¹ Iti dayta a tiempo, pinanawan ni Juda dagiti inauna ken inaudi a kakabsatna ket simmalug manipud iti turod a pagilian ket nakipagnaed iti maysa a lalaki nga agnanaed idiay Adullam. Hiram ti naganna. ² Naam-ammona sadiay ti maysa a babai a putot ni Sua a maysa a taga-Canaan. Inasawana ti babai ket kinaiddana. ³ Nagsikog isuna ket nagpasngay iti maysa a lalaki. Pinanaganan isuna ti amana iti Er. ⁴ Nagsikog manen isuna ket impasngayna ti maysa a lalaki, a pinanagananna iti Onan. ⁵ Kalpasan ti adu a tawen, idi nagnaed ni Juda ken ti pamilyana idiay Kezib, nagpasngay ti asawa ni Juda iti maysa pay a lalaki. Pinanagananna daytoy iti Sela. ⁶ Idi dimmakkkel ni Er nga inauna a putot ni Juda, inyalaan isuna ni Juda iti asawaenna, maysa a babai nga agnagan ti Tamar. ⁷ Ngem nangaramid ni Er iti banag nga imbilang ni Yahweh a nakadakdakes unay, isu a ginibusan ni Yahweh ti biagna. ⁸ Ket kinuna ni Juda kenni Onan, "Natay ti inauna a kabsatmo a saan a naaddaan ti annak. Isu nga asawaem ti asawa daydi inauna a kabsatmo ket kaiddaem. Dayta ti dawdawaten ti kaugalliantayo a rumbeng nga aramidem." ⁹ Ngem ammo ni Onan a no aramidenna dayta, siasinoman nga ubing a maipasngay ket saan a maibilang a kukuana. Isu a tunggal kaiddaenna ti asawa daydi inauna a kabsatna, ibelbellengna ti kissitna iti daga tapno saan a masikogan ni Tamar ken saan a maaddaan iti annak para iti inauna a kabsatna. ¹⁰ Imbilang ni Yahweh a nakadakdakes ti inaramidna isu a ginibusan met laeng ni Yahweh ti biagna. ¹¹ Ket kinuna ni Juda kenni Tamar a manungangna, "Agsublika iti balay ti amam, ngem saanka a makias-asawa iti siasinoman. Inton dumakkel ti buridek nga putotko a ni Sela, mabalinnaka nga asawaen." Ngem saan a pudno a kayat ni Juda nga asawaen ni Sela ni Tamar, gapu ta mabuteng isuna a matayto met laeng daytoy a kas kadagiti inauna a kakabsatna. Tinungpal ngarud ni Tamar ni Juda ket nagsubli iti balay ti amana tapno agnaed manen sadiay. ¹² Kalpasan iti sumagmamano a tawen, natay ti asawa ni Juda a putot ni Sua. Idi nalpas ti tiempo a panangdungdung-aw kenkuana, inkeddeng ni Juda a mapan idiay Timnat, iti lugar a pangpukpukisan dagiti tattaona kadagiti karnerona. Simmurot kenkuana ti gayyemna a taga-Adullam a ni Hiram. ¹³ Adda iti nangibaga kenni Tamar, "Mapan ti katugangam idiay Timnat tapno tulunganna dagiti tattao a mangpukpukis kadagiti karnerona." ¹⁴ Naamirisna a dimmakelen ita ni Sela ngem saan nga inted ni Juda isuna kenni Sela tapno agbalin nga asawana. Isu nga inikkatna ti kawes ti kinabalona ket inabbunganna ti ulona iti naingpis a lupot tapno saan isuna a mabigbig dagiti tattao. Ket nagtugaw isuna iti pagserkan nga agturong idiay Enaim, nga adda iti dalan nga agturong idiay Timnat. ¹⁵ Idi sumungad ni Juda ket nakitana isuna, impagarupna a balangkantis isuna gapu ta inabbunganna ti ulona ken nagtugaw iti kanayon a pagtugtugawan dagiti balangkantis. Saan a naamiris ni Juda nga isuna ti manugangna. ¹⁶ Isu a kinunana kenkuana, "Palubosannak a makikaidda kenka." Simmungbat ni Tamar, "Ania ti itedmo