol iti saanko a panangisubli kenkuana. ³³ Isu a, pangngaasim ta siak laengen ti agtalinaed ditoy kas tagabum a saan ket nga iti inaudi a kabsatko, ken palubosam nga agawid ti ubing kaduana dagiti sabali pay nga inauna a kakabsatna. ³⁴ Saanak a makasubli iti amak no saanko a kadua ti ubing! Saanko kayat a makita ti panagleddaang ti amak!"