¹ Idi adda nangibaga kenni Jacob nga adda trigo idiay Egipto a mabalin a gatangen dagiti tattao, kinunana kadagiti putotna a lallaki, "Apay nga agtutugawkayo laeng dita nga agkikinnita? Masapultayo ti trigo!" ² Kinunana kadakuada, "Adda nangibaga kaniak nga adda lako a trigo idiay Egipto. Sumalogkayo sadiay ket gumatangkayo iti agpaay kadatayo, tapno agbiagtayo! ³ Isu a simmalog dagiti sangapulo nga inauna a kakabsat ni Jose iti Egipto tapno gumatang iti trigo. ⁴ Ngem saan nga imbaon ni Jacob ni Benjamin, nga inaudi a kabsat ni Jose, a kumuyog kadagiti dadduma, gapu ta mabuteng isuna nga amangan no adda dakes a mapasamak kenkuana a kas iti napasamak kenni Jose. ⁵ Simmalog ngarud idiay Egipto dagiti putot a lalaki ni Jacob manipud idiay Canaan tapno gumatangda iti trigo, ket napan met dagiti dadduma, gapu ta adda met panagbisin iti Canaan. ⁶ Kadagita a tiempo, ni Jose ti gobernador iti Egipto. Isuna ti naglaklako iti trigo kadagiti tattao nga immay manipud iti entero nga Egipto ken kadagiti naggapu iti sabali a pagilian tapno gumatang ti trigo. Isu nga idi nakasangpet dagiti kakabsat ni Jose, nagpaklebda iti sangoananna. ⁷ Apaman a nakita ni Jose dagiti kakabsatna, nabigbigna ida. Ngem nagpammarang isuna a saanna ida nga am-ammo. Nagsao isuna a sigugubsang kadakuada, kunana, "Sadinno ti naggapuanyo?" Simmungbat ti maysa kadakuada, "Naggapukami iti daga ti Canaan tapno gumatang iti trigo. ⁸ Nupay nabigbig ni Jose dagiti kakabsatna, saanda a nabigbig isuna. ⁹ Ket nalagip ni Jose ti natagtagainepna maipapan kadakuada, adun a tawen ti napalabas. Ngem inkeddengna a saanna pay nga ibaga kadakuada nga isuna ti in-inaudi a kabsatda. Kinunana kadakuada, "Espiakayo! Immaykayo tapno ammoenyo no masalaknibanmi ti bagbagimi no darupendakami!" ¹⁰ Simmungbat ti maysa kadakuada, "Saan, Apo! immaykami tapno gumatang iti trigo. ¹¹ Putotnakami amin iti maymaysa a tao. Mapagtalkankami a lallaki, saankami nga espia." ¹² Kinunana kadakuada, "Saanak a mamati kadakayo! Immaykayo laeng tapno kitaenyo no masalaknibanmi ti bagbagimi no darupendakami!" ¹³ Ngem simmungbat ti maysa kadakuada, "Saan, saan a pudno dayta! Sigud a sangapulo ket duakami nga agkakabsat, putotnakami ti maymaysa a tao. Kadua ti amami ti inaudi a kabsatmi. Natayen ti maysa nga in-inaudi a kabsatmi." ¹⁴ Simmungbat ni Jose, "Agul-ulbodkayo! Ammok a pudno ti imbagak maipanggep kadakayo. Espiakayo! ¹⁵ Ngem daytoy ti pakaammoak a pudno ti ibagbagayo. Isapatak iti nagan ti ari, awan duadua nga espiakayo. Isu a saankayo a makapanaw iti daytoy a lugar agingga nga umay ti inaudi a kabsatyo ditoy! ¹⁶ Mangibaonkayo iti maysa kadakayo a mapan mangala iti inaudi a kabsatyo ket iyegna isuna ditoy. Paibaludko ti dadduma kadakayo tapno maammoak no pudno ti ibagbagayo kaniak. No saan a maiyeg ti maysa nga imbaonyo ti inaudi a kabsatyo ditoy, nalawagto nga agul-ulbodkayo ken espiakayo." ¹⁷ Ket pinaibalud amin ida ni Jose iti tallo nga aldaw. ¹⁸ Iti maikatlo nga aldaw kalpasan dayta, napan ni Jose iti pagbaludan ket kinunana kadakuada, "Maysaak a tao nga adda panagbutengna iti Dios. Mamatiak a dusaennakto ti Dios no saanko nga aramiden ti inkarik. Isu nga aramidenyo ti ibagak kadakayo ket agbiagkayonto. ¹⁹ No mapagtalkankayo a lallaki, bay-anyo a mabati ti maysa a kabsatyo iti pagbaludan, ket mabalin a mangala iti trigo ti dadduma kadakayo ken agsublikayo kadagiti pamiliayo a mabisin unay gapu iti nakaru a panagbisin. ²⁰ Ngem no agsublikayo manen ditoy, masapul nga iyegyo ti inaudi a kabsatyo kaniak, tapno mapaneknekanyo a pudno ti imbagayo kaniak, ken kas pagbanaganna, saankayonton a mapapatay." Immannugotda ngarud nga aramidenda dayta. ²¹ Kinunada iti tunggal maysa, "Awan duadua a gapu iti inaramidtayo iti ub-ubing a kabsattayo a madusdusatayo! Nakitatayo a nagladingit unay isuna idi nagpakaasi kadatayo a saantayo a dangran isuna. Ngem saantayo a