¹ Nagtultuloy a nagnaed ni Jacob iti daga ti Canaan a nagnaedan idi ti amana. ² Kastoy ti napasamak iti pamilia ni Jacob. Idi agtawen iti sangapulo ket pito ti putotna a ni Jose, ay-aywananna dagiti arban dagiti karnero ken kalding a kaduana dagiti dadduma nga inauna a kakabsatna. Annak ida dagiti assawa ti amana a da Bilha ken Zilpa. Imbaga ni Jose iti amana dagiti dakes nga ar-aramiden dagiti kakabsatna. ³ Ad-adda ti panangipateg ni Jacob kenni Jose ngem iti siasinoman kadagiti dadduma a putotna, gapu ta naiyanak ni Jose idi lakayen ni Jacob. Nagpaaramid ni Jacob iti napintas a kawes nga atiddog ti manggasna para kenni Jose. ⁴ Idi naamiris dagiti inauna a kakabsat ni Jose nga ad-adda ti panangipateg ti amada kenkuana ngem iti panangipategna iti siasinoman kadakuada, ginurada isuna. Saanda a pulos a nakisarita kenkuana iti nasayaat. ⁵ Iti maysa a rabii, nagtagtagainep ni Jose. Imbagana kadagiti kakabsatna ti maipapan iti tagtagainepna nga isu ti ad-adda pay a nangguraanda kenkuana. Kastoy ti napasamak: ⁶ Kinunana kadakuada, "Dumngegkayo iti natagtagainepko! ⁷ Iti tagtagainep, mangrepreppettayo kampay idi kadagiti trigo idiay talon. Pagammoan, timmakder ti rineppetko ket linikmut dagiti rineppetyo ti rineppetko ken nagrukobda iti daytoy!" ⁸ Kinuna dagiti kakabsatna kenkuana, "Ipagarupmo kadi nga idaulloannakaminto iti maysa nga aldaw? Agbalinkanto kadi nga arimi?" Ad-adda pay a ginurada isuna gapu iti imbagana kadakuada maipapan iti tagtagainepna. ⁹ Kalpasanna, nagtagtagainep isuna iti sabali pay, ket imbagana manen ti maipapan iti daytoy kadagiti inauna a kakabsatna. Kinunana, "Dumngegkayo iti daytoy! Adda manen sabali pay a tagtagainepko. Iti tagtagainepko, agrukrukob ti init, bulan ken dagiti sangapulo ket maysa a bituen kaniak!" ¹⁰ Imbagana met iti amana ti maipapan iti daytoy. Tinubngar isuna ti amana a kunana, "Ania ti kayatmo a sawen iti dayta a tagtagainep? Kayatmo kadi a sawen nga agrukobak ken ti inam ken uray pay dagiti inauna a kakabsatmo kenka?" ¹¹ Ginura dagiti inauna a kakabsat ni Jose isuna, ngem panpanunoten latta ti amana no ania ti mabalin a kaipapanan ti tagtagainep. ¹² Maysa nga aldaw, napan dagiti inauna a kakabsat ni Jose idiay Sikem tapno aywananda dagiti karnero ken dagiti kalding ti amada nga adda idiay taltalon nga asideg iti Sikem. ¹³ Iti saan a nagbayag, kinuna ni Jacob kenni Jose, "Ay-aywanan dagiti kakabsatmo dagiti karnero ken dagiti kalding idiay asideg ti Sikem. Ibaonka a mapan mangkita kadakuada sadiay." Simmungbat ni Jose, "Mapanak." ¹⁴ Kinuna ni Jacob, "Inka kitaen no addada iti nasayaat a kasasaad ken no nasayaat dagiti arban." Kalpasanna, agsublika ket pakaammoannak." Imbaon ngarud ni Jacob ni Jose manipud iti tanap a pagnanaedanda, ti tanap a pakasarakan iti Hebron, tapno mapanna biruken dagiti kakabsatna. Ket nakadanon ni Jose iti asideg ti siudad ti Sikem. ¹⁵ Kabayatan nga agalla-alla isuna idiay taltalon a mangbirbiruk kadagiti kakabsatna, nakita isuna ti maysa a lalaki ket sinaludsodna, "Siasino ti sapsapulem?" ¹⁶ Simmungbat ni Jose, "Sapsapulek dagiti inauna a kakabsatko a lallaki. Mabalin kadi nga ibagam no sadino ti pangay-aywananda kadagiti karnero ken kadagiti kaldingda?" ¹⁷ Simmungbat ti lalaki, "Awanda ditoyen. Nagngngegko nga ibagbaga ti maysa kadakuada, 'Alaentayo dagiti karnero ken dagiti kalding ket mapantayo idiay ili ti Dotan."' Pimmanaw ngarud ni Jose idiay ket