¹ Kimmaro ti panagbisin idiay Canaan. ² Kamaudiananna, idi naibusen da Jacob ken ti pamiliana ti amin a trigo nga innalada idiay Egipto, kinuna ni Jacob kadakuada, "Agsublikayo idiay Egipto ket gumatangkayo iti ad-adu pay a trigo para kadatayo!" ³ Ngem kinuna ni Juda kenkuana, "Nainget ti panangballaag ti lalaki a nangilako kadakami iti trigo, 'Saankonto nga ipalubos a makitadak manen no umaykayo a saanyo a kadua ti inaudi a kabsatyo.' ⁴ Isu nga no itulokmo nga itugotmi ti inaudi a kabsatmi, sumalogkami idiay Egipto ket gumatang iti sangkabassit a trigo para kadakayo. ⁵ Ngem no saanmo nga ipalubos nga itugotmi isuna, saankami a sumalog sadiay, gapu ta kinuna daydiay a lalaki kadakami, 'Saanko nga ipalubos a makitadak manen no saanyo a kadua ti inaudi a kabsatyo." ⁶ Nagsaludsod ni Jacob, "Apay ta pagparparikutendak gapu iti panangibagayo iti lalaki nga adda pay inaudi a kabsatyo?" ⁷ Simmungbat ti maysa kadakuada, "Nagsaludsod ngamin ti lalaki maipanggep kadakami ken maipanggep iti pamiliatayo. Kinunana, 'Sibibiag pay kadi ti amayo? Adda kadi pay sabali a kabsatyo?' Masapul a sungbatanmi dagiti saludsodna. Saanmi nga ammo nga ibagana nga, 'Inton sumaruno a sumalogkayo ditoy, itugotyo ti kabsatyo!" ⁸ Ket kinuna ni Juda iti amana a ni Jacob, "Ipalubosmo a kumuyog ti ubing kaniak ta mapankamin a dagus, tapno iti kasta gumatangkami iti trigo ket saantayo a matay iti bisin, datayo ken dagiti annaktayo. ⁹ Ipasiguradok nga agsubli isuna. Mabalinmo nga ibaga kaniak a masapul nga aramidek iti ikarkarik. No saanko a maisubli isuna kenka a sitatalged, mabalinmo nga ibaga a siak ti mapabasol iti agnanayon. ¹⁰ No saankami a nataktak iti adu a tiempo, nakagtengkami koman sadiay ken kapaminduami koma itan a nagsubli!" ¹¹ Ket kinuna kadakuada ti amada a ni Jacob, "No awanen iti sabali a pamuspusan, aramidenyo daytoy: Mangikargakayo kadagiti sakoyo iti kasayaatan a banbanag nga agtubtubo iti daytoy a daga, ket itedyo dagitoy iti lalaki a kas sagut. Mangalakayo iti sangkabassit a resina, diro, rekrekado ken mira, sangkabassit a piniones, ken almendras. ¹² Paminduaenyo ti gatad ti kuarta nga alaenyo kas innalayo idi, gapu ta masapul nga isubliyo ti pirak nga inkargada iti rabaw dagiti saksakoyo. Nalabit a biddut laeng daytoy a naikarga kadagiti saksakoyo. ¹³ Itugotyo ti inaudi a kabsatyo ket agsublikayo iti dayta a lalaki. ¹⁴ Ikararagko a ti Mannakabalin a Dios ti mangtignay iti dayta a lalaki nga agbalin a manangngaasi kadakayo, tapno iti kasta palubosannanto ti maysa a kabsatyo, kasta met ni Benjamin, nga agsubli ditoy a kaduayo. Ngem para kaniak, no mapukaw kaniak dagiti putotko a lallaki, ket maawananak ngarud iti annak!" ¹⁵ Isu nga innala dagiti lallaki dagiti sagut nga imbaga ni Jacob nga alaenda, ken dinobleda ti gatad ti kuarta a bayad ti trigo. Intugotda met ni Benjamin. Nagdardarasda a simmalog idiay Egipto, ket dimmatagda iti sangoanan ni Jose. ¹⁶ Idi nakita ni Jose a kaduada ni Benjamin, imbagana iti lalaki a mangay-aywan kadagiti banbanag iti balayna, "Ipanmo dagitoy a lallaki iti balayko. Mangpartika iti ayup ken mangisaganaka iti makan, gapu ta kayatko a makipanganda kaniak iti pangaldaw." Imbagana iti tagabuna no kasano ti urnos dagiti pagtugawanda. ¹⁷ Inaramid ti lalaki ti imbaga ni Jose; impanna ida iti balay ni Jose. ¹⁸ Ngem nagbutengda gapu ta iturturongna ida