¹ Enin'andro mialohan'gne Paska, da tonga tao Betania Jesosy, izay nidoboan'i Lazarosy, ilay efa natsangan'i Jesosy tamè maty. ² Ka nagnano sakafo ho Anazy indreo, ary Marta gne nandroso andreo, fa Lazarosy kosa da anisan'ireo niara-nidoboky tamin'i Jesosy teo amè latabatry. ³ Avy teo Maria nangala menaky manitra raiky litatra izay vita tamè narda sarobidy, ka nagnosotry gne tombony tamè volon-dohany. Feno gne hanitr'ilay menaky gne tragno. ⁴ Ary Jodasy Iskariota, raiky tamindreo mpianany, izay hamadiky Anazy, nagnano hoe: ⁵ "Nagnino io menaky io gne tsy namidy 300 dinaria da nomè gne mahantra?" ⁶ Ary izy magnambara izà, tsy nohon'gne fitezagny gne mahantra, fa satria mpangalatry izy: teo aminy gne kitapom-bola ary ho nangalariny izay nahishy tamignao. ⁷ Jesosy nizàka hoe: "Avelao izy mba hitazogny izay hanagnany ho amè andro handevenagny Anah. ⁸ Ho eo aminareo fehizay gne mahantra, fa Iao kosa tsy ho eo aminareo fehizay." ⁹ Ary nisy vahoaky maro tamindreo Jiosy nahalala fa teo Jesosy, ka nagnato indreo, tsy ho an'i Jesosy irery avao, fa mba hahita an'i Lazarosy avakoa, ilay natsangan'i Jesosy tamè maty. ¹⁰ Indreo lohan'gne mpisorona da nihevitry niaraky mba hahafahandreo magnosiky an'i Lazarosy amè fahafatesa avakoa; ¹¹ satria noho Izy gne nahavy gne ankamaroandreo Jiosy andeha ary nino an'i Jesosy. ¹² Gne omaray da vahoaky maro gne tonga tamè andro fifalia. Rehefa rendreo fa ho avy ao Jerosalema Jesosy, ¹³ da nangala sampan-drofia indreo ary nijoso ka nitsena Anazy tamè feo mafy hoe: "Hosana! Sambatry ilay avy amè agnaran'gne Tompo, Ilay mpanjakan'Israely." ¹⁴ Ary Jesosy nahita zana-boriky raiky ka nidoboky teo ambonigny; ¹⁵ Araky gne voasoratry hoe: " Ka malia, ry zanakavavin'i Ziona; hiteo, igny avy igny gne mpanjakanareo, izay midoboky eo ambonin'gne zana-boriky." ¹⁶ Tsy nahazo ireo zavatra ireo gne mpianany tamè voalohany; fa rehefa nomem-boninahitry Jesosy, da tsaroandreo fa voasoratry momba Anazy ireo zavatry ireo ary efa nanindreo taminy izà. ¹⁷ Ary indreo vahoaky izay niaraky taminy tamè nangiany an'i Lazarosy hijoso gne kobory sy nanangagny anazy tamè maty da samy nijoro vavolombelo agnaby. ¹⁸ Noho izà antony izà avakoa gne nahavy gne vahoaky hitsena Anazy, satria rendreo fa nagnano izà famantara izà Izy. ¹⁹ Indreo Fariseo noho izà nifampiresaky hoe: "Hiteo, tsy afaky magnano na ino na ino anareo; fa, magnaraky Anazy izao tontolo izao." ²⁰ Ary nisy grika vitsivitsy tamindreo izay niakatry hidera agny amè fifalia. ²¹ Nandeha amin'i Filipo indreo, izay avy agny Betsaida agny Galilia, ary nagnontagny anazy, magnano hoe: "Tompo, mba ta-hahita an'i Jesosy iahay." ²² Da lasa Filipo ka nizàka tamin'i Andrea; da lasa Andrea niaraky tamin'i Filipo, ary nizàka an'i Jesosy indreo. ²³ Jesosy namaly andreo ka nagnano hoe: "Efa avy gne fotoa hanomeza voninahitry gne Zanak'olo. ²⁴ Zakaiko aminareo, marina, da marina tokôtry, fa raha tsy latsaky amè tany gne voam-bary ka maty, da mitoetra amè tegnany raiky izà; fa raha maty izà, da hamokatry marobe. ²⁵ Izay tia gne fiainagny da agnary izà; fa izay malaigny gne fiaignà eto amin'izao tontolo izao kosa da hitazogny izà ho agny amè fiaigna mandrakizay. ²⁶ Raha misy magnompo Anah, aoka izy hagnaraky Anah; ary izay hidoboako, da ao avakoa gne hidoboan'gne mpagnompoko. Raha misy magnompo Anah, da hanome voninahitry anazy gne Ray. ²⁷ Amisia mangorohoro gne fagnahiko ary ino gne tokotry ho zakaiko? 