nagpa-amianan ket nasarakanna dagiti inauna a kakabsatna iti asideg ti Dotan. ¹⁸ Ngem nakitada ni Jose idi adayo pay laeng isuna ket inkeddengda a papatayen isuna. ¹⁹ Kinunada iti tunggal maysa, "Um-umayen dayta a managtagtagainep!" ²⁰ Umaykayo ta patayentayo isuna ket ibillengtayo ti bagina iti maysa kadagiti abut! Kalpasanna, ibagatayo kadagiti tattao a dinarup ken pinatay isuna iti narungsot nga ayup ket kinnanna isuna. Ket kalpasanna, ammoentayo no pumudno dagiti tagtagainepna!" ²¹ Nangngeg ni Ruben ti ibagbagada isu a pinadasna ida nga allukuyen a saanda a patayen ni Jose. Kinunana, "Saan, saan a rumbeng a patayentayo isuna." ²² Saanyo a patayen isuna! Mabalintayo nga ipurwak isuna iti abut nga adda idiay disierto, ngem saan a rumbeng a dangrantayo." Imbagana dayta ket kalpasanna, pinanawanna ida, pangpanggepenna nga ispalen ni Jose ken isublina daytoy iti amana. ²³ Idi nakasangpet ni Jose iti ayan dagiti inauna a kakabsatna, tinengngelda isuna ket rinay-abda ti kawesna nga atiddog ti manggasna. ²⁴ Kalpasanna, innalada isuna ket intinnagda iti abut. Ita, namaga ken awan danum iti abut. ²⁵ Kalpasan a nagtugawda a mangan, kimmitada ket nakitada ti bunggoy dagiti kaputotan ni Ismael a sumungsungad a naggapu idiay Galaad. Awit dagiti kamelioda dagiti pagkargaan a naglaon kadagiti pangrekado ken bangbanglo. Agturongda idiay Egipto nga aglako kadagidiay a banbanag sadiay. ²⁶ Kinuna ni Juda kadagiti inauna ken kadagiti inaudi a kakabsatna, "No patayentayo ti ub-ubing a kabsattayo ken ilemmengtayo ti bagina, ania ngay ti maganabtayo? ²⁷ Isu nga imbes a dangrantayo, ilakotayo ketdi kadagiti kaputotan ni Ismael. Saanyo a liplipatan, adingentayo isuna!" Immanamongda ngarud amin a mangaramid iti dayta. ²⁸ Idi nakaasidegen dagiti agtagtagilako a Midianita, inyaon dagiti kakabsat ni Jose isuna manipud iti abut. Kalpasanna, inlakoda kadagiti Midianita iti duapulo a pirak. Innala ngarud dagiti agtagtagilako ni Jose ket impanda idiay Egipto. ²⁹ Idi nagsubli ni Ruben iti abut, nakitana nga awanen ti ub-ubing a kabsatna sadiay. Napalalo unay ti ladingitna ket uray na la pinigis ti kawesna. ³⁰ Nagsubli isuna kadagiti inaudi a kakabsatna ket kinunana, "Awanen ti ubing iti abut! Ania ngay ti rumbeng nga aramidek ita?" ³¹ Saanda a maitured nga ibaga iti amada no ania ti inaramidda. Isu nga inkeddengda nga agaramid iti istorya a maipapan iti napasamak. Innalada ti adda manggasna a kawes ni Jose. Kalpasanna, nangpatayda iti kalding ket insaw-sawda ti kawesna iti dara ti kalding. ³² Impanda ngarud dayta iti amada ket kinunada, "Nabirukanmi daytoy! Kitaem. Kawes kadi daytoy ti anakmo?" ³³ Nabigbigna daytoy ket kinuna, "Wen, kawes daytoy ti anakko! Nalabit a dinarup isuna ti narungsot nga ayup ket pinatayna isuna! Masiguradok a rinangrangkayen ti narungsot nga ayup ni Jose!" ³⁴ Naladingitan unay ni Jacob ket uray na la rinay-abna ti kawesna. Nagkawes isuna iti nakersang a lupot. Nagdung-aw isuna. ³⁵ Immay dagiti amin a putotna tapno liwliwaenda ngem saanna nga inkaskaso dagiti imbagada. Kinunana, "Saan, agladingitakto latta uray inton matayak, ken mapanak iti anakko." Nagtultuloy ngarud a nagsangsangit ti ama ni Jose gapu iti napasamak iti putotna. ³⁶ Kabayatanna, impan met dagiti Midianita ni Jose idiay Egipto ket inlakoda isuna kenni Potifar, a maysa kadagiti opisial ti ari. Isuna ti mangidadaulo kadagiti soldado a mangsalsalaknib iti ari.