iti balay ni Jose. Panpanunotenda, "Impannatayo ditoy gapu iti pirak a naikarga kadagiti saksakotayo idi damo nga immaytayo ditoy. Kabayatan a mangmangantayo, rautendatayonto dagiti adipenna ken tiliwendatayo ket pagbalinennatayo a tagabuna, ken alaenna pay dagiti asnotayo." ¹⁹ Simmurotda iti lalaki a mangay-aywan kadagiti banbanag iti balay ni Jose. Idi nakadanonda iti pagserrekan ti balay, ²⁰ maysa kadakuada ti nangibaga kenkuana, "Pangngaasim, apo, dumngegka kaniak. Simmalogkami ditoy idi ken gimmatangkami iti sangkabassit a trigo. ²¹ Ngem iti lugar a nagsardenganmi iti rabii idi paawidkamin iti pagtaenganmi, linukatanmi dagiti saksakomi. Nasdaawkami a nakakita nga adda iti ngarab ti tunggal sakomi ti gatad ti pirak nga imbayadmi iti trigo! Isu nga intugotmi daytoy iti panagsublimi. ²² Nangitugotkami pay iti ad-adu a pirak tapno gumatangkami iti ad-adu a trigo. Saanmi nga ammo no siasino ti nangikarga iti pirak kadagiti saksakomi." ²³ Simmungbat ti lalaki, "Saankayo nga agdanag maipanggep iti daytoy! Naawatko ti pirak nga inyegyo. Ti Diosyo a Dios a daydayawen ti amayo, ti nangikabil kadagitoy kadagiti saksakoyo." Ket kalpasanna, inyegna ni Simeon kadakuada manipud iti pagbaludan. ²⁴ Ket impanna ida iti balay ni Jose. Inikkanna ida iti danum a pangbuggoda kadagiti saksakada ken inikkanna ida iti taraon a para kadagiti asnoda. ²⁵ Imbagana kadakuada a makipanganda kenni Jose iti pangaldaw. Isu nga insagana dagiti lallaki dagiti sagutda tapno itedda kenni Jose inton sumangpet isuna. ²⁶ Idi simmangpet ni Jose iti pagtaenganna, impakitada kenkuana dagiti sagut nga intugotda iti uneg ti balay. Kalpasanna, nagpaklebda iti daga iti sangoananna. ²⁷ Sinaludsodna kadakuada no nasalun-atda, ken sinaludsodna, "Kasano ti salun-at ti lakay nga amayo, nga imbagayo idi kaniak? Sibibiag pay kadi isuna?" ²⁸ Simmungbat ti maysa kadakuada, "Wen, ti adipenmo nga amami ket sibibiag pay ken nasalun-at." Ket nagdumogda manen iti sangoananna. ²⁹ Kalpasanna, nakitana ti inaudi a kabsatna a ni Benjamin, nga anak met laeng ti ina na. Sinaludsodna kadakuada, "Daytoy kadi ti inaudi a kabsatyo nga ibagbagayo kaniak?" Kalpasan a kinunada a, "Wen," kinunana kenni Benjamin, "Agtutubo a lalaki, kararagko a siaasi koma nga agtignay ti Dios kenka." ³⁰ Nagdardaras a pimmanaw ni Jose iti siled. Naamirisna a makasangsangit isuna gapu ta nadagsen ti barukongna maipanggep iti inaudi a kabsatna. Napan isuna iti pribado a siledna ket idiay a nagsangit. ³¹ Ket kalpasanna, nagdiram-us ket rimmuar, a tepteppelanna ti riknana, imbagana kadagiti tagabuna, "Idasaryo ti taraon!" ³² Ita, impagarup dagiti tattao idiay Egipto a maibaba ti dayawda no makipanganda kadagiti Hebreo, isu nga indasaran dagiti tagabu iti taraon ni Jose nga is-isuna, ken indasaranda dagiti dadduma a tattao iti Egipto a nakipangan kenkuana nga is-isuda, ken indasaranda dagiti inauna a kakabsat ni Jose ken ti inaudi a kabsatna nga is-isuda. ³³ Nasdaaw dagiti kakabsatna idi makitada a naurnos dagiti pagtugawanda segun kadagiti tawenda, manipud iti inaudi agingga iti inauna! ³⁴ Idi naidasaren kadakuada dagiti naited a taraonda manipud iti lamisaan ni Jose, maminlima ti kaadu ti taraon a naited kenni Benjamin ngem ti naited a taraon iti siasinoman! Nanganda ngarud ken imminomda iti arak a kaduada ni Jose agingga a kasta unay ti ragsakda.