¹ " Amelah biaratn atinyu taganggu'. Kao picaya' ka Jubata Panampa' picaya' uga ka Aku. ² Ka rumah apa' Ku manyak tampat badiapm, kade' hal koa buke' ayanyian, Aku arus mare' nahui' kita', kade' Aku ampus untuk nyiapatn tampat untuk kita'. ³ Kade' Aku ampus lalu nyiapatn suatu tampat untuk kita', aku akan atakng agi' lalu narima' kita' ka Aku sandiri' biar dimae Aku barada kita'pun uga' ada. ⁴ Kao nahui' maraga kamae Aku ampus." ⁵ Tomas bakata ka Yesus," Jubata, kami ina' nahui' kamae kita' ampus; ayamae kami bisa nahui' maraga koa?" ⁶ Yesus bakata ka ia," Akulah maraga, kabanaratn, ba kaidupatn, ina' seko'pun atakng ka Apa' kacoali malalui' Aku. ⁷ Kade' kita' kanal ka Aku, tantu kita' kanal ka Apa'Ku; mulai' angkitn nganal Ia lalu udah nee' Ia. ⁸ Filipus bakata ka Yesus," Jubata, tojokatn Apa' koa, lalu koa akan cukup bagi kami." ⁹ Yesus bakata ka ia," Aku udah lama basama kao, lalu kao masih nape' kanal ka Aku, Filipus?. Barangsae udah nee' Aku udah nee' Apa' ayamae kao bakata," Tojokatn ka kami Apa' koa?" ¹⁰ Ina'lah kita' picaya' kade' Aku adalah Apa', lalu Apa' kadaapmKu? Pakataatn - pakataatn nang Aku ngucapatn buke' atas kamaoanKu, tapi Apa'lah nang ada idup kadaapmKu nang majaanan pakarajaatnKu. ¹¹ Picaya'lah ka Aku, kade' Aku kadaapm Apa', lalu Apa' ada kadaapmKu, sabalike picaya'lah ka Aku sabab pakarajaatn- pakarajaatnKu koa. ¹² Sasungguhe, aku bakata ka kao, bararangsae nang picaya' ka Aku mao' majaanan pakarajaan nang Aku majaanan, lalu Ia mao' majaanan pakarajaatn nang labih aya' dari pada nyian sabab aku agi ampus ka Apa'. ¹³ Ahepun nang kao minta' daapm damaKu, Aku mao' majaanan biar Apa' bisa diagungan daapm Anak. ¹⁴ Kade' kao minta ahepun daapm damaKu, koa mao' Aku pajaanan. ¹⁵ Kade' kao ngasihi' Aku, kao akan mihara parentah- parentahKu. ¹⁶ lalu Aku badoa ka Apa', lalu Ia akan mare'i' kao panolong nang lain biar Ia bisa basama kao salamae. ¹⁷ Roh kabanaratn. Dunia ina' bisa narima' Ia sabab dunia ina' nee' Ia atao kanal ka Ia. Tapi kao nganal Ia, sabab Ia diapm basama lalu akan kadaapmnyu. ¹⁸ Aku ina' hane ningaatn kao babaro, Aku pasti muakng agi'. ¹⁹ Kahe sadikit waktu agi' lalu dunia ina' nee' Aku agi', tapi kao nee' Aku. Sabab Aku idup kao uga' idup. ²⁰ Waktu ari koa kao nahui' Aku idup daapm Apa', lalu kao ada daapmKu, lalu Aku ada daapm dirinyu. ²¹ barangsae nang milik' parentah - parentahKu lalu mihara iya samuae, Ia adalah urakng nang mangasihi' Aku; lalu barangsae nang mangasihi' Aku akan dikasihi' Apa'Ku, lalu Aku akan ngasihi' ia lalu akan Ku teeatn diri'Ku ka ia. ²² Yudas ( buke' Iskariot ) bakata ka Yesus," Jubata ahelah nang tajadi lalu kita' kahe neeatn diri' Kita' sandiri' ka kami lalu buke' ka dunia nyian?" ²³ Yesus nyawab lalu bakata ka ia," Kade' urakng ngasihi' Aku, ia akan mihara pakataatnKu.Apa'Ku akan ngasihi' ia, lalu akan atakng ka ia, lalu akan minjawat tampat kami badiapm ba ia. ²⁴ Barangsae nang ina' ngasihi' Aku ina' mihara pakataatnKu. Pakataatn nang kao dangar buke milikKu tapi dari Apa' nang ngutus Aku. ²⁵ Aku udah ngataatn hal - hal nyian ka kao, samentara Aku masih idup ka antara kita'. ²⁶ Tapi pangibur Roh Caikng, nang anae Apa' akan ngutus daapm damaKu----Ia akan ngajar kao samua nang ngicakng kao ka ingatannyu samua nang Aku ngataatn ka kao. ²⁷ Damai Aku masari' ka kao,; Aku mareatn damaiKu ka kao. Aku ina' mareatn iya aya nang dunia mareatn. Amelah biaratn atinyu taganggu', lalu amelah biaratn atinyu gai'. ²⁸ Kao udah nangar ayamae Aku udah ngataatn ka kao, Aku akan ampus, lalu Aku akan atakng agi' ka kao.kade' kao ngasihi' Aku, kao bisa ba suka cita sabab Aku agi' ampus ka Apa', sabab Apa' labih aya' daripada Aku. ²⁹ Angkitn udah Aku ngataatn sanape' hal koa tajadi, lalu biar hal tajadi, kao akan picaya'. ³⁰ Aku ina' akan bakata manyak agi' ka kao, sabab panguasa dunia nyian atakng. Ia ina' punya kuasa atasKu. ³¹ Tapi biar dunia nahui' kade Aku ngasihi Apa', Aku majaanan iya sama aya nang diparentahatn Apa' ka Aku. Ije' diri' bangkit lalu ampus dari dian.