¹ Ary nisy lehilahy raiky narary angia hoe: '' Lazarosy. Avy ao Betania izy, tanàn'i Maria sy Marta rahavaviny. ² Maria gne nagnosotry menaky magnitry gne Tompo sy nagnadio gne tombony tamè volony, ary Lazarosy analahiny gne narary. ³ Ary indreo mpirahavavy nagniraky olo ho agny amin'i Jesosy, nizàka hoe: ''Tompo, iteo, fa marary ilay tianao.'' ⁴ Rehefa ren'i Jesosy izà, da hoy Izy hoe: ''Tsy fahafatesa gne hiafaran'ity arety ity, fa kosa ho fanehoa gne voninahitr'Andriamanitry mba hagnandratany gne Zanak'Andriamanitry amè alalan'izà.'' ⁵ Ary Jesosy da tia an'i Marta sy gne rahavaviny ary Lazarosy. ⁶ Ka rehefa naharè Jesosy fa tsy salama Lazarosy, da mbola nijanogny roy andro tao amè toera nisy Azy Izy. ⁷ Ary tafaran'izà, da nizàka tamindreo mpianatra Izy hoe:'' Andeha isika ho agny Jodia indraiky.'' ⁸ Hoy indreo mpianatra taminy hoe: ''Raby, amin'izao da mitadia gne hitora-bato Anao indreo Jiosy, ka mbola hipody ho agny indraiky Anao?'' ⁹ Ary namaly Jesosy hoe: '' Tsy roy ambin'gne folo lera gne fahazavan'gne andro? Raha misy olo mandeha amè andro mazava, da tsy ho tafato izy, satria mahita gne fahazavan'izao tontolo izao. ¹⁰ Kanefa, raha mandeha amè ariva izy, da ho tafato satria tsy ao aminy gne fahazavà.'' ¹¹ Nagnambara ireo zavatra ireo Izy, ary tafaran'ireo zavatry ireo, da hoy Izy tamindreo hoe: '' Resin-tory Lazarosy namantsika, fa handeha Iao mba hafahako mamoha anazy amè torimaso.'' ¹² Ka hoy indreo mpianatry taminy hoe: ''Tompo, raha resitory izy, da ho tsara.'' ¹³ Kanefa Jesosy nizàka gne fahafatesa, saingy noheverindreo fa fialan-tsasatry amè torimaso gne nozàkainy. ¹⁴ Avy eo Jesosy nizàka tsotry tamindreo hoe: ''Maty Lazarosy. ¹⁵ Faly iao, nohon'gne aminareo, fa tsy tam'gnagny Iao mba hahatonga anareo hino. Andeha isika ho agny aminy. '' ¹⁶ Tomasy, izay angia hoe Didymo, da nizàka tamindreo mpianatry namany hoe: ''Andeha koa isika mba hiara-maty amin'i Jesosy.'' ¹⁷ Rehefa tonga Jesosy, da hitany fa efa nalevy efatr'andro tao an-kobory Lazarosy. ¹⁸ Ary Betania da efa marigny an'i Jerosalema, eo amè dimy ambin'gne folo stadio gne elagnelagny. ¹⁹ Maro indreo Jiosy tao tonga tao amin'i Marta sy Maria, mba hampahery andreo nohon'gne fahafatesan'gne analandreo. ²⁰ Avy eo Marta, rehefa naharè fa tonga Jesosy, da nandeha nitsena Anazy, fa Maria kosa nidoboky t'andragno. ²¹ Da nizàka tamin'i Jesosy Marta hoe: ''Tompo, raha tetoa anao, da tsy maty gne analako. ²² Nefa na da izao amisia izao aza, da fantatro fa na ino na ino angatahinao amin'Andriamanitra, da homegny anao izà. '' ²³ Hoy Jesosy taminy hoe: ''Gne analahinao da hitsangan-ko velo indraiky.'' ²⁴ Marta nizàka taminy hoe: ''Fantako fa hitsanga indraiky izy amè fitsanganan'gne maty amè andro farany.'' ²⁵ Da hoy Jesosy taminy hoe: ''Iao gne fanangana gne maty ary fiaigna; izay mino Anah, na da maty aza izy, da ho velo; ²⁶ ary na ia na ia velo ka mino Anah da tsy ho faty mandrakizay. Mino izà anao?'' ²⁷ Hoy izy taminy hoe: ''Eka, Tompo, mino iao fa Anao gne Kristy, Zanak'Andriamanitry, ilay ho avy eto amin'izao tontolo izao.'' ²⁸ Rehefa voazakany izà, da lasa izy nangaiky mangingina an'i Maria rahavaviny. Hoy izy hoe: ''Tonga gne Mpampianatry ary mangaiky anao izy. '' ²⁹ Rehefa ren'i Maria izà, da nitsanga malaky izy da nandeha negnagny. ³⁰ Ary Jesosy tsy mbola avy tao an-tanà fa mbola teo amin'ilay toera nifakaitan'i Marta taminy avao. ³¹ Noho izà indreo Jiosy, izay niaraky taminy tao an-dragno sy nampahery azy, rehefa nahita an'i Maria nitsanga malaky ka lasa nijoso, da nagnaraky anazy, nihevitry