¹ Ado seurank lelaki yo gik sakit, demo'a Lazarus d'rik Betania, kampung Maria kant saudari'a, Marta. ² Maria tuk'ak tinok yo kolok minyak'ik kaki Yesus ngan minyak wangi kant menyeka kaki Yesus ngan rambut'a, yo saudero lelaki'a, Lazarus, waktu nyin sakit. ³ Dongah nyin, keduok saudari tuk ngirimkan kabar kepado Yesus, yo bekato, "Doto, urank yo Ikau kasih'ik gik sakit." ⁴ Tapi, tengkalo Yesus ningo hal nyin, Yesus bekato, "Penyakit nyin com akan nyebabkan kematian, tetapi akan nyatokan kemuliaan Allah supayo Anak Allah dimuliokan ngelalu'ik'a". ⁵ Yesus mang ngasih'ik Marta, kant saudero tinok'a, kant Lazarus. ⁶ J'di tengkalo Yesus ningo bahwa Lazarus sakit, Yesus sengejo tinggel 2 ari gik di tempat Io be'adoa. ⁷ Udah nyin, Yesus bekato kepado murid'murid-A, " Ayok kito pogi gik ke Yudea." ⁸ B'lo murid bekato kepado Yesus, "Guru, urank-urank Yahudi bolom lambet tuk beusaha ngelempar'ik Ikau ngan b'tu, peikah Ikau akan tetap ke nun gik?" ⁹ Yesus njawab, "Kankah ado 12 jom d'lom seari? Mun seseurank bej'len pado siang ari, io com tesontuk dongah io nongan terang dunio tuk. ¹⁰ Akan tetapi, mun seseurank be'j'len pado malam ari, io tesontuk dongah torang nyin com ado pado'a." ¹¹ Udah Yesus bekato tokuh nyin, Io bekato kepado sidok, "B'tor kito, Lazarus, dah tiduk, tetapi aku akan pogi ntuk mb'ngunkan io." ¹² Murid-murid bekato kepado-A, "Doto, mun io dah tetiduk io akan sombuh." ¹³ Yesus sebujor'a ngomong tentang kematian Lazarus, tapi murid-murid ngiro Yesus ngomong tetiduk d'lom reti istirahat. ¹⁴ Dongah nyin, Yesus lalu bekato ngan terus terang kepado sidok, "Lazarus dah mati, ¹⁵ Kant Aku ayah demi kepentingan kau, Aku com ado di nun supayo ikau d'pat pecayok. J'di, ayok kito pogi kepado'a." ¹⁶ Lalu, Tomas, yo disobut Didimus, bekato kepado murid-murid yo lain, "Ayok kito gam pogi supayo kito d'pat mati besamo-A." ¹⁷ Tengkalo Yesus d'tang, Yesus nd'pat'ik Lazarus dah ado di d'lom kuburan selambet 4 ari. ¹⁸ Adopun Betania teletak limok belas stadia j'uh'a d'rik Yerusalem. ¹⁹ B'nyak urank Yahudi dah d'tang nomu'ik Maria kant Marta, ntuk ngibur sidok bekaitan ngan medik'a nyin. ²⁰ Tengkalo ningo bahwa Yesus dah d'tang, Marta pogi kant nyambut Yesus, tapi Maria tetap tinggel di umah. ²¹ Maria bekato kepado Yesus, "Doto, seandai'a waktu nyin Ikau ado di tuk, medikku pasti com akan mati. ²² Akan tetapi, tum tuk aku tau bahwa pei pun yo Ikau mintok d'rik Allah, Allah akan mborikkan'a kepado Ikau." ²³ Yesus bekato kepado'a, "Medik kau akan bengkit." ²⁴ Marta njawab Yesus, "Aku tau io akan bengkit pado ari kebengkitan pado akhir zaman." ²⁵ Yesus bekato kepado'a, "Aku'ak kebengkitan kant kehidupan; Sopei pun yo pecayok kepado-Ku, io akan idup walaupun io dah mati, ²⁶ kant setiap urank yo idup kant pecayok kepado-Ku com akan kolok mati. Peikah ikau pecayok akan hal tuk?" ²⁷ Marta bekato kepado-A, " Ya Doto, aku pecayok bahwa Ikau'ak Kristus, Anak Allah, yo d'tang ke dunio." ²⁸ Dah ngatokan hal nyin, Marta pogi kant nyakau Maria, medik'a, kant bekato secara pribadi, " Guru ado di tuk kant Io nyakau kau." ²⁹ Ngeningo hal nyin, Maria segera bediri kant nomu'ik Yesus. ³⁰ Waktu nyin, Yesus bolom sampai ke desa nyin, tetapi gik di tempat Marta nomu'ik-A. ³¹ Urang-urang Yahudi yo besamo Maria di umah nyin, yo gik ngibur io, nongan Maria copat bengkit kan pogi keluar; sidok nuntut'ik io dongah ngiro io akan pogi ke kubur ntuk nangis di nun. ³² Tengkalo Maria sampai ke tempat Yesus be'adoa, Io nongan Yesus kant