¹ Dou sa yali beka ni kila, kemunu na viwekani, (ni'u sa vosa vi ira lia era sa kila na vunau,) ni sa vaucia na tamata na vunau e na visiga ni nona bula? ² Ia na yalewa sa vawati, sa vauci koya na vunau vua na watina, ni sa bula tiko o koya; ia kevaka sa mate na watina; sa qai sereki kinia na yalewa mai na vunau ni viwatini. ³ O koya na vayacani kinia na vunau ni dautagane, kevaka sa lai vawati ki na dua na tagane tani, ni se bula tiko na watina: ia kevaka sa mate na watina, sa qai sereki lia mai na vunau ko ya; ka na yali kinia ni dautagane, kevaka ena lai vawati ki na dua na tagane tani. ⁴ Dou sa vakakinia, na viwekani ni dou sa sereki mai na vunau e na vukui ni yago i Karisito; me dua tani mo dou viwatini kaya, io ko koya sa vaturi cake voki mai na mate me da vua kinia vua na Kalou. ⁵ Ni da sa tiko vayago lia, sa dau tubu vakaukauwa e na veitikida na gagadre ca, sa tubu mai na vunau, me vuataki kiniana mate. ⁶ Ia eda sa qai sereki mai na vunau, ni da sa qai mate ki na ka sa vauci keda; me da ia na viqaravi e nai tovo makawa ni vunau. ⁷ A cava me da qai kaya? Sa ca li na vunau? E yali sara. Au a yali dina ni kila se cava nai valavala ca, kau yali kila nai vunau: ni'u sa yali kila se cava na daukocokoco, kevaka sa yali kaya nai vunau, Kakua ni kocokoco. ⁸ Ia na ca, ni sa kaukauwa ena vuku ni vunau, sa vatuburia e lomaqu na gagadre ca kece lia. Ni sa mate ca ni sa yali na vunau. ⁹ Ia ka'u a bula lia e liu ni sa yali na vunau; ia ni sa qai mai na vosa ni vunau, sa bula voki na ca , ka'u sa qai mate kinia. ¹⁰ Ia na vosa ni vunau, o koya ka yaco rawa kinia na bula, ka'u sa kunea sa yaco kinia na mate. ¹¹ Ni sa kaukauwa na ca, e na vuku ni vosa vunau, a sa temaki au kinia, ka vamatei au. ¹² Ia sa savasava na vunau, sa savasava voki lia nai varo, sa dodonu voki lia ka vinaka. ¹³ Sa qai yaco beka na ka vinaka me ka me'u mate kinia? E yali sara. A ca lia, me rairai kinia ni sa ca, sa tauria na ka vinaka me kitakia vi au kinia me'u mate; me rairai kinia na ca me ca dina sara e na vuku ni vosa ni vunau. ¹⁴ Ni da sa kila sa ka vayalo na vunau: ia koi au, au sa vakayago wale lia, ka'u sa volitaki ki na ca. ¹⁵ A ka ka'u sa caka tiko, au sa yali vinakatia, ia na ka ka'u sa vinakatia, au sa yali kitakia; ia na ka au sa catia, au sa caka tiko. ¹⁶ Ia kevaka ka'u sa caka na ka au sa yali ni vinakatia, au sa kaya kinia ni sa vinaka nai vunau. ¹⁷ A sa yali ni o au dina sa caka,na ca lia sa tiko vi au. ¹⁸ Ni'u sa kila ni sa yali sara ni tiko vi au e na noqu tovo vayago e dua na ka vinaka; ni sa tiko lia vi au na vinakatia na ka vinaka; ia na kaukauwa me'u kitakia kina, ka'u sa yali ni kunea. ¹⁹ Ia na ka vinaka au sa vinakatia, au sa yali caka; ia na ca au sa yali vi vinakatia, au sa caka lia. ²⁰ Ia kevaka au sa caka na ka au sa yali vinakatia, sa qai yali dina ni koi au dina sa caka, na ca lia sa tiko vi au. ²¹ Ia au sa kunea kinia e dua na vunau, sa tiko kinia vi au na ca ni'u sa via caka na vinaka. ²² Ni'u sa vinakatia na vunau ni Kalou e na lomaqu dina: ²³ ia ka'u sa kunea e dua tani na vunau e na vitikiqu, a rau sa vivala kei na vunau sa tu e na lomaqu, a sa vabobulataki au ki na vunau ni ca, o koya sa tiko e na vitikiqu. ²⁴ A tamata valoloma koi au! o cei ena sereki au mai na yago ni mate koya? ²⁵ Au sa vavinavinaka vua na Kalou e na vuku ni noda Turaga ko Jisu Karisito. Ia sa qai vakoya, au sa qaravia na vunau ni Kalou e na lomaqu dina, ia na vunau ni valavala ca e na noqui tovo vayago.