fa handeha hitagny agny amè kobory izy. ³² Rehefa tonga teo amè toera nisy an'i Jesosy i Maria ka nahita Anazy, da nibebaky izy ary nizàka taminy hoe: ''Tompo, raha tetoa anao, da tsy maty gn'analako.'' ³³ Rehefa nahita anazy nitagny Jesosy, ary indreo Jiosy niaraky taminy koa nitagny, da vonto gne fagnany ary tora-kovitry Izy; ³⁴ da hoy Izy hoe: ''Taiza gne nandevegnanareo anazy?'' Da hoy indreo taminy hoe: ''Tompo, avy ary iteo.'' ³⁵ Nitagny Jesosy. ³⁶ Avy teo hoy indreo Jiosy hoe: ''Iteo gne haben'gne fitiavany an'i Lazarosy!'' ³⁷ Fa gne sasany tamindreo nizàka hoe: ''Tsy hain'ity lehilahy ity, izay nampahiratry gne mason'ilay jamba, gne magnano izay tsy ho nahafaty ity lehilahy ity koa?'' ³⁸ Avy teo indraiky Jesosy, raha mbola vonto gne fagnany, da nandeha amè kobory. Ary zohy izà, ary misy vato manakotry anazy. ³⁹ Hoy Jesosy hoe: ''Alay hiala agny gne vato.'' Marta, anakavin'i Lazarosy, ilay maty, nizàka tamin'i Jesosy hoe: ''Tompo, efa membo gne vatagny raha amin'izao fotoa izao, satria efatr'andro izao gne nahafateshany.'' ⁴⁰ Ary Jesosy nizàka taminy hoe: '' Tsy efa nambarako anao fa, raha mino anao, da ho hitanao gne voninahitr'Andriamanitry?'' ⁴¹ Nalandreo gne vato. Jesosy nanandratry gne masony ka nizàka hoe: ''Ray ô, misaotry Anao Iao satria nitegno Anah Anao. ⁴² Fantatro fa mitegno Anah fehizay Anao, fa nohon'gne vahoaky mijoro magnodidigny Anah gne nagnambarako izà, mba hafahandreo mino fa Anao gne nagniraky Anah.'' ⁴³ Rehefa avy nizàka izà Izy, da nangaiky tamin'gne feo mafy hoe: ''Lazarosy, mijosoa!'' ⁴⁴ Nijoso ilay lehilahy maty; nisy fehim-paty gne tombony sy gne tagnany, ary voafehy lamba koa gne terehiny. Hoy Jesosy tamindreo hoe: ''Vavaro izy ary avelao handeha.'' ⁴⁵ Avy teo maro tamindreo Jiosy izay avy tao amin'i Maria sy nahita gne nataon'i Jesosy, gne nino Anazy; ⁴⁶ Fa gne sasany tamindreo koa lasa nandeha nagnagny amè Fariseo ary nagnambara tamindreo gne zavatry nanin'i Jesosy. ⁴⁷ Avy teo gne lohan'gne mpisorona sy gne Fariseo namory gne Synedriona niaraky ary nagnano hoe: ''Ino gne hataontsika? Ity lehilahy ity da magnano famantara maro. ⁴⁸ Raha avelantsika amin'izao Izy, da hino Anazy gne rehetra; ary ho avy gne Romana hangala gne tanàntsika sy gne firenentsika.'' ⁴⁹ Kanefa, nisy lehilahy raiky tamindreo, Kaiafa, izay mpisoronabe tamin 'izà Tao izà, nagnano tamindreo hoe: "Anareo da tsy mahalala na ino na ino. ⁵⁰ Tsy mieritreritry mihintsy anareo fa tsara ho anareo raha lehilahy raiky gne maty ho an'gne olo toy izay gne firenegny agnaby gne rava.'' ⁵¹ Ary izay nozakainy da tsy naniny ho anazy avao. Fa kosa, noho izy mpisoronabe tamin'io tao io, da naminagny fa tokotry ho faty ho an'gne firenegny Jesosy; ⁵² ary tsy ho an'gne firenegny fotsiny avao, fa mba hampiray gne zanak'Andriamanitra izay niparitaky koa. ⁵³ Ka nanomboky tamin'io andro io da nagnano tetiky gne fomba hamonoa an'i Jesosy indreo. ⁵⁴ Ary Jesosy tsy nandeha nishehosheo teo andreo Jiosy esana, fa niala teo Izy nandeha amè tany akaikin'gne efitry hegnagny an-tanà atao hoe Efraima. Ary nidoboky tao Izy sy ireo mpianatry. ⁵⁵ Ary efa akaiky gne Pasky gne Jiosy, ary maro tamindreo tagny ivelan'gne tanà gne niakatry tao Jerosalema mialohan'gne Paska mba hagnadio gne tenandreo. ⁵⁶ Nitadia an'i Jesosy indreo, ary nitsanga teo amè Tempoly nifampiresaky hoe: "Ino gne eritreretinareo? Hoe tsy ho tonga amè andro fifalia Izy?" ⁵⁷ Ary efa nagnome baiko gne lohan'gne mpisorona sy gne Fariseo fa raha misy mahalala gne misy an'i Jesosy, da tokotry magnambara izy mba hisamborandreo Anazy.