¹ Nampagneno gne trompetrany gn'anjely fahadimy. Nahita kinta avy agny an-dagnitry iaho izay latsaky tegny ame tany. Gne kinta gne nome gne fagnalahidin'gne lavaky tsy hita noanoa. ² Nopoany gne lavaky tsy hita noanoa, ary niakatry gne setroka ninjotso tao amè lavaky akoy gne setroky avy amè lafaoro zakabe. Nivadiky maloky gne masoandro sy gne rivotry nohon'gne setroky ninjotso tao an-davaky. ³ Avy amè setroky gne nahavy gne valala teto ambonin'ny tany, ary nome hery akoy gn'an'ny maingoka teto ambonin'ny tany indreo. ⁴ Nozakay indreo tsy hanimba gn'ahitry teto ambonin'ny tany na gne rahà mitsiry metso na hazo, fa gn'olo izay tsy mana tombo-kasen'Andriamanitra eo amè pandan-dreo avao. ⁵ Tsy nahazo alala gne hamono iregny olo iregny indreo, fa hampijaly anazy iregny mandrapahavitan'gne dimy volagny avao. Gne fanaitaignandreo da ako ogne hekitry gne hala raha mamango olo. ⁶ Amin'io andro io da hitady fahafatesa gne olo, fa tsy hahita izany. Hagniry gne ho faty mafy indreo, nefa hilefa andreo gne fahafatesa. ⁷ Akô gne sôvaly nomagny tame ady gne valala. Tame lohandreo da hisy raha akô gne satroboninahitry volamena, ary gne tarehiny da akô gne tarehin'gne olombelo. ⁸ Nana volo akô gne volom-biavy indreo, ary gne nifindreo, da akô nifin'gne liogny. ⁹ Nana fiarovan-tratra akô gne fiarovan-tratra vy indreo, ary gne feon'gne elatrindreo da akô feon'gne kalesa sy sôvaly maro migodogodoky ho agny and ady. ¹⁰ Nana rambo nisy tsindrogny akô gne hala indreo; ao ame rambon-dreo gne misy gne hery hanimba gne olo agnatin'gne dimy volagny. ¹¹ Nana mpanjaka indreo da gne anjelin'gne lavaky tsy hita fiafara. Gne agnarany tame zaka Hebreo da Abadona, ary gne agnarany tame zaka grika da i Apolyona. ¹² Lasa gne loza voalohavy. Igny! afaran'izao da mbola hisy loza roa ho avy. ¹³ Nampagneno gne atsivany gne anjely fahenina, ary Nahare gne feo nivoaky tame tandroky gne alitara volamena izay efa nisy teo agnatrehan'Andriamanitra aho. ¹⁴ Ary nizàka tame anjely fahenina gne feo magnano hoe: "Avotsory gne anjely efatra izay mifehy agny amen'gne renirano zakaben'gne Eofrata." ¹⁵ Gne anjely efatra izay efa nomagny tam'izany lera izany, ary izany andro izany, izany volagny izany,ary izany taona izany, da novotsora mba hamono gne ampahatelon'gne olombelo. ¹⁶ Gne isan'gne miaramila nitikitry sôvaly da 200,000,000. Nahare gne isa io iaho. ¹⁷ Akô izany gne fomba nahitako ireo sôvaly tao ame fahitako sy ireo izay nimpitiky teo amin'izy ireo: Ireo fiarovan-tratrandreo da mirehitry mena, manga antitry ary lafo vidy ary solifara mavo. Nitovy tame lohan'gne liogny gne lohan'ireo sôvaly, ary gne nivôky avy tambavandreo da afo, setroky, ary solifara. ¹⁸ Ary gne ampahatelon'gne olo da matin'gne loza telo: gne afo, gne setroka, ary solifara izay nivôky avy teo am-bavandreo. ¹⁹ Fa gne herin'gne sôvaly da avy tao ame vavandreo sy tame rambondreo - fa gne rambondreo da akô gne bibilava, ary nana loha izay afaka mandratry olo indreo. ²⁰ Gne ambin'gne olombelo, ireo izay tsy matin' ireo loza ireo, da tsy nibebaky tamagn'asa izay vitandreo, na nijanogny nonompo gne devoly sy sampy volamena, volafotsy, vato, ary hazo- gne raha izay tsy hita maso, re, na mandeha. ²¹ Indreo da mbola tsy nibebaky tame asa famonoa, gne famosaviandreo, gne fijanganjanga na gne asa fangalarandreo.