¹ Bayat iti panagdaliasat ni Jacob ken ti pamilyana, adda sumagmamano nga anghel a naggapu iti Dios nga immay nangsabat kenkuana. ² Idi nakita ida ni Jacob, kinunana, "Daytoy ket kampo dagiti soldado ti Dios!" Isu a pinanagananna dayta a lugar iti Mahanaim. ³ Pinauna ni Jacob ti dadduma kadagiti lallaki nga adipenna iti ayan ti inauna a kabsatna a ni Esau, nga agnanaed idiay Seir, dayta ket, daga ti Edom. ⁴ Kinunana kadakuada, "Daytoy ti kayatko nga ibagayo kenni Esau: 'Siak, a ni Jacob, ket adipenmo ken sika ti apok. Nakipagnanaedak iti ulitegta a ni Laban, ket nagnanaedak sadiay agingga ita. ⁵ Addaanak itan iti adu a baka, asno, karnero, kalding, ken lallaki ken babbai nga adipen. Ita, pinaibagak daytoy a mensahe kenaka, apo, ket mangnamnamaak nga awatennakto koma iti nasayaat inton sumangpetak.'" ⁶ Napan dagiti mensahero ket imbagada dayta a mensahe kenni Esau. Idi nagsublida kenni Jacob, kinunada, "Napankami iti inauna a kabsatmo a ni Esau. Um-umayen isuna ken adda kaduana nga uppat a gasut a lallaki. ⁷ Nagbuteng ken nagdanag ni Jacob iti kasta unay. Isu a biningayna iti dua a bunggoy dagiti tattao a kaduana. Biningayna met iti dua a bunggoy dagiti karnero ken kalding, dagiti baka, ken dagiti kamelio. ⁸ Panpanunotenna, "No umay ni Esau ken dagiti lalaki ket darupendakami, nalabit a mabati ti maysa a bunggoy ket mabaelandanto ti aglibas." ⁹ Kalpasanna, nagkararag ni Jacob, "O Yahweh a Dios, a dinaydayaw ni apongko a ni Abraham ken daydayawen ti amak a ni Isaac, kinunam kaniak, 'Agsublika iti bukodmo a daga ken kadagiti kakabagiam, ket nasasayaatto a banbanag ti ipaayko kenka.' ¹⁰ Saanak a maikari tapno tungpalem ti katulagam iti adu a wagas iti kinapudno ken kinamatalek kaniak nga adipenmo. Daytoy laeng sarukodko ti adda kaniak idi binallasiwko ti Karayan Jordan idi napanak idiay Haran, ngem ita nakabakbaknangakon ket addaanak pay iti dua a dadakkel a bunggoy ti pamiliak ken sanikuak. ¹¹ Isu nga ikararagko ita nga ispalennak manipud iti ima ti kabsatko a ni Esau, gapu ta mabutengak nga umay isuna ken dagiti tattaona ket darupen ken papatayennak ken dagiti ubbing ken dagiti inangda. ¹² Ngem saanmo koma a liplipatan a kinunam, 'Pudno a pagbalinenkanto a narang-ay, ken paaduek dagiti kaputotam a kas iti kaadu dagiti darat iti igid ti baybay, a nakaad-adu unay nga awan ti siasinoman a makabael a mangbilang.'" ¹³ Naturog ni Jacob iti dayta a lugar iti dayta a rabii. Kinabigatanna, nangpili isuna kadagiti ay-ayup nga itedna iti kabsatna a ni Esau. ¹⁴ Nangpili isuna iti dua a gasut a kaba-ian a kalding ken duapulo a kalakian a kalding, dua gasut a kaba-ian a karnero ken duapulo a kalakian a karnero, ¹⁵ tallopulo a kaba-ian a kamelio ken dagiti urbonda, uppat a pulo a baka ken sangapulo a kalakian a baka, duapulo a kaba-ian nga asno ken sangapulo a kalakian nga asno. ¹⁶ Biningayna dagitoy iti babassit nga arban, ken impaaywanna ti tunggal