'Ray ô!, vonjeo amin'ity lera ity Iao'? Kanefa noho izà antony izà gne nahatongavako amin'izao fotoa izao. ²⁸ Ray ô!, hankalazao gne agnaranao. Avy teo nisy feo nagnako avy any an-danitry nagnano hoe: "Efa nankalazaiko izà ary mbola ho hankalazaiko indraiky." ²⁹ Ary indreo vahoaky nitsanga tam'gneo sy naharè izà da nizàka fa nisy kotroky teo. Gne sasany nizàka hoe: "Nisy anjely niresaky taminy." ³⁰ Jesosy namaly ary nizàka hoe: "Izà feo izà da tsy ho Anah, fa ho anareo. ³¹ Avy ary gne fitsarà an'izao tontolo izao: Ary da ho roagny gne mpagnampaky izao tontolo izao. ³² Rehefa hasandratry hiala amè tany Iao, da hitao gne tsirairay hagnaraky Anah." ³³ Nozàkainy izà mba hagnehoa hoe karazan'gne fahafatesa akongaia gne hafatesany. ³⁴ Indreo vahoaky namaly Anazy hoe: "Renay tamè lalàgna fa Kristy da hijanogny mandrakazay. Ino gne hafahanao magnambara hoe: 'Gne Zanak'Olo da tsy maintsy hasandratry'? Iza izà Zanak'Olo izà?" ³⁵ Avy teo Jesosy nizàka andreo hoe: "Gne hazavà da mbola hindray amindreo mandritry gne fotoa fohy. Mandehana dian'gne mbola managny hazavagny, mba tsy hafahan'gne haizigny mialoha anareo. Izay mandeha amè mizy da tsy mahalala gne lalakombany. ³⁶ Raha mbola manà gne hazavà anareo, da minoa izà mba ho zanakin'gne hazavagny anareo." Jesosy nagnambara ireo zavatry ireo ary avy teo da tsy hita ary nitodiky andreo. ³⁷ Na da nagnano famantara maro teo anatrehandreo aza Jesosy, da tsy ninoandreo ³⁸ mba ho tanteraky gne zakan'Isaia mpaminagny, izay nagnambarany hoe: "Tompo, iza gne nino gne fagnambaranay, ary iza gne nampiseho gne sandrin'gne Tompo?" ³⁹ Noho izà antony izà da tsy nino indreo, araky gne voazakan'i Isaia fehizay hoe: ⁴⁰ "Nohajambaigny gne masondreo, ary nohamafishiny gne fondreo; mifanohitry amin'izà indreo da te-hahita amè masondreo ary hahazo amè fondreo, ka hitodiky, ary Iao hanasitragny andreo." ⁴¹ Isaia nagnambara ireo zavatry ireo satria hitagny gne voninahitr'i Jesosy ka nkora momba Anazy. ⁴² Kanefa na izà aza, da maro tamindreo mpanampaky gne nino an'i Jesosy; fa noho ireo Fariseo, da tsy nagneky izà indreo mba tsy ho voasakagny ho ao amè synagoga. ⁴³ Tiandreo tokôtry gne fideragny avy amè olo noho gne fideragny avy amin'Andriamanitry. ⁴⁴ Jesosy nangaiky mafy ka nizàka hoe: "Izay raiky mino Anah, aza mino Anah raiky avao fa koa Izy izay nagniraky Anah, ⁴⁵ ary izay raiky mahita Anah da mahita Anazy izay nagniraky Anah. ⁴⁶ Iao da avy toy gne hazavagny teto amin'izao tontolo izao, mba tsy hidoboky agnaty haizigny izay mino Anah. ⁴⁷ Raha misy maharè gne zakako nefa tsy mitandrigny izà, da tsy hitsara anazy Iao; satria Iao tsy avy hitsara izao tontolo izao, fa hagnavotry izao tontolo izao. ⁴⁸ Izay mandà Anah sy tsy mandray gne zakako, da managny raiky izay mitsara anazy. Ilay zaka izay nambarako gne hitsara anazy am'gnandro farany. ⁴⁹ Fa Iao tsy mizàka ho Anah, fa ilay Ray izay nagniraky Anah, izay nagnome Anah gne didy amin'izay ho zakay sy ho ambara. ⁵⁰ Fantatro fa gne didiny da fiaignà mandrakizay, koa izay zakaiko_da zakaiko araky izay nozàkain'gne Ray tamiko."