¹ Angkitn sanape' parayaan Paskah waktu Yesus udah nahui' kade' waktuE udah atakng kade' ia arus kaluar dari dunia nyian ka Apa' Aka' gasihi' milikE nang ada daapm dunia, Ia ngasihi' kabatne sampe akhir. ² Angkitn iblis udah muangan ka daapm ati Yudas Iskariot anak Simon, untuk ngianati' Yesus. ³ Ia udah nahui' kade' Apa' udah mare' sagalae kadaapm kokotE lalu kade' ia udah atakng umpat ka Jubata Panampa' lalu muakng agi' ka Jubata Panampa'. ⁴ Ia badiri dari makatn-maam lalu Ia muka' bajuE Ia muangan ka luar. Lalu Ia naap andok Ia mulatatn ka tubuhE. ⁵ Lalu Ia nuangan ai' ka daapm pasu basi mulai'lah Ia nyasah paha para murite Ia ngalap ba andok nang Ia mulatatan ka tubuhe tadi. ⁶ Ia atakng ka Simon Petrus, lalu Simon Petrus bakata ka Ia," Jubata, ahe ge' kita' nyasaha' pahaku?" ⁷ Yesus nyawab jakatae," Ahe nang Aku pinjawat nyian kao ina' ngarati, tapi kao pasti ngarati dah anae." ⁸ Petrus bakata ka Ia," Kita' ina' akan paranah nyasaha' pahaku." Yesus nyawab," Kade' Aku ina' nyasah pahanyu kao ina ada bagian ka Aku. ⁹ Simon Petrus bakata ka Ia," Jubata, ame kahe nyasah pahaku aja' tapi kokot ba kapalaku uga' ¹⁰ Jakata Yesus," Urakng nang udah mani' ina' paralu nyasah tubuhe kacoali nyasah pahae, saluruh tubuhe baraseh, kao udah baraseh tapi ina' samua kao baraseh." ¹¹ ( Sabab Yesus udah nahui' sae nang mao' hianatia' Ia; maka koa Ia bakata," ina' samua dari kita' baraseh.") ¹² Waktu Yesus udah nyasah paha kabatne Ia naap pakeanNe Ia duduk agi', Ia bakata ka kabatne," Nahui' ge' kita' ahe nang udah pinjawat ka kita' untuk kiya'? ¹³ Kita' nyaru' aku ' guru' ba Jubata,' kita' bakata banar, sabab ayakoalah Aku. ¹⁴ Lalu, kade' Aku, Jubata ba Guru, nang udah nyasah paha kita', kita' uga' arus nyasah nang lainne. ¹⁵ Sabab Aku udah mare' contoh nang baik biar kao uga' arus minjawat ahe nang aya nang udah Aku pinjawat ka kita'. ¹⁶ Nang sabatole, Aku bakata ka kita'," Saorang amba ina' labih aya' dari tuanne, ayakoapun urakng nang diutus ina' labih aya' dari nang ngutus iya. ¹⁷ Kade' kita' nahui' tentang hal-hal nyian, kita' akan diberkati' kade' majaanan samuaee. ¹⁸ Aku buke' bakata tentang kita' samuaee, sabab aku nahui' sae nang udah Aku pilih-tapi Aku bakata ayanyian biar kitab-firman bisa dipanuhi': Ia nang makatn rotiku ngangkat tumite malawan Aku." ¹⁹ Aku nyampeatn hal nyian sanape' hal nyian tajadi biar waktu hal nyian tajadi, kita' bisa picaya' kade' AKULAH. ²⁰ Sasungguhe Aku bakata ka kita', barangsae nang narima' Aku narima' saepun nang Aku utus, lalu barangsae nang narima' Aku narima' Ia nang ngutus Aku. ²¹ Waktu Yesus ngataatn hal nyian Ia taguncakng daapm roh, Ia saksiatn sambil ngataatn," Sasungguhe, Aku bakata ka kita' kade' salah seko' dari kita' akan manghianati' Aku." ²² Samua murite batee' tee' sabayaatne, bapikir sae nang Ia ngataatn koa. ²³ Seko' dari muritTe, nang Yesus kasihi', basandar ka meja baadapatn ka dada Yesus. ²⁴ Sabab koa Simon Petrus mare' isyarat ka murit nyian lalu bakata," Kataatn ka kami sae koa nang Ia ngomongan. ²⁵ Maka Ia basandar ka dada Yesus ia ba tanya' ka Ia," Jubata sae me uraknge koa?" ²⁶ Jawab Yesus," Ia koalah nang akan Aku nyalupatn irisatn roti lalu Aku bareatn ka ia." Jaji waktu ia udah nyalupatn roti koa, Ia mareatn ka Yudas anak Simon Iskariot. ²⁷ Aka' roti koa, lalu setan masok ka daapmme, lalu Yesus bakata ka ia," Ahe nang agi' kau karajaan, karajaanlah koa bijak - bijak. ²⁸ Angkitn ina' ada seko'pun nang ka meja koa nahui' ahe alasan Yesus bakata ayanyian ka kabatne. ²⁹ Sangahe urakng bapikir kade' Yudas nyingii' kantong duit, Yesus bakata ka Ia," Balilah hal - hal nang diri' pararuatn untuk parayaan," atau sabab ia marea; barang ka urakng miskin. ³⁰ Aka' Yudas narima' roti ia ampus bijak-bijak, waktu koa udah maam. ³¹ Waktu Yudas udah dari, Yesus bakata ka kabatne," Angkitn Anak Manusia dimuliatn, lalu Jubata Panampa' dimuliaatn daapm me. ³² Jubata Panampa' akan muliaatn Ia daapm diriE sandiri' lalu Ia akan muliaatn Ia sabijake. ³³ Anak-anakKu, Aku ada masih sadikit waktu untuk diri' basama, Kita' akan ngagui' Aku, aya nang udah Aku ngataatn ka urakng Yahudi, " kamae Aku ampus, kita' ina' bisa atakng.' angkitn aku uga' ngataatn hal nyian ka kita'. ³⁴ Aku mare' ka kita' parentah nang barahu,kade' kita' saling mangasihi'; aya Aku ngasihi' kita', ayakoa uga' kita' saling mangasihi'. ³⁵ Malalui' hal nyian samua urakng akan nahui' kade' kita' adalah murid- muridKu, kade' kita' mangasihi' seko' ba nang lainne. ³⁶ Simon Petrus bakata ka Ia," Jubata kamaea' kita' mao' ampus?" Yesus nyawab," Kamae Aku mao' ampus, kao angkitn nape' bisa ampus, tapi kao akan ikut ana. ³⁷ Petrus bakata ka Ia," Jubata, ngahe aku ina' bisa ampus angkitn nyian?" Aku nyarahatn idupku ka Kita'." ³⁸ Yesus nyawab," Mao' me kao nyarahatna' kaidupatnnyu untukKu? sasunguhe, Aku bakata ka kita'," manok sabungan ina' akan nyingkokok sanape' kao nyangka Aku tali kai."