¹ Tam dongah nyin, selambet jenji ntuk mansuk ke tompat pehentian-A mansih beraku, ronak'ak kito ngeraso golak, mun-mun ado di antaro kito yo belang nd'patkan jenji nyin. ² Mang betol, kaber b'et udah diberitokan kepado kito, tokuh gak dah dibritokan kepado sidok, tetapi brito yo sidok ningo nyin com nguntungkan b'gi sidok dongah com disatukan ngan iman urang-urang yo ningo'a. ³ Dongah kito yo pecayok, akan mansuk ke tompat pehentian nyin, tokuh yo di katokan-A, "Aku basumpah d'lom godik-Ku: 'Sidok com akan kolok mansuk ke tompatpehentian-Ku,"' Mazmur95:11 bierpun pekrejoan Allah udah selesai sejak penciptaan dasar dunio tuk. ⁴ Sebob, d'lom sebuah nas, Allah bebicaro piok, tontang ari ketujuh, "Pado ari ketujuh, Allah bronti d'rik semuo pekrejoan-A." ⁵ Akan tetapi, tokuh yo dah dikatokan Allah, "Sidok com akan mansuk ke tompat pehentian-Ku." ⁶ J'di, mansih ado kemungkinan ntuk sebegian urang mansuk ke tompat perontian, kant ado sebegian urang yo sebolom'a udah ningo kaber b'et, tetapi b'lang mansuk dongah kecomtaatan sidok. ⁷ J'di, sekali agik Allah netapkan satu ari tetentu, yo di sobut " ari tuk", yo udah dikatokan nglalu'ik Daud jeuh ari sebolom'a, "Pado ari tuk, mun ikau ningo soro-A, nang'ak koraskan ati kau tokuh d'lom pembrontakan". Mazmur 95:7-8. ⁸ Sebob, mun Yosua dah morik sidok tompat perontian, mako Allah com akan agik bicaro tontang suatu ari lain di kemudian ari. ⁹ Mun piok, mako mansih ado pembrontian pado ari Sabat ntuk umat Allah. ¹⁰ Ntuk sidok yo udah mansuk ke tompat pembrontian Allah, sidok gak dah be'istrahat d'rik pekrejoan'a, tokuh yo Allah lakukan d'rik pekrejoan-A. ¹¹ Dongah nyin, ayok'ak kito bejuang ntuk mansuk ke tompat pembrontian nyin, sehinggo com seurang pun j'tuk dongah nuntut contoh kecomtaatan yo samo. ¹² Sebob, firman Allah nyin idup kant bekuaso, kant lobih tajom d'ripado pedang bemato duok monepun. Firman nyin nusuk jeuh sampai misahkan jiwo kant roh, antaro sendi kant tulang sumsum, serto sanggup nilai pikeran kant kehendak ati kito, ¹³ Com ado suatu mahluk pun yo batapuk d'rik pandangan-A.Sebelik'a, segelo sesuatu telanjang kant com tatapuk d'rik mato-A. Kepado Io'ak kito arus morik petanggungjawaban atas semuo yo kito lakukan. ¹⁴ Dongah kito mpunya'ik Imam Bosar Agung yo udah nait ke srugo, yonyin Yesus, Anak Allah, ayok'ak kito torus bapijab toguh pado pengangkuan kito. ¹⁵ Sebob. kito com mpunya'ik Imam Bosar yo com d'pat maham'ik kelomahan-kelomahan kito, tetapi kito mpunya'ik Imam Bosar yo udah dicobo'ik d'lom segelo hal, samo tokuh kito, tetapi Io com bedosa. ¹⁶ Dongah nyin, ngan keyakin, ayok'ak kito d'tang ngampir'ik Tahta Anugrah supayo kito nrimok belas kasihan kant nomukan anugrah ntuk nulung kito, tengkalo kito mrelukan'a.