¹ A cava me da qai tukunia sa rawa o Eparama na tamada, e nai valavala vayago? ² Kevaka sa vadonui o Eparama ena vuku ni cakacaka, sa qai dua na ka vua me dokai koya kinia, ia ka yali lia ena mata ni Kalou. ³ A cava e tukunia na Vola Tabu? Sa vabautia na Kalou o Eparama, a sa wili vua mei valavala dodonu ⁴ Ia na kenai sau vua na tamata dau cakacaka, sa yali wili me loloma, sa kenai voli lia. ⁵ Ia o koya sa yali ni cakacaka, a sa vabauti konu sa vadonuya na tamata i valavala ca, sa wili vua na nona vabautia mei valavala dodonu. ⁶ Sa vaka voki lia kinia o Tevita ni sa tukunia na kena kalougata na tamata, sa okatia vua na Kalou nai vukivuki dodonu, ia ka yali ena vuku ni cakacaka: ⁷ Sa kalougata o ira sa bokici na nodrai valacala ca, Sa buluti na nodra caka cala; ⁸ Sa kalougata na tamata sa yali beitakia vua nai valavala ca ko Jiova. ⁹ E ra sa kalougata beka va ke o ira na tamata era sa cili, se ra vaka voki lia kinia o ira sa yali cili? ni sa da kaya ni sa wili vi Eparaama na nona vabauta me valavala dodonu. ¹⁰ Sa qai wili beka vaivei ? ni sa cili oti o konu, se ni sa yali cili? Sa yali lia ni sa cili oti, ni sa yali lia ni cili. ¹¹ A sa soli vua na vicili mei vatakilakila, me vadinadinatakia ni sa vadonui o konu ena vuku ni nona vabautia, ni sa yali ni cili tu, me yaco kinia o konu me tamadra kece lia era sa vabuatia, ia ka ra yali tu ni cili; me wili voki lia nai valavala dodonu: ¹² me tamadra voki lia ira sa cili, vi ira era sa yali ni cili wale lia, era sa muria voki lia nia varau ni vabauta ko ya sa ni Eparaama, na tamada ni se yali ni cili. ¹³ Ni sa yali yalataki vi Eparaama, vi ira voki lia na nona kawa, me taukei ni vuravura, e na vuku ni vunau, e na vuku lia ni vi vadonui sa yaco ena vabautia: ¹⁴ ni sa mai vatawayataki na vabauta, ia sa ka wale voki lia na vosa ni yalayala, kevaka era sa taukenia o ira sa muria na vuna: ¹⁵ ni sa vavunia na cudruvi na vunau: ni sa yali nai valavala ca, kevaka e yali nai vunau. ¹⁶ E na vuku ni ka koya sa ka ni vabauta, me sa rawa kinia me ka ni loloma: me ra tu dei kinia na vosa ni yalayala vi ira kece lia na kawa; e yali vi koya wale lia sa tu vua nai vunau, vi koya voki lia sa tu vua na vabauta i Eparama: koya sa tamada kece lia, ¹⁷ ( me vaka sa volai, Au sa qisi konu mo tamadra na vivanua e vuqa,) e na matana sa vabautia o konu, io, na Kalou, o koya sa bulai ira voki lia na mate, a sa kacivia na vika sa yali me vaka sa tu: ¹⁸ ia ni sa yali na ka me nuinui kinia, sa vabautia ko konu, ka vanuinui, me yaco me tamadra na vivanua e vuqa, me vaka sa kainaki, Ena vakakinia na nomunu kawa. ¹⁹ Ia ni yali malumalumu na nona vabautia, sa yali ni vakasama kinia na kena mate na yagona ka ni sa dua beka na drau na nona yabaki, se na kena mate na ketei Sera: ²⁰ a sa yali voki lia ni lomalomarua me tawa vabautia na vosa ni yalayala ni Kalou; sa kaukauwa lia na nona vabautia, a sa varokorokotakia kinia na Kalou; ²¹ a sa vadinatia sara, ni sa rawarawa vi konu, vayacoria na ka sa yalatakia. ²² O koya gona sa wili vua mei valavala dodonu. ²³ Ia sa yali ena vukuna duadua lia sa volai kinia vua ni sa wili vua; ²⁴ ena vukui ita voki lia, ni na wiliki voki lia vi ita, kevaka eda sa vabauti koya sa vaturia cake voki mai na noda Turaga ko Jisu mai na mate; ²⁵ o koya ka soli yani ena vuku lia ni nodai valavala ca, a sa vaturi cake voki me da vadonui ita.