¹ Kalpasan iti naan-anay a dua a tawen, nagtagtagainep ti ari ti Egipto. Iti tagtagainepna, agtaktakder isuna iti igid ti Karayan Nilo. ² Pagammoan, adda nagparang a pito a nalukmeg a baka. Rinugianda ti nangan iti ruot nga adda iti igid ti karayan. ³ Pagammoan, pito a sabali pay a baka, saan a nasalun-at a kitaen ken nakuttong, ti timmakdang a simmaruno kadagitoy manipud iti Karayan Nilo. Nagtakderda iti abay dagiti nalukmeg a baka nga adda iti igid ti karayan. ⁴ Kalpasanna, kinnan dagiti saan a nasalun-at ken nakuttong a baka dagiti pito a nasalun-at a baka. Ket kalpasanna nakariing ti ari. ⁵ Naturog manen ti ari ket adda pay sabali a natagtagainepna. Nakakita isuna iti pito a dawa, nabagas ken natangkenan, a nagtubo amin iti maysa nga ungkay. ⁶ Kalpasan dayta, nakakita ti ari iti pito a sabali pay a dawa a nagrusing iti dayta nga ungkay. Eppes ken nagango dagitoy gapu iti napudot nga angin nga aggapu iti daya. ⁷ Ket inalun-on dagiti eppes a dawa dagiti pito a natangkenan a dawa. Ket nakariing ti ari. Naamirisna a nagtagtaginep isuna. ⁸ Ngem iti kabigatanna, nagdanag isuna maipapan iti kaipapanan ti tagtagainepna. Isu a pinaayabanna amin dagiti salamangkero ken masirib a lallaki nga agnanaed iti Egipto. Imbagana kadakuada ti natagtagainepna, ngem awan kadakuada ti makaibaga iti kaipapanan ti dua a tagtagainep. ⁹ Ket kinuna ti panguloen ti taga-idasar iti inumen ti ari, "Ita, malagipko ti maysa a banag a rumbeng koma nga imbagak kenka! Nagbiddutak ta nalipatak nga imbaga kenka. ¹⁰ Naminsan, nakaungetka kadakami a dua iti panguloen a mangisagsagana iti taraonmo. Isu nga impaibaludnak ken ti panguloen a mangisagsagana iti taraonmo iti balay ti kapitan dagiti guardia iti palasio. ¹¹ Kabayatan iti kaaddami sadiay, nagtagtagainep ti tunggal maysa kadakami iti maysa a rabii, ket nagduma ti kaipapanan dagiti tagtagainepmi. ¹² Adda kaduami sadiay nga agtutubo a lalaki a Hebreo. Adipen isuna ti kapitan dagiti guardia iti palasio. Imbagami kenkuana ti natagtagainepmi, ket imbagana kadakami ti kaipapanan ti tagtagainepmi. Imbagana iti tunggal maysa kadakami ti kaipapanan ti tagtagainepmi. ¹³ Ti napasamak kalpasan dayta ket kapadana unay ti imbagana kadakami a kaipapanan ti tagtagainepmi: Imbagam nga agsubliak manen iti sigud a trabahok, ngem napapatay ti sabali a lalaki babaen iti pannakabitay." ¹⁴ Idi nangngeg ti ari dayta, imbagana kadagiti dadduma nga adipenna nga iyegda ni Jose kenkuana, ket dagus nga inruarda ni Jose iti pagbaludan. Nagibarbas ni Jose ken nagkawes iti napinpintas a kawes ket napan dimmatag iti sangoanan ti ari. ¹⁵ Kinuna ti ari kenni Jose, "Adda dua a tagtagainepko, ken awan ti siasinoman a makaibaga kaniak iti kaipapananda. Ngem adda nangibaga kaniak a no maibaga kenka ti tagtagainep, maibagam iti dayta a tao ti kaipapanan ti tagtagainepna." ¹⁶ Ngem simmungbat ni Jose iti ari, "Saan, saanko a maaramid dayta. Ti Dios ti makaammo iti kaipapanan dagiti tagtagainep, ngem ikkannak iti kabaelan tapno maibagak ti kaipapanan dagiti tagtagainep, ken nasayaatto ti kaipapanan dagitoy." ¹⁷ Kinuna ti ari kenni Jose, "Iti immuna a tagtagainepko, agtaktakderak kampay idi iti igid ti Karayan Nilo. ¹⁸ Pagammoan, adda pito a nalukmeg a baka a timmakdang manipud iti karayan ken inrugida a nagarab iti ruot nga adda iti igid ti karayan. ¹⁹ Pagammoan, adda pito a sabali pay a baka, a naalas ken nakuttong a timmakdang a