¹ Inarakup ni Jose ti rupa ti amana nga inyasidegna ti rupa iti amana ket nagsangit ken inagkanna isuna. ² Binilin ni Jose dagiti adipen a taga-isagana iti natay para iti pannakaitabon a balsamoenda ti bagi ti amana tapno saan a bumangsit, ken balkotenda iti akikid a lupot. ³ Kasta ngarud ti inaramid dagiti agbalbalsamo. Immabot iti uppat a pulo nga aldaw ti panangbalsamo iti bagi ni Jacob gapu ta dayta ti umno a tiempo a balsamoen ti maysa a bagi. Nagsangit iti pitopulo nga aldaw dagiti Egipcio gapu iti ipapatay ni Jacob. ⁴ Idi nalpasen ti tiempo ti panadung-aw, kinuna ni Jose kadagiti opisial ti ari, "No maay-ayokayo kaniak, pangngaasiyo ta ibagayo daytoy a mensahe iti ari: ⁵ Idi dandanin a matay ti amak, pinagsapatanak nga itabonkonto ti bagina idiay Canaan, iti tanem nga insaganana. Isu a pangngaasim ta palubosannak a sumang-at idiay Canaan tapno itabonko ti bagi ti amak. Ket agsubliakto."' ⁶ Kalpasan nga intedda ti mensahe iti ari, simmungbat isuna, "Ibagayo kenni Jose, "Sumang-atka ket itabonmo ti bagi ti amam, kas insapatam nga aramidem."' ⁷ Napan ngarud ni Jose idiay Canaan tapno itabonna ti bagi ti amana. Kimmuyog kenkuana dagiti amin nga opisial ti ari, amin dagiti mammagbaga ti ari, ken amin a panglakayen iti Egipto. ⁸ Nagbati dagiti babassit nga ubbing iti pamiliada, ken dagiti karneroda, dagiti kalding, ken dagiti bakada idiay rehion ti Goshen. Ngem kimmuyog kenkuana amin dagiti dadduma a pamilia ni Jose ken dagiti kakabsatna a lallaki ken ti pamilia ti amana. ⁹ Kimmuyog met dagiti lallaki nga agluglugan kadagiti karwahe ken dagiti agsaksakay iti kabalyo. Dakkel unay daytoy a bunggoy. ¹⁰ Napanda iti daya ti Karayan Jordan ket dimtengda idiay Atad. Adda maysa a lugar sadiay a pagirikan dagiti tattao tapno maisina ti trigo manipud iti taep. Nagsangitda sadiay iti napigsa para kenni Jacob iti nabayag a tiempo. Nagaramid ni Jose iti seremonia ti panagladingit a maipaay iti amana iti pito nga aldaw. ¹¹ Idi nakita dagiti bunggoy ti Canaanita nga agnanaed sadiay ti kasta a panagladingitda, kinunada, "Daytoy ket maysa a lugar a pagladingitan dagiti tattao ti Egipto!" Isu a pinanagananda daytoy a lugar iti Abel Mizraim a kaun-uni ti sao iti Hebreo nga iti kayatna a sawen ket "panagladingit dagiti Egipcio." ¹² Ket inaramid dagiti putot a lallaki ni Jacob no ania ti imbilin ti amada kadakuada. ¹³ Binallasiwda ti Karayan Jordan ket impanda ti bagi ni Jacob idiay Canaan. Intabonda daytoy iti rukib nga adda iti talon idiay Macpela, nga adda iti daya ti ili ti Mamre. Dayta a talon ti ginatang ni Abraham manipud kenni Efron, a Heteo, a mausar a pagitaneman. ¹⁴ Kalpasan nga intabonna ti amana, nagsubli idiay Egipto ni Jose agraman dagiti kakabsatna ken amin a simmurot kenkuana idiay Canaan a nakipamunpon. ¹⁵ Kalpasan a natay ni Jacob, nagdanag dagiti kakabsat ni Jose. Naamirisda ti mabalin a mapasamak. Kinunada, "Anianto ti mapasamak no kaguranatayo ni Jose ket padasenna ti agibales gapu kadagiti amin a dakes a banbanag nga inaramidtayo kenkuana iti napalabas a tawtawen?" ¹⁶ Isu nga nangibaonda iti maysa a tao a mangibaga iti daytoy kenni Jose para kadakuada: "Sakbay a natay ti amatayo, imbagana kadakami daytoy: ¹⁷ 'Ibagam kenni Jose, Pangngaasim ta pakawanem dagiti inauna a kakabsatmo iti dakes nga inaramidda kenka, ti nakaro a basol nga inaramidda kenka, gapu ta ti inaramidda kenka ket biddut unay.' Isu a dakami nga adipen ti Dios ti amam, dawatenmi daytoy kenka, pangngaasim ta pakawanennakami iti inaramidmi kenka." Nagsangit ni Jose idi naawatna ti mensaheda. ¹⁸ Kalpasanna, immay dagiti inauna a kakabsatna ket nagpaklebda iti daga iti sangoanan ni Jose, ket kinuna iti maysa kadakuada, "Pangngaasim ta dumngegka: agbalinkami nga adipenmo." ¹⁹ Ngem simmungbat ni Jose kadakuada, "Saankayo nga agbuteng! Ti Dios ti mangdusdusa kadagiti tattao; Siak kadi ti Dios? ²⁰ No maipapan kadakayo, wen, kinayatyo ti nagaramid iti dakes unay kaniak. Ngem manipud iti daytoy, nangpataud ti Dios iti naimbag! Kayatna nga ispalen dagiti adu a tattao manipud iti ipapatay gapu ti bisin, ket dayta iti napasamak. Ita ket sibibiagda! ²¹ Isu nga ibagak manen, saankayo nga agbuteng! Siguradoek kadakayo nga addanto iti umdas a kanenyo ken kasta met dagiti annakyo." Iti kasta a wagas, pinapigsana ti pakinakemda ken pinukawna ti panagdandanagda. ²² Nakipagnaed ni Jose kadagiti pamilia ti amana idiay Egipto agingga a nagtawen isuna iti sangagasut ket sangapulo. ²³ Nagbiag isuna iti nabayag ket nakitana pay dagiti putot ni Efraim ken dagiti appokona. Dagiti putot ti apoko ni Jose a ni Makir, a putot ni Manases ket naiyanak sakbay a natay ni Jose, ken nabigbigda a kas kaputotanna. ²⁴ Maysa nga aldaw, kinuna ni Jose kadagiti kakabsatna, "Dandanin ti ipapatayko. Ngem awan duadua a tulungannakayonto ti Dios. Dumtengto ti aldaw ket idauloanna dagiti kaputotanyo a rumuar iti daytoy a daga ket ipanna ida idiay Canaan, ti daga nga inkarina nga ited kenni Abraham, kenni Isaac ken kenni Jacob." ²⁵ Kalpasanna, kinuna ni Jose, "Inton ikkannakayo ti Dios iti kabaelan a mangaramid iti dayta, masapul nga itugotyo ti bagik manipud ditoy ket ipanyo idiay Canaan." Pinagkarina a sipapasnek dagiti inauna a kakabsatna nga aramidenda dayta. ²⁶ Natay ngarud ni Jose idiay Egipto idi sangagasut ket sangapulo ti tawenna. Nabalsamo ti bagina ket nailungon sadiay.