¹ Kalpasanna, naitipon met laneg ni Jacob kadagiti kameng ti pamiliana. Idi mumalemen iti dayta nga aldaw, timmangad ni Jacob ket nakitana a sumungsungad ni Esau, ken adda kaduana nga uppat a gasut a lallaki (400). Nagdanag ni Jacob gapu iti dayta, isu a pinagsisinana dagiti ubbing. Impakuyogna kenni Lea dagiti bukodna nga annak, kenni Raquel ti bukodna nga anak, ken dagiti annak dagiti dua a tagabu kadagiti innada. ² Pinaunana dagiti dua a tagabu a babbai ken dagiti annakda. Insarunona ni Lea ken dagiti annakna. Inyud-udina da Raquel ken Jose. ³ Immun-una isuna ngem kadakuada amin, ket kabayatan nga intuloyna ti iyaasidegna iti in-inauna a kabsatna, nagpakleb isuna iti naminpito a daras. ⁴ Ngem nagtaray a simmabat ni Esau kenni Jacob. Inarakupna daytoy, inapungolna ti tengngedna, ken inagkanna ti pingpingna. Ket nagsangitda nga agpada. ⁵ Idi kimmita ni Esau ket nakitana dagiti babbai ken dagiti ubbing. Sinaludsodna, "Siasino dagitoy a tattao a kaduam?" Simmungbat ni Jacob, "Dagitoy dagiti assawa ken annak nga imparabur ti Dios kaniak." ⁶ Ket immasideg ken nagrukob iti sangngoanan ni Esau dagiti tagabu a babbai ken dagiti annakda. ⁷ Simmaruno nga immay ni Lea ken dagiti annakna ket nagrukobda. Kamaudiananna immasideg ken nagrukob met ni Jose ken ni Raquel. ⁸ Sinaludsod ni Esau, "Ania ti kaipapananna amin dagiti ayup a nakitak?" Simmungbat ni Jacob, "Itedko ida kenka, apo, tapno maay-ayoka koma kaniak." ⁹ Ngem simmungbat ni Esau, "Adingko, umdasen dagiti tarakenko! Idulinmo a para kenka dagiti taraken nga adda kenka!" ¹⁰ Ngem kinuna ni Jacob, "Saan, pangngaasim, no maay-ayoka kaniak, awatem dagitoy a sagut a naggapu kaniak. Siaayatnak a kinablaawan. Iti panangkitkitak iti panagisemmo kaniak ket mangipanamnama kaniak a napakawannakon. Kasla kitkitaek ti rupa ti Dios! ¹¹ Pangngaasim ta awatem dagitoy a sagsagut nga inyegko kenka, gapu ta ti Dios ket siaayat a nagtignay kaniak, ken addaanak pay iti adu a taraken!" Intultuloy ni Jacob ti nangguyguyugoy kenkuana tapno awatenna dagiti ayup, ket kamauddiananna inawat ni Esau dagitoy. ¹² Ket kinuna ni Esau, "Agkukuyogtayo a mangituloy iti panagdaliasat, ket idaulloankayo iti dalan." ¹³ Awan iti panggep ni Jacob a makikuyog kenni Esau, ngem kinunana, "Apo, ammom a nakapuy dagiti ubbing, ken masapul nga aywanak dagiti kaba-ian a karnero ken dagiti baka nga agsussuso kadagiti innada. No apuraek ida a magna iti adayo iti maysa laeng nga aldaw, matay amin dagiti ayup. ¹⁴ Uray umun-unaka lattan. Idaulloak iti nainayad dagiti ayup, ngem magnaak a kas iti kapartak iti pannagna dagiti ubbing ken dagiti ayup. Danunenkanto idiay Seir." ¹⁵ Kinuna ni Esau, "Palubusannak ngarud a mangibati kadagiti dadduma a kakadduak a lallaki a mangsalaknib kadakayo." Ngem simmungbat ni Jacob, "Apay nga aramidem dayta? Ti laeng kayatko ket maay-ayoka kaniak." ¹⁶ Isu nga iti dayta nga aldaw pimmanaw ni Esau ket nagsubli idiay Seir. ¹⁷ Ngem imbes a mapan idiay Seir, nagturong ni Jacob ken ti pamiliana iti lugar a maawagan iti Succot. Nangipatakder isuna idiay iti balay a para kenkuana ken para iti pamiliana, ken nangipatakder iti paglinungan para kadagiti tarakenna. Dayta ti rason a pinanagananda ti Succot ti lugar, a ti kaipapananna ket "dagiti paglinungan." ¹⁸ Kastoy ti panangpanaw ni Jacob ken ti pamiliana iti Padan-aram ken ti sitatalged a panagdaliasatda a napan iti daga ti Canaan. Nangipatakderda sadiay kadagiti toldada iti tay-ak nga asideg iti siudad ti Sikem. ¹⁹ Maysa kadagiti pangulo dagiti tattao iti dayta a disso ket agnagan iti Hamor. Addaan ni Hamor iti sumagmamano a putot a lallaki. Binayadan ni Jacob dagiti putot a lallaki ni Hamor iti sangagasut a bagi ti pirak para iti bassit a paset ti daga a nangipatakderanda kadagiti toldada. ²⁰ Nangipatakder isuna iti bato nga altar sadiay ken inawaganna daytoy iti El Elohe Israel, kayatna a sawen "Ti Dios, a Dios ti Israel."