simmaruno kadakuada manipud iti karayan. Saanak pay a nakakita iti kasta kaalas a baka iti amin a daga ti Egipto. ²⁰ Kinnan dagiti naalas a baka dagiti pito a nalukmeg a baka nga immuna a timmakdang. ²¹ Ngem kalpasanna, awan ti siasinoman a makaammo a kinnan ida dagiti nakuttong a baka, gapu ta naalas latta dagitoy a kas iti sigud a kasasaadda. Kalpasanna ket nakariingak. ²² Kalpasanna, nagtagtagainepak manen iti sabali pay. Nakakitaak iti pito a dawa, nabagas ken natangkenan ti dawa, ken nagtuboda amin iti maysa nga ungkay. ²³ Kalpasanna, masdaawak, a nakakita iti pito a sabali pay a dawa a nagrusing. Eppes ken nagango dagitoy gapu iti napudot nga angin nga agpulpul-oy manipud iti daya. ²⁴ Inalun-on dagiti eppes a dawa dagiti pito a nabagas a dawa. Imbagak dagitoy a tagtagainep kadagiti salamangkero, ngem awan kadakuada ti makaipalawag kaniak iti kaipapananna." ²⁵ Ket kinuna ni Jose iti ari, "Agpada ti kaipapanan dagiti tagtagainepmo. Ipalpaltiing ti Dios kenka babaen kadagiti tagtagainepmo ti aramidennanto. ²⁶ Ibagbagi dagiti pito a nasalun-at a baka ti pito a tawen, ibagbagi met dagiti pito a nasayaat a dawa ti pito a tawen. Agpada ti kaipapanan dagiti dua a tagtagainep. ²⁷ Dagiti pito a nakuttong ken naalas a baka a timmakdang a simmaruno kadakuada ken dagiti pito nga awan serbina a dawa a nagango gapu iti napudot nga angin iti daya ket ibagbagina ti pito a tawen a panagbisin. ²⁸ Mapasamakto daytoy kas imbagak kenka, gapu ta impaltiing ti Dios kenka ti aramidennanto. ²⁹ Addanto pito a tawen a nawadwad ti taraon iti entero a daga ti Egipto. ³⁰ Ngem kalpasan dayta, addanto pito a tawen ti panagbisin. Ket malipatanto dagiti tattao dagiti amin a tawtawen nga adda nawadwad a taraon, gapu ta dadaelen ti umayto a panagbisin ti pagilian. ³¹ Malipatanto dagiti tattao ti napalabas a kinawadwad ti taraon gapu ta nakaronto unay ti panagbisin. ³² Ti makagapu nga inted kenka ti Dios iti dua a tagtagainep ket gapu ta inkeddengnan a mapasamak daytoy, ken ipatungpalnanto daytoy iti mabiit. ³³ Ita, isingasingko a mangpilikayo koma iti tao a masirib ken kabaelanna a mangngeddeng iti nasayaat. Isingasingko a dutokanyo isuna a mangiwanwan iti amin a maaramid iti entero a pagilian. ³⁴ Mangdutokkayo met koma kadagiti mangimaton iti entero a pagilian, tapno urnosenda ti panangurnong iti apagkalima dagiti amin a trigo a maapit kabayatan iti pito a tawen a nawadwad ti taraon. ³⁵ Masapul nga urnongenda dagiti trigo iti pito a tawen nga umay, kabayatan a nawadwad ti taraon. Masapul a mabantayan dagitoy bayat nga agipenpenpenda kadagiti siudad a pagipenpenan ken bayat a banbantayanda daytoy. ³⁶ Masapul a maidulin dagitoy a trigo tapno addanto taraon kabayatan ti pito a tawen a panagbisin ditoy Egipto, tapno saanto a matay gapu iti bisin dagiti tattao iti daytoy a pagilian. ³⁷ Napanunot ti ari ken dagiti opisialesna a nasayaat daytoy a panggep. ³⁸ Isu nga imbaga ti ari kadakuada, "Makasaraktayo kadi pay iti tao a kas kenni Jose a nangtedan ti Dios iti Espirituna?" ³⁹ Kalpasanna, kinuna ti ari kenni Jose, "Gapu ta impaltiing ti Dios kenka amin dagitoy, para kaniak, awanen ti tao a masirib a kas kenka ken sisisirib a mangngeddeng maipapan kadagiti banbanag. ⁴⁰ Isaadka ngarud a mangimaton kadagiti amin a banbanag iti palasiok. Masapul a tungpalen amin dagiti tattao iti Egipto ti ibilinmo. Gapu laeng ta maysaak nga ari a naturturayak ngem sika." ⁴¹ Ket kinuna ti ari kenni Jose, "Isaadkan ita a mangaywan iti entero a pagilian ti Egipto." ⁴² Inikkat ti ari manipud iti ramayna ti singsing nga adda markana, ket inkabilna iti ramay ni Jose. Inikkanna iti pagan-anay a naaramid iti napintass a lupot a lino ken iti balitok a kuentas. ⁴³ Ket pinagluganna ni Jose iti karwahe a nangipakita nga isuna ti maikadua a kapatgan a tao iti pagilian. Idi naglugan ni Jose iti karwahe, nagpukkaw dagiti lallaki kadagiti tattao iti masangoananna, "Agrukobkayo!" Insaad ngarud ti ari ni Jose a mangimaton iti amin a banbanag iti pagilian. ⁴⁴ Kinuna ti ari kenni Jose, "Siak ti ari, ngem awan ti siasinoman iti entero a daga ti Egipto nga agaramid iti aniaman a banag no saanmo nga ipalubos nga aramidenda daytoy. ⁴⁵ Inikkan ti ari ni Jose iti baro a nagan, Zafenat Panea. Intedna met kenkuana ni Asenat nga agbalin nga asawana. Isuna ket putot a babai ni Potifera, a maysa a padi iti templo iti siudad ti On. Iti kastoy a wagas, nagbalin a nalatak ni Jose iti amin a daga ti Egipto. ⁴⁶ Tallopulo ti tawen ni Jose idi nangrugi a nagtrabaho iti ari ti Egipto. Tapno maaramidna ti trabahona, pinanawanna ti palasio ti ari ket nagdaldaliasat iti entero nga Egipto. ⁴⁷ Kabayatan ti simmaruno a pito a tawen, aglaplapusanan ti naapit iti daga, isu nga adda nawadwad a taraon. ⁴⁸ Kabayatan iti panangimaton ni Jose, inurnong dagiti katulonganna ti apagkalima dagiti amin a naapit a trigo kadagidiay a tawtawen ket impenpenda dagitoy kadagiti siudad. Iti tunggal siudad, pinaipenpenna kadagiti katulonganna dagiti trigo a naapit kadagiti talon a nanglawlaw iti dayta a siudad. ⁴⁹ Pinagipenpen ida ni Jose iti adu a trigo. Kasla darat iti igid ti baybay ti kaaduna. Kasta unay ti kaadu ti trigo, nga idi agangay ket insardengdan ti agilista no kasano kaadu ti naipenpen, gapu ta saandan a mabilang ti kaaduna. ⁵⁰ Sakbay a nangrugi ti pito a tawen a panagbisin, naganak ni Asenat nga asawa ni Jose, iti dua nga annak a lallaki. ⁵¹ Pinanaganan ni Jose ti inauna iti Manases, maysa a sao a Hebreo nga iti kayatna a sawen ket "lipaten," gapu ta kinunana, "Tinulongannak ti Dios a manglipat kadagiti amin a rigatko ken iti amin a pamilia ti amak." ⁵² Pinanagananna ti maikadua nga putotna iti Efraim, nga iti kayatna a sawen ket, "tapno maaddaan iti annak," gapu ta kinunana, "Inikkannak ti Dios iti annak iti daytoy a daga a nakaparigatak." ⁵³ Kamaudiananna, nagpatingga ti pito a tawen nga adda nawadwad a taraon. ⁵⁴ Ket nangrugi ti pito a tawen ta panagbisin, kas impadto ni Jose. Adda met panagbisin kadagiti amin nga asideg a daga, ngem numan pay saan a dimmakkel dagiti mula, adda taraon iti uray sadinnoman iti Egipto, gapu kadagiti trigo nga impenpenda kadagiti siudad. ⁵⁵ Idi nakan aminen dagiti tattao dagiti bukodda a taraon ke mabisinda pay laeng, nagpakaasida iti ari para iti taraon. Imbaga ngarud ti ari kadagiti amin a tattao iti Egipto, "Mapankayo kenni Jose ket aramidenyo no ania ti ibagana kadakayo nga aramidenyo." ⁵⁶ Idi nakaro unayen ti panagbisin iti entero a pagilian, minandaran ni Jose dagiti katulonganna a lukatanda dagiti pagipenpenan. Ket naglakoda iti bukel kadagiti pagipenpenan kadagiti tattao ti Egipto, gapu ta nakaro unay ti panagbisin iti entero nga Egipto. ⁵⁷ Immay dagiti tattao manipud kadagiti asideg a pagilian iti Egipto tapno gumatang iti trigo kenni Jose. Gapu ta nakaro ti panagbisin iti uray sadinnoman.