dimngeg kenkuana, isu a sagsagrapentayo daytoy a rigat. ²² Kinuna ni Ruben kadakuada,"Imbagak met ngamin idi kadakayo a saanyo a dangran ti ubing, ngem saankayo a dimngeg iti imbagak! Ita, sagsagrapentayon ti panangpataytayo kenkuana." ²³ Kabayatan a makisarsaritada kenni Jose, makisarsaritada iti maysa a mangipatpatarus, ngem idi imbagada dagitoy a banbanag kadagiti bagbagida, agsasaoda iti bukodda a pagsasao. Saanda nga ammo a maawatan ni Jose ti pagsasaoda ken maawatanna ti ibagbagada. ²⁴ Gapu iti imbagada, naamiris ni Jose nga inaklonda a biddut ti inaramidda kenkuana kadagiti napalabas a tawen. Ngem ammona a saanna a malapdan ti panagsangitna ket saanna a kayat a makitada isuna nga agsangit isu a pinanawanna ida ket rimmuar iti siled ken nangrugi nga agsangit. Ngem kalpasanna, nagsubli isuna ket nakisarita manen kadakuada. Innalana ni Simeon, ket kabayatan a kumitkitada, imbagana iti adipenna a galutanda daytoy. Pinanawanna ni Simeon iti pagbaludan ket imbagana kadagiti dadduma a mabalindan ti pumaawn. ²⁵ Imbaga ni Jose kadagiti adipenna a punnoenda iti trigo dagiti sako dagiti lallaki, ngem imbagana pay kadakuada nga ikabilda ti kuarta a pinagbayad ti tunggal maysa iti trigo iti rabaw dagiti sakoda. Imbagana pay kadakuada nga ikkanda ida iti kanenda iti dalan. Kalpasan nga inaramidda dagitoy a banbanag para kadagiti in-inauna a kakabsatna, ²⁶ inkarga dagiti inauna a kakabsatna dagiti trigo kadagiti asnoda ket pimmanawdan. ²⁷ Iti lugar a nagsardenganda tapno maturog iti dayta a rabii, maysa kadakuada ti nanglukat iti sakona tapno ikkanna iti kanen ti asnona. Nasdaaw isuna a nakakita iti kuartana iti rabaw ti sako. ²⁸ Impukkawna kadagiti kakabsatna, "Adda nangisubli iti kuartak! Adda ditoy sakok!" Nagtigergerda iti buteng, ket kinunada iti tunggal maysa, "Ania daytoy nga inaramid ti Dios kadatayo?" ²⁹ Idi nagsublida iti amada idiay daga ti Canaan, imbagada amin kenkuana ti napasamak kadakuada. Kinuna ti maysa kadakuada, ³⁰ "'Sigugubsang unay a nakisarita kadakami ti lalaki a mangimatmaton iti entero a daga ti Egipto. Nagtignay isuna a kasla ages-espiakami iti pagilianna. ³¹ Ngem imbagami kenkuana, 'Mapagtalkankami a lallaki! Saankami nga espia. ³² Sigud a sangapulo ket duakami nga agkakabsat, maymaysa ti amami. Natayen ti maysa, ken kadua ti amami ti inaudi a kabsatmi idiay Canaan.' ³³ Saan a namati kadakami ti lalaki a gobernador ti daga, isu nga imbagana kadakami, 'Kastoy ti pakaammoak no pudno a mapagtalkankayo a lallaki: Ibatiyo ti maysa a kabsatyo kaniak, ket mabalin a mangala ti dadduma kadakayo iti trigo a maipaay kadagiti pamiliayo a mabisbisinan ket agawidkayo. ³⁴ Ngem inton agsublikayo, isurotyo ti inaudi a kabsatyo ket idatagyo kaniak, tapno maammoak a saankayo nga espia, ngem ketdi, mapagtalkankayo a lallaki. Ket wayawayaakto ti kabsatyo kadakayo. Kalpasanna mabalinyon ti gumatang iti uray aniaman a kayatyo iti daytoy a pagilian."' ³⁵ Bayat nga ibukbukbokda ti karga dagiti sakoda, nasdaawda ta adda ti kuarta ti tunggal maysa kadagiti sakoda! Idi nakitada ken ti amada dagiti amin a kuarta, nagbutengda. ³⁶ Kinuna ti amada a ni Jacob kadakuada, "Dakayo ti nakaigapuan a napukaw dagiti dua nga annakko kaniak! Natayen ni Jose, ken awanen ni Simeon! Ket ita kayatyo nga alaen ni Benjamin manipud kaniak! Siak ti agsagsagaba gapu kadagitoy a banbanag a mapaspasamak. ³⁷ Kinuna ni Ruben iti amana, "Isublikto ni Benjamin kenka. Siak ti makaammo kenkuana. No saanko a maisubli ni Benjamin kenka, mabalinmo a patayen dagiti dua a putotko." ³⁸ Ngem kinuna ni Jacob, "Saan, saanko a palubosan ti putotko a ni Benjamin a sumalog sadiay a kaduayo. Natayen ti inauna a kabsatna ket isuna laengen ti nabati kadagiti annak ni Raquel nga asawak! No adda dakes a mapasamak kenkuana kabayatan nga agdaldaliasatkayo, dakayo ti pakaigapuan daytoy a lakay nga agubanen, a matay gapu iti ladingit.