¹ Avy teo iaho da nahita anjely mahery hafa nidigny avy agny an-danitra. Tao agnaty mika izy, ary nisy avana teo ambonin'gne lohany. Gne laharany da miendriky masoandro ary gne tongony da mitovy gne andry afo. ² Mitazogny horognan-taratasy kidy mivelatry ame tagnany izy, ary mametraky gne tongony akavana ame ranomasy sy gne tongony havia ame tany. ³ Avy teo izy da nikiaky tame feo mafy akô gne fitrerognan'gne liogny. Raha nikiaky izy, da nigodo mafy tam'gne feon'gne odo ito. ⁴ Raha nigodo gne godo fito, da teo andalam-panoratana iaho, fa nahare feo avy agny an-dagnitry iaho nizaky hoe: "Tazogny ho tsiambaratelo izay nozakain'gne godo fito. Aza soratana izany." ⁵ Avy teo gne anjely ambony ranomasy sy teo ame tany, nananga gne tagnany havana tagny andagnitry. ⁶ Izay niay tam'gne raiky izay velo mandrakizay doria, izay nagnambôtry gne lagnitry sy gne raha aby agnatin'izany, gne tany sy gne raha aby agnatin'izany, ary gne ranomasy sy gne raha aby agnatin'izany, ary gne anjely nizaka hoe: "Tsy hisy fandignasa koa. ⁷ Fa ame andro raiky raha hampagneno gne atsivany gne anjely fahafito, da ho tanteraky gne tsy ambaratelon' Andriamanitry, mitovy gne nambarany tam'gne mpaminany mpanompony." ⁸ Gne feo izay reko avy tagny andagnitry nizaka taminaha koa hoe: " Mandehana, alay gne horognen-taratasy mivelatry izay egny antagnan'gne anjely mitsanga eo ambony ranomasy sy ambonin'gne tany." ⁹ Avy teo da lasa tagny ame anjely iaho ary nizaka taminazy mba hagnome anaha gne horognan-taratasy kidy. Hoy izy taminaha: " Alay gne horognan-taratasy ary hano izany. Hampafaitry gne agnati-trokinao izany, fa ao ambavanao da ho mamy akô gne titely." ¹⁰ Nalaiko tame tagnan'gne anjely gne horognan-taratasy kidy ary nohaniko izany. Mamy mitovy ame titely tao ambavako izany, fa tafaran'gne nihinanako anazy, da lasa nafaitry gne gne tao ame trokiko. ¹¹ Avy teo nisy olo raiky nizaka taminaha hoe: " Tsy maintsy maminany indraky enao moban'gne olo maro, gne firenena, gne fiteny, ary ireo mpanjaka."