¹ Naglabas iti sumagmamano a tiempo, dua kadagiti opisial ti ari ti Egipto ti nakaaramid iti banag a saan a nasayaat kenkuana. Ti panguloen a taga-idasar iti inumen ti maysa ken ti maysa ket ti panguloen a mangisagsagana iti taraonna. ² Nakapungtot ti ari kadakuada a dua. Isu nga impabaludna ida iti balay ti kapitan dagiti guardia ti palasio. ³ Dayta met laeng ti disso a nakaibuladan ni Jose. ⁴ Nabayag iti pagbaludan dagiti dua a lallaki. Kabayatan ti kaaddada sadiay, dinutokan ti kapitan dagiti guardia ni Jose nga agbalin nga adipenda, a mangiyeg kadakuada kadagiti banbanag a kasapulanda. ⁵ Maysa a rabii, nagtagtagainep ti panguloen a taga-idasar iti inumen ti ari ken ti panguloen a mangisagsagana iti taraon ti ari. Ket agduma ti kaipapanan ti tunggal tagtagainep. ⁶ Kabigatanna, idi immay ni Jose kadakuada, nakitana nga agpadpadada a naliday. ⁷ Isu a sinaludsodna kadakuada, "Apay a nalidaykayo unay ita nga aldaw?" ⁸ Simmungbat ti maysa kadakuada, "Agpadakami a nagtagtagainep idi rabii, ngem awan ti siasinoman a makaibaga kadakami iti kaipapanan dagiti tagtagainep." Kinuna ni Jose kadakuada, "Ti Dios ti makaibaga iti kaipapanan dagiti tagtagainep. Isu nga ibagayo kaniak no ania ti natagtagainepyo ket ibaganto ti Dios kaniak ti kaipapananna." ⁹ Imbaga ngarud ti panguloen a taga-idasar iti inumen ti ari ti tagtagainepna kenni Jose. Kinunana, "Iti tagtagainepko, nakakitaak iti puon ti ubas iti sangoanak. ¹⁰ Iti puonna, adda tallo a sanga. Nagsaringit dagiti sanga, ket nagsabongda, ket kalpasanna nagbungada kadagiti raay ti ubas. ¹¹ Ig-iggamak kampay idi ti kopa ti ari, isu a pinurosko dagiti naluom nga ubas ket pinespesko ti tubbogna iti kopa. Kalpasanna intedko ti kopa iti ari tapno inumenna ti tubbog." ¹² Dagus nga imbaga ti Dios kenni Jose ti kaipapanan ti tagtagainep. Isu a kinuna ni Jose kenkuana, "Daytoy ti kaipapanan iti tagtagainepmo: Iladladawan dagiti tallo a sanga ti tallo nga aldaw. ¹³ Iti uneg ti tallo nga aldaw, wayawayaannakanto ti ari manipud iti pagbaludan. Isublinakanto iti sigud a trabahom. Iyawatmonto dagiti kopa ti arak iti ari a kas iti sigud nga ar-aramidem, idi taga-idasarnaka pay laeng iti inumenna. ¹⁴ Ngem inton nakaruarkan iti pagbaludan ken nasayaaten amin a banbanag para kenka, pangngaasim ta saannak koma met a liplipatan. ¹⁵ Pinilitdak nga inyadayo dagiti tattao manipud iti pagnanaedan dagiti padak a Hebreo. Awan ti inaramidko a biddut sadiay, ken kasta met a kabayatan nga addaak ditoy Egipto, awan ti inaramidko a rumbeng koma a pakaibaludak. Isu nga ipakitam met koma ti kinasayaatmo kaniak ket ibagam iti ari ti maipapan kaniak, tapno wayawayaannak iti daytoy a pagbaludan!" ¹⁶ Idi nangngeg ti panguloen a mangisagsagana iti taraon ti ari nga iti kaipapanan ti tagtagainep ti panguloen a taga-idasar iti inumen ti ari ket nasayaat unay para iti panguloen a taga-idasar iti inumen, kinunana met kenni Jose, "Naaddaanak met iti tagtagainep. Iti tagtagainepko, nagsiddaawak a nakakita iti tallo a basket ti tinapay a nakaparabaw iti ulok. ¹⁷ Iti akinrabaw a basket, adda iti adu nga agduduma a kita ti naluto a taraon a maipaay iti ari, ngem kankanen dagiti billit dagitoy manipud iti akinrabaw a basket a nakaparabaw iti ulok." ¹⁸ Imbaga manen ti Dios kenni Jose ti kaipapanan ti tagtagainep, isu a kinunana, "Dagiti tallo a basket ket iladladawanna met ti tallo nga aldaw. ¹⁹ Iti uneg ti tallo nga aldaw, ibilinto ti ari a maputed ti ulom. Kalpasanna maibitinto ti bagim iti maysa a kayo ket umayto dagiti buitre ket kanendanto ti lasagmo." ²⁰ Iti maikatlo nga aldaw kalpasan dayta ket isu ti panagkasangay ti ari. Inawis ti ari dagiti amin nga opisialna iti dayta nga aldaw tapno rambakanda ti panagkasangayna. Bayat iti panagramrambakda, kabayatan a naurnongda amin sadiay, pinaayaban ti ari ti panguloen a taga-idasar ti inumen ken ti panguloen a taga-isagana iti taraonna manipud iti pagbaludan. ²¹ Imbagana a ti panguloen a taga-idasar iti inumenna ket maisubli manen iti sigud a trabahona, isu nga inrugina manen ti mangiyawat kadagiti kopa ti arak iti ari. ²² Ngem imbilinna a mapapatay ti panguloen a mangisagsagana iti kanenna babaen iti pannakaibitin, kas iti kinuna ni Jose a mapasamakto idi imbagana kadagiti dua a lallaki ti kaipapanan dagiti tagtagainepda. ²³ Ngem saanen a napanunot ti panguloen a taga-idasar ti inumen ti maipapan kenni Jose. Ngem ketdi, nalipatanna nga aramiden ti kinniddaw ni Jose kenkuana nga aramidenna.