tesungkur di kaki-A, sreto bekato kepado-A, "Doto, seandai'a Ikau ado di tuk waktu nyin, medikku com akan mati." ³³ Tengkalo Yesus nongan Maria nangis, kant urank-urank Yahudi yo besamo'a pun nundok nangis, Tesontuh'ak Yesus d'lom Roh kant sangat kasih . ³⁴ Yesus betanyok, "Di mone Lazarus ikau kuburkan?" Sidok njawab Yesus, "Doto, ayok nuntut kant tongan'ak." ³⁵ Yesus pun nangis. ³⁶ Mako, urank-urank Yahudi bekato, "Tongan'ak! Betapa io sangat ngasih'ik Lazarus!" ³⁷ Akan tetapi, beberopei urank di antaro sidok bekato, " Com d'patkah Io yo dah mbukok mato urank butok tuk, gam mulah Lazarus com mati?" ³⁸ Yesus, yo sekali gik ngerang d'lom dirik-A, pogi ke kuburan. Kuburan nyin te sebuah gua, kant sebuah b'tu diletakkan nutup'ik'a. ³⁹ Yesus bekato, "Singkirkan b'tu nyin!" Marta, medik urank yo mati nyin, bekato kepado-A, "Doto, tum pasti akan ado bous buntau dongah io dah mati selambet 4 ari." ⁴⁰ Yesus njawab io, "Kankah Aku dah ngatokan kepado kau bahwa mun ikau pecayok, ikau akan nongan kemuliaan Allah?" ⁴¹ J'di sidok ngangkit b'tu nyin. Lalu, Yesus nengadah kant bekato, "Bapa, Aku besyukur kepado Duen dongah Duen dah ningokan Aku. ⁴² Aku tau bahwa Duen selalu ningokan Aku, tetapi dongah urank-urank yo bediri di sekeliling-Ku, Aku ngatokan hal nyin supayo sidok pecayok bahwa Duen'ak yo dah ngutus Aku." ⁴³ Dah ngatokan nyin, Yesus beseru ngan soro koras, "Lazarus, keluar'ak!" ⁴⁴ Urang yo dah mati nyin keluar, j'ri kant kaki'a gik tekobet tali kafan, kat muko'a gik tetutup kain kafan. Yesus bekato kepado sidok," Lopaskan'ak kain-kain nyin d'rik'a kant ronak pom io pogi." ⁴⁵ Urang-urang Yahudi yo d'tang ngunjung'ik Maria, kant nongan pei yo dah Yesus lakukan, nj'di pecayok kepado-A. ⁴⁶ Akan tetapi, beberope d'rik sidok nd'tang'ik urank-urank Farisi kant mboriktau sidok pei yo dah dilakukan Yesus. ⁴⁷ Mako, imam-imam kepalok kant urank-urank Farisi ngadokan petemuan Sanhedrin kant bekato, "Pei yo akan kito lakukan? Dongah, Urank tuk ngelakukan b'nyak tandok ajaib. ⁴⁸ Mun kito ngeronakkan Io terus tokuh tuk, semuo urank akan pecayok kepado-A kant urank-urank Roma akan d'tang ntuk ngerampas tempat tuk kant bangsa kito." ⁴⁹ Akan tetapi, seurank d'rik sidok yo bedemio Kayafas, yo nj'di imam bosar pado tahun nyin, bekato kepado sidok, "Kulok com tau pei-pei, ⁵⁰ ataupun mpetimbangkan bahwa lobih b'et sutik urank mati ntuk seluruh bangsa, d'rikpado seluruh bangsa binaso." ⁵¹ Io com ngatokkan'a d'rik dirik'a surank, tetapi sebagai Imam Bosar taun tuk, io benubuat bahwa Yesus akan mati ntuk bangsa nyin. ⁵² Kant, kan'a engkah ntuk bangsa Yahudi gam, ngelainkan pun ntuk ngumpulkan nj'di sutik anak-anak Allah yo tesebar. ⁵³ Mako, sejak ari nyin, sidok sepakat ntuk mbunuh Yesus. ⁵⁴ Dongah nyin, Yesus com gik bej'len secaro terang-terangan di antaro urank-urank Yahudi, tapi Io pogi d'rik nun ke wilayah somak padang belantara ke sebuah kota bedemo Efraim; kant Io tinggel di nun besamo murid-murid-A. ⁵⁵ Waktu nyin, Paskah urank Yahudi dah somak, kant b'nyak urank d'rik wilayah nyin pogi ke Yerusalem sebolom Paskah ntuk nyucikan dirik sidok. ⁵⁶ Lalu, sidok ngogok Yesus kant bebicaro sutik kepado yo lain sementara sidok bediri d'lom bait Allah, sidok saling betanyok, "Koti ngenurut kau? Peikah Io samo sekali com akan d'tang ke perayaan tuk?" ⁵⁷ Adopun imam-imam kepalok kant urank-urank Farisi dah ngeluarkan perintah bahwa mun seseurank tau di mone Io beado, urank nyin cak ngelaporkan'a supayo sidok d'pat nangkap-A.