¹ O koya oqo era sa yali kinia ni lewai me cudruvi ko ira era sa tu vata kei Karisito Jisu, era sa yali ni muria lia na Yalo Tabu. ² Ni sa sereki au mai na vunau ni bula vi Karisito Jisu. ³ Ia ni sa yali rawarawa vi nai vunau, sa malumalumu ena vuku ni tovo vayago, sa qai lewa na Kalou me mate na ca e na yago, ni sa tala na luvena ena i tovo ni yago sa tu kinia na ca, ka mei soro ni valavala ca: ⁴ me caka rawa kinia nai valavala dodonu ni vunau, ni da sa yali ni muria tiko nai tovo vayago eda sa muria lia na yalo: ⁵ ni ra sa gadrevia na vika vayago ko ira era sai tovo vayago; ia na vika vayalo ko ira era sai tovo vayalo. ⁶ Ni sa vuni mate na gadrevi nai tovo vayago; ia sa vu ni bula kei na vacegu na gadrevia na tovo vayalo. ⁷ Ni sa vimecaki kei na Kalou nai tovo vayago: ni sa yali ni varogocia na vunau ni Kalou, ia sa dredre sara me vakinia. ⁸ Ia ko ira sai tovo vayago, era sa yali ni caka rawa na ka e vinaka vua na Kalou. ⁹ Ia sa yali ni vayago na nomunu i tovo, sa vaylo lia, kevaka sa dini ni tiko e na lomamunu na Yalo n Kalou. Ia kevaka sa dua na tamata sa yali ni tiko e lomana na Yalo i Karisito, sa yali ni nona o koya. ¹⁰ Ia kevaka sa tiko e na lomamunu na Karisito, sa dina lia sa mate na yago e na vuku ni valavala ca; ia na yalo sa bula e na vuku ni vivadonui. ¹¹ Ia kevaka sa tiko vadua e lomamunu na Yalo i koya sa vaturi cake voki mai na mate, o koya sa vaturi Karisito voki mai na mate, ena vabuoa voki na yagomunu sa mate rawa, e na Yalona sa tiko vadua e na lomamunu. ¹² O koya, kemunu na viwekani, eda sa yali kinia ni vauci ki nai tovo vayago, me da muria nai tovo vayago: ¹³ ni dou na mate kevaka dou sa muria nai tovo vayago; ia kevaka sa vivuke kei kemnuu na Yalo Tabu me vaoti nai valavala vayago, dou na bula kinia. ¹⁴ Ia ko ira lia sa tuberi ira na Yalo n Kalou sa luve ni Kalou. ¹⁵ Ni dou sa yali rawatia voki na Yalo ni Kaloumo dou rere; ia dou sa rawatia na Yalo Tabu dou sa vabautia kinia me gone, o koya eda sa kaci kinia, Apa, Tamada. ¹⁶ A Yalo koya sa tukunia mai vi na yaloda, ni da sa luve ni Kalou: ¹⁷ ia kevaka eda sa gone, eda na qai taukei; eda na taukenia na vika ni Kalou, eda sai taukei vata kei Karisito; kevaka eda sa vosotia vata kaya na ca, eda na vaklougatataki vata kaya voki lia. ¹⁸ Ni'u sa vaka sa yali ni yaga me rau vatautauvatani na ka ca sa vosoti e na bula koya kei na kalougata ena vakarairaitaki kivei keda e muri. ¹⁹ Ni sa gadrevia valevu o vuravura ka wawa tiko lia me ra varairaitaki ko ira na luve ni Kalou. ²⁰ Ni sa vamalumalumutaki o vuravura me ca, a sa yali ni vinakatia, e na vuku i koya lia sa vamalumalumutakia, vanuinui tiko, ²¹ ni na sereki voki lia ko vuravura mai na kena vabobulataki ki na rusa, ka me lalaga tu ka vaiukuukutaki vata ki ira na luveni Kalou. ²² Ni da sa kila, sa vutugu vata ko vuravura taucoko, ka sa yaluma e na rarawa, ka yacovia na siga koya. ²³ A sa yali ni koya wale lia, oi ita voki lia, eda sa rawatia nai sevu ni Yalo Tabu, e da sa vutugu tiko e lomada ni sa warakia me da vabautia me gone, ni sa vabulai na yagoda. ²⁴ Ni da sa bula e na nuinui: ia nai nuinui sa bale ki na ka sa qai raici sa yali ni nuinui dina: ni sa nuitakia vacava na tamata na ka sa qai raicia? ²⁵ Ia kevaka eda sa nuitakia na ka eda sa yali ni raivia, eda sa vosotia lia me warakia tiko. ²⁶ Ia na Yalo Tabu voki lia sa vukea na noda malumalumu: ni da sa yali ni kila na ka e kilikili kei ita me da kerea: a sa masulaki keda na Yalo Tabu e na vutugu e yali ni cavuti rawa. ²⁷ Ia ko koya sa dau dikevia na yaloda sa kila na loma ni Yalo Tabu, ni sa masulaki ira na tamata lotu me vakan a loma ni Kalou. ²⁸ Ni da sa kila sa vivuke na ka kece lia me ra vinaka kinia era sa lomani na Kalou ko ira sa kacivi me vaka na ka sa nakiti oti. ²⁹ Ia ko ira kece sa kilai ira e liu ko koya, sa lesi ira eliu era sa kacivi me vaka na ka sa nakiti oti. ia ko ira sa lesi ira eliu ko koya, sa qai kacivi ira: ³⁰ ia ko ira sa kacivi ira ko koya, sa vadonui ira: ia ko ira sa vadonui ira ko koya, sa vaiukuukutaki ira. ³¹ A cava me da qai kaya ena vi ka koya? Kevaka sa totaki ita na Kalou, o cei me noda meca? ³² Ena vaevei ko koya sa yali ni bureitakia na Luvena dina, ia sa soli koya yani me ita i sosomi kece lia, ena dredre vacava vua me solia wale lia vi ita na ka kece lia vata kaya? ³³ O cei me beitaki ira sa digitaki ira na Kalou? Na Kalou sa vadonuya. ³⁴ O cei ena lewa me ra cudruvi ? O Karisito Jisu lia sa mate, io, sa bula cake voki , a sa tiko voki lia e na liga i matau ni Kalou, ka sa masulaki ita. ³⁵ O cei me na tawasei ita mai na loloma i Karisito? a ka rarawa li, se na yaluma, se na dausiga, se na luvawale, se na dauvivarerei, se nai selewau? ³⁶ Me vaka na ka sa volai, E na vukumunu keitou sa vamatei kinia e na siga taucoko ka bogi: Keitou sa vatauvatani kei na sipi ena vamatei. ³⁷ E yali, e na ka kece lia koya eda sa gumatua kinia, e na vuku i koya sa lomani ita. ³⁸ Ni'u sa kila vaidina, ni na yali ni rawatia na mate, se na bula, se ko ira na agilose, se ko ira na liu, se ko ira sa kaukauwa, se na vika sa yaco e daidai, se na vika ena yaco emuri, ³⁹ se na ka cecere, se na ka titobu, se dua tani na ka, me tawasei ita mai na loloma ni Kalou, sa yaco e na vuku i Karisito Jisu na noda Turaga.