¹ Dongah nyin, saudero-saudero yo kudus, ikau yo mpunya'ik bagian d'lom panggilan sorgawi, pandang'ak Yesus, Sang Rasul kant Imam Bosar pengakuan kito, ² yo setia kepado Io yo udah netapkan-A, samo tokuh Musa yo setia d'lom seluruh rumah-A. ³ Sebob, Yesus dianggop layak ntuk d'pat kemulioan yo lobih bosar d'ripado Musa, tokuh hal'a seurang pembangun umah yo nd'pat kehormatan lobih bosar d'rikpado umah nyin surang. ⁴ Sebob, setiap umah dibangun tam seseurang, tetapi Pembangun d'ri segelo sesuatu te Allah). ⁵ Musa setia d'lom seluruh umah Allah sebegei seurang pelayan, ntuk morik kesaksian kepado hal-hal yo akan dikatokan di kemudian ari. ⁶ Tapi, Kristus setia sebegei Anak d'lom umah Allah, yonyin kito, mun kito tetap bapijab toguh pado keyakinan kant pengorapan yo kito banggakan sampai akhir. ⁷ Dongah nyin, tokuh Roh Kudus katokan, "Pado ari tuk, mun ikau ningo soro-A, ⁸ nang'ak koraskan ati kau tokuh d'lom pembrontakan yo ikau lakukan pado ari pencobaan di padang gurun, ⁹ yonyin tengkalo inek moyang kau ncobo'ik Aku kant nongan pebuetan-pebuetan-Ku selambet empat puluh tahun. ¹⁰ Sebob nyin'ak Aku godik kepado generasi nyin kant bakato 'Ati sidok slalu sosat kant sidok com ngereti j'len-j'len-Ku.' ¹¹ J'di, Aku basumpah d'lom godik-Ku sidok com kan mansuk ke tompat pehentian-Ku"'. Mazmur95:7-11 ¹² Be'ati-ati'ak saudero-saudero, nang'ak ado di antaro ikau yo mpunya'ik ati yo jahat kant yo com pecayok, yo nyuruh kau bapaling d'ri Allah yo idup. ¹³ Sebelik'a, nasihat'ak sutik samo yo lain tiop ari, selambet gik ado yo di sobut “hari tuk“ supayo com ado di antaro kau yo dikoras tam tipu daya dosa. ¹⁴ Kito dah ngambik b'gian di d'lom Kristus, jmun kito bepijab toguh pado keyakinan kito yo semulo sampai pado akhir'a. ¹⁵ Tokuh tetulis, “ Pado ari tuk, mun ikau ningo soro-A, nang'ak ngoraskan ati kau tokuh d'lom pembrontakan.” Mazmur 95:7 b-9 ¹⁶ Sopeikah urank-urank yo dah ningo soro Allah, tetapi mberontak ? Kan'kah sidok semuo yo kluar d'ri Mesir di beruh kepemimpinan Musa? ¹⁷ Kant, kepado sopei Allah godik selambet empat puluh taun ? Kan'kah kepado sidok yo bebuet dosa sehingga mayat sidok begelempang di padang gurun? ¹⁸ Kant, kepado sopei Allah basumpah bahwa sidok com akan kolok mansuk ketompat pehentian-A, mun kan'a kepado sidok yo com ta'at? ¹⁹ J'di, kito ngenongan bahwa sidok com d'pat mansuk dongah kecompecoyak'an sidok.