kaniak a kas kasukatna?" ¹⁷ Simmungbat isuna, "Patuludanka ti urbon a kalding manipud iti arban dagiti kaldingko." Sinaludsod ni Tamar, "Ikkannak kadi ita iti banag nga idulinko agingga nga ipatulodmo ti kalding?" ¹⁸ Simmungbat ni Juda, "Ania ti kayatmo nga itedko kenka?" Simmungbat ni Tamar, "Itedmo kaniak dayta singsing a nasuratan iti naganmo a naitali dita tengngedmo ken itedmo dayta sarukodmo nga ig-iggamam." Intedna ngarud dagitoy kenkuana. Kalpasanna, kinaiddana daytoy ket nagsikog ni Tamar. ¹⁹ Kalpasan a pimmanaw isuna, inikkatna ti abbongna ken inkawesna manen ti kawes ti kinabalona. ²⁰ Inted ni Juda ti urbon a kalding iti gayyemna nga Adulamita tapno ipanna daytoy iti babai kas inkarina. Ngem saan a nabirukan ti gayyemna ti babai. ²¹ Isu a nagsaludsod ti gayyemna kadagiti tattao nga agnanaed sadiay, "Sadino ti ayan ti balangkantis a nakatugaw iti dalan ti Enaim?" Simmungbatda, "Awan pay pulos ti balangkantis ditoy!" ²² Nagsubli ngarud isuna kenni Juda ket kinunana, "Saanko a nabirukan ti babai. Kinuna pay dagiti tattao nga agnanaed idiay nga ili, 'Awan pay pulos ti balangkantis ditoy!"' ²³ Kinuna ni Juda, "Mabalinna nga idulin dagiti banbanag nga intedko kenkuana. No ituloyta ti mangbiruk kenkuana, amangan no laisendata dagiti tattao." Pinadasko nga impatulod daytoy nga urbon a kalding kenkuana ngem saanmo met a nasarakan isuna tapno itedmo koma daytoy kenkuana." ²⁴ Kalpasan ti tallo a bulan, adda iti nangipadamag kenni Juda, "Nagbalin a balangkantis ni Tamar a manugangmo, ket masikog isuna ita!" Kinuna ni Juda, "iparangguyodyo isuna manipud iti siudad ket puoranyo isuna agingga a matay!" ²⁵ Ngem kabayatan nga iruruarda isuna manipud iti siudad, inted ni Tamar ti singsing ken ti sarukod iti maysa a tao, ket kinunana nga itedna dagitoy kenni Juda ken ibagana kenkuana a, "Ti akin-kukua kadagitoy a banbanag ti nangsikog kaniak." Kinunana pay kenkuana nga ibagana kenni Juda, "Kitaem daytoy a singsing ken ti tali a naigalot iti daytoy, ken daytoy a sarukod. Akin-kukua kadagitoy?" ²⁶ Idi inaramid ti lalaki dayta, nabigbig ni Juda ti singsing ken ti sarukod. Kinunana, "Nalinlinteg isuna ngem siak. Saanko nga imbaga iti putotko a ni Sela nga asawaenna ni Tamar, a kas iti inkarik nga aramidek." Ket saanen a kinaidda pay ni Juda daytoy. ²⁷ Idi tiempon iti panaganakna, nasdaaw isuna gapu ta singin a lallaki ti adda iti aanakanna. ²⁸ Kabayatan nga agan-anak isuna, inruar ti maysa ti imana. Isu a nangigalut ti agpapaanak iti nalabbaga a sinulid iti imana, ket kunana, "Daytoy ti immuna a rimmuar." ²⁹ Ngem insubli ti maladaga ti imana iti aanakan ket immuna a rimmuar ti kabsatna. Isu a kinuna ti agpapaanak, "Kastoy ti wagas no kasanoka a nakiinnuna a rimmuar!" Isu a pinanagananna daytoy iti Perez, a kaun-uni ti Hebreo a sao a ti kayatna a sawen ket "nakiinnuna a rimmuar." ³⁰ Ket rimmuar ti inaudi a kabsatna a nagalutan ti imana iti nalabbaga a sinulid. Ket napanaganan daytoy iti Zera, a kaun-uni ti Hebreo a sao a ti kayatna a sawen ket "kinalabbaga ti parbangon."