Wase 9
1
Au sa vosa dina e na mata i Karisito, au sa yali ni vosa lasu, sa vadinadina voki lia vi au na noqu lewa-e-loma e na Yalo Tabu,
2
ni'u sa rawarawa valevu, a sa yaluma tiko lia na lomaqu.
3
Ni ka'u sa daugadrevia me'u tawase tani vi Karisito, e na vukudra na wekaqu, o ira era sa wekaqu dina vayago:
4
era sa luvei Isireli; sa nodra voki lia na vakabau me ra gone, kei nai ukuuku, kei na viyalayalati, kei na soli vunau, kei nai valavala ni soro vua na Kalou, kei na vosa ni yalayala:
5
sa nodra ko ira na qase, a sa tubu mai vi ira na Karisito me vaka na yagona, o koya sa lewa na ka kece lia, na Kalou sa varokorokotaki ka tawa mudu. Emeni.
6
Ia sa yali ni vaka sa yaco na vosa ni Kalou. Ni ra sa yali ni Isireli dina ko ira kece sa mai vei ira na Isireli:
7
era yali voki lia ni luvena ko ira kece lia na kawa i Eparaama: ia Na kawa i Aisake lia ena vatokai me nomu kawa.
8
Sa kenai balebale koya, O ira na luvena vayago, era sa yali ni luve ni Kalou; ia na luve ni yalayala lia era sa vabau me kawa.
9
Ni sa va koya na vosa ni yalayala, E na gauna va koya ka'u na qai mai, ka na sucu vei Sera e dua na gonetagane.
10
A sa yali ni ko wale lia; ia ko Repeka voki lia sa kunekune mai vua e dua, a tamada ko Aisake;
11
ni rau sa bera ni sucu, se rau caka na ka vinaka se na ka ca, me tu dei kinia na ka sa lesia eliu ka digitakia na KAlou, sa yali lia e na vuku ni cakacaka, e na vukuna lia sa kacivia,
12
sa tukuni vua na yalewa ko ya, O koya sa qase vi rau e na qaravi koya sa gone.
13
Sa vakakiinia na ka sa volai, Au sa vinakati Jekope, ia ka'u sa cati Iso.
14
A cava me da qai kaya? Sa tu beka vua na Kalou nai valavala tawadodonu? E yali sara.
15
Ni sa kaya vei Mosese ko koya, Au na lomani koya ka'u sa lomana, ia ka'u na yalovinaka vua ka'u sa yalovinaka kinia.
16
Sa qai yali ni yaco e na vukuna sa gadrevia, se na vukuna sa cici, ia e na vukuna lia na Kalou sa yalovinaka mai.
17
Ni sa kaya vi Fero nai Vola Tabu, E na vuku ni ka koya ka'u sa vaturi iko cake kinia, me'u vatakila vi iko na noqu kaukauwa, me tukuni voki lia na yacaqu ki vuravura taucoko.
18
O koya gona sa yalovinaka kina ko koya vua sa yalona kinia, a sa vadomoqataki koya sa yalona kinia.
19
O na qai kaya vi au, E na vuku ni cava sa ia tiko kinia na veibeitaki ko koya? ia ko cei sa vorata na nona lewa?
20
Kakua ni va koya, o iko na tamata; o cei o iko mo vileti vata ki na Kalou? Ena kaya beka na ka sa caka vi koya sa caka, O sa cakavi au vaka koya e na vuku ni cava?
21
E yali beka ni vitaliatakia na tete ko koya sa dautuli kuro, me caka kinia e na dua bau lia na buli tete, e dua na bilo me talei, ka dua voki me yali ni talei.
22
Ia ka vakaevei ke sa vinakatia na Kalou, me varaitakia na nona cudru, me vatakila voki lia na nona kaukauwa, a sa vosotia vadede sara kinia na vi bilo ena cudruvi sa varau tu me rusa:
23
me vatakila voki lia na kena levu ni nona vinaka ki na vibilo sa lomani, o koya sa varautakia e liu ko koya ki nai ukuuku,
24
io vi ita lia, sa kacivi ita ko koya, sa yali wale lia mai vei ira na JIu, maivei ira voki lia sa matanitu tani:
25
me vaka voki lia na ka sa kaya o koya enai vola i Osea,
Au na vakatokai ira sa yali ni noqu tamata eliu, me ra noqu tamata;
Ko koya voki lia ka yali ni lomani eliu, me qai lomani:
26
Ena yaco voki lia ena vanua sa kainaki kina eliu vi ira, sa yali ni noqu tamata koi kemunu; era na qai vatokai kinia me ra luve ni Kalou bula.
27
Sa kacivaki ira na Isireli ko Aisea voki lia, kevaka sa tautauvata na kedrai wiliwili na Isireli kei na nuku ni waitui, ia ena bula lia na kena vo:
28
ni na vayacoria na nona vosa ko Jiova e vuravura, ka na vaotia ka valekalekatakia.
29
Me vaka voki lia na ka sa kaya eliu o Aisea, kevaka ka yali ni dua na kawa sa valiavia vi keda o Jiova ni lewe vuqa, eda sa vataki Sotoma, eda sa tautauvata voki lia kei Komora.
30
A cava meda qai kaya? O ira na vimatanitu tani, ko ira era sa yali ni muria na vivadonui, era sa yaco me ra vadonui, ni ra sa vadonui e na vabauta.
31
Ia ko ira lia na Isireli, o ira era sa muria na vunau me ra vadonui kinia, era sa yali ni yaco ki na vunau ko ya.
32
E na vuku ni cava? ni ra sa yali ni muria e na vabauta, e na cakacaka lia ni vunau: ni ra sa tarabe e na vatu e vauveivatarabetaki;
33
me vaka na ka sa volai, raica au sa tauca mai Saioni na vatu e dauveivatarabetaki kei na vatu ni vivalomacataki: Ia ko koya yadua sa vabautia na yali ni vamaduataki.