¹ Raha novohan'gne Zanak'ondry gne tombo-kase fahafito, da nisihy gne tagne an-dagnitry teo amy gn'antsasaky aro teo. ² Avy eo da hitako gn'anjely fito izay nitsanga teo ankatrean'Andriamanitra, ary nome trompetra fito indreo. ³ Nisy anjely hafa avy, nita lasety volamena fagnoroa ditin-kazo magnitry, nitsanga teo ambonin'gne alitara. Ditin-kazo magnitry maro gne nome enazy mba hagnomezany izany mbamin'ny vavaky gne mpino agnaby eo ambonin'gn'alitara volamena fagnoroa ditin-kazo magnitry eo aloan'gne sezam-boninahitry. ⁴ Gne setroky gne ditin-kazo magnitry, mbamin'ny vavaky gne mpino, da niakatry teo alohan'Andriamanitra avy amè tagnany gn'anjely. ⁵ Nangala gne lasety fagnoroa ditin-kazo magnitry gn'anjely ary nameno izany tamè gn'afo avy amy gn'alitara. Avy eo natorakiny tamy gne tany izany, ary nisy varatry nagneno, feom-baratry, elatry, ary horohoron-tany. ⁶ Gn'anjely fito izay nana gne trompetra fito da nioma hitsotry enizany. ⁷ Nitsotry gne trompetrany gn'anjely volohany, ary nisy havandra sy afo mifangaro rà. Natakiny tety an-tany izany mba ho may gne ampahatelon'izany, may gn'ampahatelon'e hazo, ary may agnaby gne ahi-metso. (Fagnamariha: Gne sasany amy gne dika-zaka taloha da mangala gne hoe:"mba ho may gne ampahatelon'izay.") ⁸ Nitsotry gne trompetrany gn'anjely faha roy, ary nisy rahà akoy gne vohitry zakabe nirehitr'afo natorakiny tagny an-dranomasy. Lasa rà gne ampahatelon'e ranomasy, ⁹ maty gn'ampahatelon'e rahà managnay tao an-dranomasy, ary rava gn'ampahatelon'gne sambo. ¹⁰ Nitsotry gne trompetrany gn'ajely fahatelo, ary nisy kinta zakabe nilatsaky avy agny an-dagnitry akoy gne fanilo, tamy gn'ampahatelon'gne ony sy loharano. ¹¹ Rahà mafaitry gn'agnagnaran'io kinta io. Lasa nafaitry gn'ampahatelon'e rano, ary olo maro gne maty tamy gne rano izay lasa nafaitry. ¹² Nitsotry gne trompetrany gn'anjely faha-efetry, ary niova gn'ampatelon'e vola sy gn'ampahatelon'gne kinta. Noho izany da lasa mity gn'ampahatelon'gne; tsy nisy hazava gn'ampahatelon'gn'andro sy gny ampahatelon'gn'aririva. ¹³ Nagnety iaho, ary nahare voro-mahery izay nandrembo tegny ategnategnan'gne lagnitry, nangaiky tamè feo mafy hoe:""Loza, loza, loza, ho an'gne izay mipetraky egny amy gne tany, nohon'gne feona trompetra sisa izay efa ho tsofin'gn'anjely telo."