arban iti maysa kadagiti adipenna. Kinunana kadagiti adipenna, "Umunakayo a mapan, pagsasarunoenyo dagiti bunggoy, ken ikkanyo iti baet ti tunggal arban." ¹⁷ Kinunana iti adipen a kadua ti umuna a bunggoy, "Inton sabtennaka ti kabsatko a ni Esau, ket damagenna kenka, "Siasino ti nakaibilangam, ken sadino ti papanam ken siasino ti akinkukua kadagitoy nga ay-ayup nga adda iti sangoanam?' ¹⁸ Ibagam kenkuana, 'Kukua ida ti adipenmo a ni Jacob. Impatulodna dagitoy kenka a kas sagut, apo. Sumarsaruno isuna kadakami.'" ¹⁹ Kasta met laeng ti imbagana kadagiti adipen a mangay-aywan kadagiti maikadua ken maikatallo a bunggoy, ken kadagiti dadduma pay a mangay-aywan iti arban. Kinunana kadakuada, "Inton masabatyo ni Esau, kayatko nga ibagayo kenkuana ti kas iti imbagak iti umuna nga adipen. ²⁰ Ken siguraduenyo nga ibagayo ti "ni adipenmo a ni Jacob ket sumarsaruno kadakami.'" Imbaga ni Jacob nga ibagada dayta gapu ta panpanunotenna a, "Nalabit a dagitoy a sagsagut nga umun-una nga ipatulodko kenkuana ti pakaigapuan a makikapia isuna kaniak. Ket inton makitak isuna, bareng no maasianto isuna kaniak." ²¹ Immuna ngarud a napan dagiti tattao a mangted kadagiti sagsagut, ngem nagtalinaed ni Jacob iti kampo iti dayta a rabii. ²² Iti dayta a rabii, bimmangon ni Jacob ket innalana dagiti dua nga assawana, dagiti dua nga adipenna a babbai ken dagiti sangapulo ket maysa a putotna a lalaki ken imbaonna ida iti waig ti Karayan Jabbok. ²³ Iti kastoy a wagas a pinaunana amin dagiti tattao ken sanikuana iti ballasiw ti karayan. ²⁴ Nabati ngarud sadiay ni Jacob nga agmaymaysa. Ngem immay ti maysa a lalaki ket nakiginnabbo kenkuana agingga iti parbangon. ²⁵ Idi naamiris ti lalaki a saanna a kabaelan nga abaken ni Jacob, tinapig ti lalaki ti patong ni Jacob ket naglagisi ti tulang ti luppo ni Jacob manipud iti patongna. ²⁶ Kalpasanna kinuna ti lalaki, "Palubosannakon, gapu ta dandani bumigaten." Simmungbat ni Jacob, "Saan, no saannak a bendisionan, saanka a palubosan!" ²⁷ Kinuna ti lalaki kenkuana, "Ania ti naganmo? Simmungbat isuna, "Jacob". ²⁸ Kinuna ti lalaki, "Saanen a Jacob ti naganmo. Ti naganmon ket Israel a ti kayatna a sawen ket 'makibinbinnalubal iti Dios, gapu ta nakibinnalubalka iti Dios ken kadagiti tattao, ket nangabakka." ²⁹ Kinuna ni Jacob, "Ita pangngaasim ta ibagam kaniak ti naganmo?" Simmungbat ti lalaki, "Apay a damagem ti naganko?" Ngem binendisionanna ni Jacob idiay. ³⁰ Isu a pinanaganan ni Jacob ti lugar a Peniel a ti kayatna a sawen ket "rupa ti Dios," kunana "Kinitak ti Dios, ngem saanak a natay nupay inaramidko dayta. ³¹ Sumingsingisingen ti init kabayatan a pumanpanaw ni Jacob idiay Peniel ken agpilpilay isuna gapu iti napasamak iti patongna. ³² Nadangran ti lasag ti nagsuopan iti patongna. Isu nga agingga ita a tiempo, gapu iti napasamak kenni Jacob, saan a kankanen dagiti Israelita ti lasag nga adda iti nagsuopan ti patong dagiti ay-ayup.