¹ Kabayatanna, insalog dagiti kaputotan ni Ismael ni Jose idiay Egipto. Ginatang ni Potifar isuna kadakuada sadiay. Maysa nga Egipcio ni Potifar a maysa kadagiti opisial ti ari ken kapitan dagiti guardia iti palasio ti ari. ² Gapu ta tinulungan ni Yahweh ni Jose, naaramid iti nasayaat unay dagiti trabahona. Nagtrabaho isuna iti balay ti apona nga Egipcio. ³ Nakita ni Potifar a tultulongan ni Yahweh ni Jose ken pagbalballigienna iti amin a banag nga ar-aramidenna. ⁴ Naay-ayo ni Potifar kenni Jose, isu a dinutokanna nga agbalin a bukodna nga adipen. Kalpasanna, dinutokanna ni Jose a mangimaton kadagiti amin a banag iti pagtaenganna ken kadagiti amin a sanikuana. ⁵ Manipud iti tiempo a dinutokan ni Potifar ni Jose a mangimaton kadagiti amin a banag iti pagtaenganna ken amin a kukuana, binendisionan ni Yahweh dagiti tattao nga agnanaed iti balay ni Potifar gapu kenni Jose. Pinadakkel pay a nasayaat ni Yahweh dagiti mulmula ni Potifar. ⁶ Impalubos ni Potifar a ni Jose ti mangimaton kadagiti amin a sanikuana. Maipapan laeng iti taraon ni Potifar a masapul a mangngeddeng isuna. Saanna a pagdanagan ti maipapan iti aniaman pay iti balayna. Ita, nataer ken nabaked ni Jose. ⁷ Gapu iti dayta, iti saan nga nagbayag, nangrugi a nakayawan ti asawa ni Potifar kenni Jose. Isu nga iti maysa nga aldaw, kinunana, "Kaiddaennak." ⁸ Ngem nagkedked ni, a kinunana iti asawa ti amona, "Dumngegka! Saan a pakadangan ti apok ti maipapan iti aniaman iti daytoy a pagtaengan. Dinutokannak a mangimaton kadagiti amin a banag a kukkuana. ⁹ Awan ti siasinoman iti daytoy a pagtaengan a naturturay ngem siak. Ti laeng banag a saanna nga impalubos a pakibiangak ket sika, gapu ta asawanaka! Kasano ngarud a maaramidko daytoy a kinadakes a kidkiddawem nga aramidek? Makabasolak pay iti Dios no aramidek dayta!" ¹⁰ Inaldaw a kidkiddawenna kenni Jose a kaiddaenna isuna, ngem nagkedked ni Jose. Saanna pulos a kayat nga uray umasideg laeng koma kenkuana. ¹¹ Maysa nga aldaw, simrek ni Jose iti balay tapno aramidenna ti trabahona, ken awan kadagiti dadduma nga agtagtagibalay nga adipen ti adda iti balay. ¹² Ginammatan ti asawa ni Potifar ti kawes ni Jose ket kinunana, "Kaiddaennak!" Timmaray ni Jose a rimmuar iti balay, ngem ti kawesna ket adda pay laeng iti ima ti babai! ¹³ Idi nakita ti asawa ni Potifar a nagtaray a rimmuar ni Jose ket pinanawanna ti kawesna iti ima daytoy, ¹⁴ inayabanna dagiti agtagtagibalay nga adipen. Kinunana kadakuada, "Kitaenyo, daytoy a tao a Hebreo nga insangpet ti asawak kadatayo ket lalaisennatayo! Simrek iti ayanko ket pinadasnak a piliten a makikaidda kenkuana, ngem nagikkisak iti nakapigpigsa. ¹⁵ Apaman a nangegna a nagikkisak, imbatina ti kawesna kaniak ket nagtaray a rimmuar!" ¹⁶ Indulinna ti kawes iti sibayna inggana a simmangpet iti balay ti asawana nga apo ni Jose. ¹⁷ Ket imbagana kenkuana daytoy nga istoria: "Dayta a tagabu a Hebreo nga insangpetmo ditoy ket simrek iti ayanko ket pinadasnak a piliten a makikaidda kenkuana! ¹⁸ Ket idi nagikkisak ti nakapigpigsa, timmaray a rimmuar, a pinanawanna ti kawesna iti sibayko!" ¹⁹ Idi nangngeg ni Potifar nga amo ni Jose daytoy nga istoria ti asawana nga impulongna kenkuana, ken idi kinunana, "Kastoy ti panangtrato kaniak ti tagabum," Nakapungtot isuna iti kasta unay. ²⁰ Innalana ni Jose ket pinaibaludna iti lugar a nakaibaludan dagiti balud ti ari, ket nagtalinaed ni Jose sadiay. ²¹ Ngem nagimbag ni Yahweh kenni Jose ken tinulonganna daytoy gapu iti tulagna kadagiti kapuonan ni Jose; isu ti nakaigappuanna a naay-ayo kenkuana ti agbanbantay iti pagbaludan. ²² Impaaywan ngarud iti agbanbantay iti pagbaludan kenni Jose dagidiay amin nga adda iti pagbaludan, ken makaammo isuna kadagiti amin a trabaho a maaramid sadiay. ²³ Awan ti pagdanagan ti agbanbantay kadagiti aniaman nga ay-aywanan ni Jose, gapu ta tultulungan ni Yahweh ni Jose a mangaramid iti amin a trabahona iti nasayaat.