¹ Yesus bekato, "Ngan sebujor'a, Aku ngatokan kepado kau, urank yo mansuk kekandang domba ngan com ngelalu'ik lawang, ngelainkan ngan nait ngelalu'ik j'len lain, urank nyin te pencuri kan perampok. ² Akan tetapi, urank yo mansuk ngelalu'ik lawang, io te gembala domba. ³ B'gi'a, penj'go mbukokkan lawang, kant domba-domba ngeningo soro'a, kant io nyakau domba-domba'a surank ngan demo sidok, sreto nuntun sidok keluar. ⁴ Dah ngeluarkan semuo domba'a, io bej'len didepan sidok kan domba-domba'a akan nuntut io dongah sidok ngenal soro'a. ⁵ Urang asing com akan sidok nuntut'ik, tetapi sidok akan lari d'rik pado'a dongah sidok com ngenal soro urank-urank asing." ⁶ Perumpamaan nyin'ak yo dikatokan Yesus kepado sidok, tapi sidok com ngerti pei yo b'ru Yesus katokan kepado sidok. ⁷ Tam sebab nyin, Yesus bekato gik kepado sidok, "Sesungguh'a, Aku bekato kepado kau, Aku'ak lawang ke domba-domba nyin. ⁸ Semuo urank yo d'tang sebolom Aku te pencuri kant perampok, tetapi domba-domba com ngeningo sidok. ⁹ Aku'ak lawang. Mun seseurank mansuk ngelalu'ik Aku, io akan diselamatkan, kant akan keluar mansuk, sreto nomukan padang rumput. ¹⁰ Pencuri d'tang engkah ntuk ncuri, mbunuh, kan mbinasokan; Aku d'tang supayo sidok mpunya'ik idup, kant mpunya'ik secaro belimpah. ¹¹ Aku'ak Gembala yo b'et; gembala yo b'et mborikkan nyawo'a b'gi domba-domba. ¹² Seurang upahan, com seurank gembala, yo kan'a pemilik domba-domba nyin, nongan srigala d'tang, io ninggelkan domba-domba nyin kant lari; srigala nyin akan ncerabak kant ngancorkan domba-domba nyin. ¹³ Io lari dongah io seurank upahan kant com peduli pado domba-domba nyin. ¹⁴ Aku'ak gembala yo b'et. Aku ngenal domba-domba-Ku kant domba-domba-Ku ngenal Aku ¹⁵ Samo tokuh Bapa ngenal Aku kant Aku ngenal Bapa; kan Aku mborikkan nyawo-Ku b'gi domba-domba nyin. ¹⁶ Aku gam mpunya'ik domba-domba lain yo kan'a d'rik kandang tuk; Aku cak mbeik sidok gam, kan sidok akan ningo soro-Ku; kan sidok akan nj'di sutik kawanan ngan sutik gembala. ¹⁷ Dongah tuk'ak Bapa ngasih'ik Aku, sebab Aku mborikkan nyawo-Ku supayo aku d'pat ngambik'a b'lik. ¹⁸ Com seurank pun dah ngambik'a d'rik-Ku, ngelainkan Aku'ak yo morik'a mnurut kehendak-Ku surank. Aku mpunyaik hak ntuk mborikkan nyawo-Ku, kant Aku pun mpunya'ik hak ntuk ngambik'a b'lik. Tukk'ak perintah yo Aku terimok d'rik Bapa-Ku." ¹⁹ Sekali gik, ado pepocahan di antaro urank-urank Yahudi dongah pekatoan Yesus nyin. ²⁰ B'nyak d'rik sidok yo bekato, "Io kerasukan roh jahat kant nj'di gilo. Ngopei kulok ningokan Io?" ²¹ Yo lain bekato, "Nyin kan'a pekatoan seurank yo kerasukan roh jahat. D'patkah roh jahat mbukok mato urank butok?" ²² Pado waktu nyin, ari raya pentahbisan belangsung di Yerusalem. Waktu nyin musim colap, ²³ Kant Yesus gik be'j'len di Bait Allah, yaknyin di Serambi Salomo. ²⁴ Lalu, urank-urank Yahudi bekumpol ngeliling'ik Io kant bekato kepado-A, "Beropei lambet gik Ikau ngeronak jiwa kami bimbang? Mun Ikau Kristus, katokan'ak terus terang kepado kami." ²⁵ Yesus njawab sidok, Aku dah ngatokan'a kepado kau, tetapi ikau com pecayok. Pe'krejoan-pe'krejoan yo Aku lakukan d'lom demo Bapa-Ku, nyin'ak yo mborikkan kesaksian tentang Aku. ²⁶ Akan tetapi, Ikau com pecayok dongah ikau com temansuk domba-domba-Ku. ²⁷ Domba-domba-Ku ningokan soro-Ku, Aku ngenal sidok kant sidok nuntut'ik Aku. ²⁸ Aku mborikkan idup kekal kepado sidok, kant sidok com akan kolok binasa; kant com seurank pun d'pat ngerobut sidok d'rik jeri-Ku. ²⁹ Bapa-Ku, yo dah mborikkan sidok kepado-Ku, lobih bosar d'rikpado semuo, kant com ado seurank pun d'pat ngerobut sidok d'rik j'ri Bapa. ³⁰ Aku kant Bapa te'ak sutik." ³¹ Sekali gik, urank-urank Yahudi ngambik b'tu ntuk ngelempar'ik Yesus. ³² Akan tetapi, Yesus bekato kepado sidok, "Aku dah nunjukkan kepado kau b'nyak pekrejoan b'et d'rik Bapa, pekrejoan monekah d'rik antaro'a yo mulah kau ndak ngelempar'ik Aku pakai b'tu?" ³³ Urang-urang Yahudi nyin njawab Io, "Kan'a dongah suatu pekrejoan b'et kami ndak ngelempar'ik Ikau pakai b'tu, melainkan dongah hujat; Kant dongah Ikau, yo engkah seurank ensio, nj'dikan dirik Ikau Allah." ³⁴ Yesus njawab sidok, "Kankah tetulis d'lom Kitab Taurat kau, 'Aku dah befirman, ikau te allah'? ³⁵ Mun Allah nyobut sidok yo nerimok firman nyin 'allah', padahal Kitab Suci com d'pat dibatalkan, ³⁶ opekah ikau ngatokan tentang Io yo dah Bapa Kuduskan kant utus ke d'lom dunio, 'Ikau ngehujat' , dongah Aku bekato kepado kau, 'Aku te Anak Allah'? ³⁷ Mun Aku com ngelalukan pekrejoan-pekrejoan Bapa-Ku, nang pecayok ka Aku. ³⁸ Akan tetapi, mun Aku ngelakukan pekrejoan-pekrejoan nyin, meskipun ikau com pecayok kepado-Ku, pecayok'ak akan pekrejoan-pekrejoan nyin supayo ikau tau kant ngereti bahwa Bapa di d'lom Aku, kant Aku di d'lom Bapa." ³⁹ Sekali gik, sidok ncubo nangkap Yesus, tetapi Yesus lolos d'rik sidok. ⁴⁰ Lalu, Yesus pogi gik nyeborank'ik sungai Yordan nuju ke tempat Yohanes patamo kali mbaptis doluk kant Yesus tinggel dinun. ⁴¹ B'nyak urank d'tang kepado Yesus kan bekato, "Meskipun Yohanes com ngelakukan sutik tandok ajaib pun, tetapi semuo yo dikatokan Yohanes tentang Urank tuk bujor." ⁴² Kant b'nyak urank nj'di pecayok kepado Yesus di nun.