¹ O koya gona, ni da sa vadonui ena vabautia, me da sa qai vivinakati kei na Kalou ena vuku ni noda Turaga ko Jisu Karisito: ² e na vukuna voki lia eda sa torova rawa kinia, ena vabautia na loloma koya eda sa qai tu kinia; me da sa reki voki lia ni da nuitakia na vi vakalougataki ni Kalou. ³ A sa yali ni koya loa lia gona, me da sa daureki voki lia ena vuku ni vika rarawa: ni da kila ni sa dau tubu na dauvosota mai na vi ka rarawa; ⁴ ia na dauvivatovolei mai na dauvosota; ia nai nuinui mai na dauvivatovolei. ⁵ Ia sa yali na madua ena vuku ni nuinui; ni sa sovaraki kina na yaloda na loloma ni Kalou ni sa solia vi ita na Yalo Tabu. ⁶ Ni sa mate na Karisito me kedrai sosomi ni tamata i valavala ca ena gauna sa lokuvi eliu, ni da sa maumalumu tiko. ⁷ Ni sa yali beka e dua me mate mei sosomi ni tamata yalododonu; ia ka sa dua beka sa doudou me mate mei sosomi ni tamata dauloloma. ⁸ Ia na Kalou sa vatakila na loloma vi keda ni sa mate na Karisito me noda i sosmi ni da sa tamata ca. ⁹ Ia ni da sa qai vadonui ena vuku ni nona dra, ena qai rawarawa meda vabulai mai na cudru ena vukuna. ¹⁰ Io, kevaka e da sa vivinakati vata na Kalou ena vuku ni nona mate na luvena ni da sa vimecaki, ena qai rawarawa cake ni da sa vinakati tu, me da vabulai tiko ena vuku ni nona bula. ¹¹ A sa yali ni o koya loa lia, ia e da daureki voki lia vua na Kalou, ena vuku ni noda Turaga ko Jisu Karisito, o koya eda sa yaco kinia ni da sa vivinakati tu. ¹² Ia me vaka ni curu i vuravura nai valavala e na vuku ni tamata e lewe dua, vata na mate, ena vuku ni valavala ca, a sa yaco vakinia na mate ki na tamata kece lia, ni sa cala na tamta kece lia. ¹³ Sa tu iliu i vuravura nai valavala ca, sa yaco i muri nai vunau: a sa yali wili nai valavala ca, ni sa yali na vunau. ¹⁴ Ia mai na gauna i Atama ka yacovia na gauna i Mosese sa dau vitalia o mate vi ira voki lia era sa yali valavala ca me vaka na talaidredre ni Atama, o koya sa nona ivatakarakara sa qai mai imuri. ¹⁵ Ia erau sa yali ni tautauvata sara na talaidredre vata nai solisoli loa lia. Ia kevaka sa mate na lewe levu, ena vuku ni nona talaidredre na lewe dua, sa qai rawarawa cake sara me yaco valevu vi ira na lewe vuqa na loloma ni Kalou, vata nai solisoli ni loloma, ena vukuna lia na tamata e lewe dua o Jisu Karisito. ¹⁶ E rau sa yali ni tautauvata na e na ka sa yaco ena vuku ni dua bau lia, kei nai solisoli: ni sa dua bau lia sa yaco kinia na lewa me da cala, ia nai solisoli wale lia sa yaco vi ira na lewe vuqa na nodrai valavala ca me ra vadonui kinia. ¹⁷ Ia kevaka sa gumatua na mate ena vukuna na lewe dua; ena qai rawarawa valevu cake vi ira sa yacovi ira na loloma levu kei nai solisoli ni vivadonui, me ra gumatua e na bula ena vukuna na le dua ko Jisu Karisito. ¹⁸ O koya gona, me vaka sa lewai me cudruvi kece lia na tamata ena vuku ni dua bau lia na cala; sa vaka voki lia ena vuku ni ni dua bau lia nai valavala dodonu sa rawa me ra vadonui kece kinia na tamata me ra bula: ¹⁹ ka me sa vacalai na lewe vuqa ena vuku ni nona talaidredre e dua bau lia na tamata, sa vadonui voki lia kinia na tamata ena vuku ni nona talairawarawa na le dua. ²⁰ Sa qai yadi mai na vunau, me uasivi kinia nai valavala ca. Ia ni sa uasivi cake mai na valavala ca sa uasivi cake valevu sa ra na loloma: ²¹ me vaka ni sa gumatua nai valavala ki na mate, me gumatua voki lia kinia na loloma, e na vadonui, ki na bula tawa mudu, e na vuku i Jisu Karisito na noda Turaga.